Cib nyied seizcou, gwnz gai venj rim geizhoengz, dauqcawq hoengzfwgfwg, dauqcawq angqvauvau.

Cib nyied it hauh, dou caeuq daengx guek ciencien fanhfanh hoh beksingq ityiengh angqcoux ngoenzseng guekcoj daxmeh raeuz.

Banngoenz dou daengx ranz vunz byaij youq gwnz haw, hai da couh yawjraen gij geizhoengz baek rim song henz gai haenx nyig rumz biyagyag, lumj raemxlangh ndinghoengz nei, cang diuz gai bienq ndaej moqsagsag.

Banhaemh, dou daengx ranz vunz guhdoih daengz gvangjcangz bae guhcaemz, ndaw gvangjcangz senq gyonjcomz rim vunz, gyae’gyae couh dingqnyi gij sing go 《Fwen Haenh Guekcoj》 habciengq ndei dingq haenx cienz daeuj, aen gvangjcangz lumj aen haij angqyangz nei：

Geizhoengz Haj Sing nyig rumz mbinfouz,

Singfwen hoenxhingz baenzde goksat,

Fwen haenh guekcoj ndiepgyaez duh raeuz,

Ngoenz hwnj byaijcoh fanzyungz fouqgiengz……

Hot go sugrwz neix, hawj gyoengqvunz mbouj rox mbouj nyinh dwk gaen ciengq hwnjdaeuj. Gou byaij gvaqbae yawj, laxlawz dwg bang daxau caeuq bang daxheiz ndeu cingq ciengqgo.

Gou byaij daengz gyang gvangjcangz, raen gwnz daizheiq miz vunz yienjheiq: Miz daxheiz daenj vinj hoengz diuqfoux, miz lwghag langh sing doeg sei, lij miz lwghag ciengq go. 《Guekcoj Gou Caeuq Gou》hot go neix yiengj seiz, gyoengqvunz cungj gaen ciengq, gij geizva henz loh hix gaen rumz biufefe.

“Mehgux, ciet gozging vihmaz aeu cuengqgyaj caet ngoenz?” Lansau haj bi haenx ngiengx gyaeuj cam gou.

Gou lumh gyaeuj de naeuz：“Ciet gozging dwg ngoenzseng guekcoj raeuz, couh caeuq raeuz moix bi angqhoh ngoenzseng ityiengh. 76 bi gonq, Mauz cujsiz youq gwnz Denh’anhmwnz gangj Cungguek moq laebbaenz, daj haenx hwnj cib nyied it hauh couh dwg ngoenzciet guekcoj raeuz. Raeuz ngoenzneix ndaej gwndaenj vuenyungz mbouj yungzheih, dwg daihbaj gwzming lezsw aeu mingh vuenh daeuj, raeuz aeu insik bw.”

Lansau dingq le ngaekngaek gyaeuj.

“Ciuj——bwng！” Sing ndeu, bauqva youq gwnzmbwn sanqbyaengbyaeng lumj cienfanh naed ndaundeiq doek roengzdaeuj, vunzlai bekfwngz goksadsad, bouxboux angqfwngfwng.

Youq gwnz roen ma ranz, rumzcou boq daeuj baenz raq baenz raq rang gveiqva, cim coh gij va henj iq venj rim gwnz nyefaex haenx, hawj gou lumj yawjraen gij gwndaenj daengx guek gizgiz cungj rang lumj gveiqva neix, sim gou soengswdswd, angq naeuz: “Hoh guekcoj hwngvuengh fanhbi.”