第十五期

原文：

无将大车，祇自尘兮。无思百忧，祇自疧兮。

无将大车，维尘冥冥。无思百忧，不出于颎。

无将大车，维尘雝兮。无思百忧，祇自重兮。

——《诗经·谷风之什·无将大车》

译文：

1

Ci hung gaej bae nyoengx，

Mienx doemboenq dawz ndang.

Gaej you cix gaej gyangz，

Beg caujfanz dungxsaej.

Gaej cengj aen ci hung，

Hwnj rumz boenqfoenfoen.

Gaej you neix you haenx，

Mbwng’yaeng’yaeng gvaq ngoenz.

Ci hung raeuz gaej nyoengx，

Mokfaenx goemq diendeih.

Gaej doeng siengj sae ngeix，

Youheiq ndaenq simdaeuz.

（南宁市武鸣区:李炳群/Lij Bingjginz）

2

Gaiq(gaej) gengq civaiz, ngaiz faenx uq ya; gaiq nyex saeh nyungq, bungq binghvanh ha.

Gaiq(gaej) gengq civaiz, myaijnamh roemj ndang; gaiq nyex saeh nyungq, dungx raeng saej cieg.

Gaiq(gaej) gengq civaiz, mokfaenx gvaix ya; gaiq nyex saeh nyungq, dungxliengz caem ha.

（崇左市江州区：中 午/Cunghvuj）

3

Mbouj bae doi ci laux,

Lau ndang uq namhfok.

Ngeix saeh lai uk mok,

Lumj haeuxgok bok naeng.

Mbouj bae doi ci laux,

Mbwn hau baenz mbwn henj.

Nyapnyuk laeg bae genj,

Venj ndawsim mbouj baenz.

Mbouj bae doi ci laux,

Namhfok dauqcawq mbin.

Ngeix saeh lai uk in,

Fanzsim lai baenz bingh.

(西林县：黄志伟/Vangz Civeij)

4

Gaej ngaex ci hung,

Gag nyex ndang foenx.

Gaej ngeix youheiq,

Gag nyex bingh yak.

Gaej ngaex ci hung,

Namh foenx mbin benq.

Gaej ngeix youheiq,

Gag naiq ndwi sat.

Gaej ngaex ci hung,

Namh foenx cw biengz.

Gaej ngeix youheiq,

Gag deng rap naek.

（上林县：覃彦龙/Cinz Yenlungz）

5

Gaej bae ngaex aen ci hung, ngaex de couh miz namhfaenx cw haeuj ndang. Youh gaej siengj gij simnyap he, siengj lai rox baenz ndangndaet ndangdot.

Gaej bae ngaex aen ci hung, ngaex de couh miz namhfaenx mbinfoenfoen dwk mbwn mungzcw. Youh gaej siengj gij simnyap he, siengj lai sim mbouj onj rox baenz bingh.

Gaej bae ngaex aen ci hung, ngaex de couh miz namhfaenx cwdangj yawj mbouj raen loh. Youh gaej siengj gij simnyap he, siengj lai rox dungxliengz gyanaek, bingh doxdam hwnj ndang.

（平果市：梁金海/Liengz Ginhhaij）

（1）

6

Gaej bae nyoengx aen civaiz hung naekcaem haenx, cijnaengz loengh ndaej swhgeij muenxndang namh rim ndang. Gaej bae siengj gij cungjcungj nyapnyuk haenx,caenh rox nyex daeuj bonjfaenh bak bingh heux ndang.

Ciengeiz gaej bae nyoengx aen ci hung huk haenx, doi de cij rox riengz namh hwnj faenx, diendeih amq mbouj miz rongh. Gaej bae gag ra gak cungj youheiq, siengj daengz de couh nanz ndaej baetduet gij youheiq ndawsim, simsaenz mbouj onj.

Gaej yunghrengz bae doidoengh ci hung naeknup haenx, dan rox hawj gij namhfaenx mbin hwnj cw mbwn, dangj roen baihnaj. Gaej bae ngvanh cien fanh cungj siengsim, baenzneix hawj mwngz simcingz engq naekcaem, gyanaek bingh in.

（凤山县：韩 辉/Hanz Veih）

7

Gaej nyoengx aen ci naekgywg haenx, cij nem ndaej ndang namhfaenx ndeu. Gaej siengj gij saeh simnyap haenx, cij nyex ndaej ndang inget ndeu. Gaej nyoengx aen ci naekgywg haenx, namhfaenx cw mbwn mongmatmat. Gaej siengj gij saeh simnyap haenx, ndawsim mbouj onj rox baenz bingh. Gaej nyoengx aen ci naekgywg haenx, faenx mbin cw roen yawj mbouj seuq. Gaej siengj gij saeh simnyap haenx, cij sawj siengsim engqgya naek.

（南宁市武鸣区：农振凤/Nungz Cinfung）

8

Gaej aeu bae doi aen ci hung neix，aenvih de faenx daiq lai lo, danghnaeuz mwngz bae doi de, faenx couh mbin haeuj gyaeuj haeuj ndang mwngz liux. Gaej aeu ngeix lai，danghnaeuz mwngz doeng ngeix sae ngeix，yienzlaiz ndang mwngz mbouj miz bingh，doeklaeng couh gag baenz bingh lai.

Gaej aeu bae doi aen ci hung neix, aenvih de faenx daiq lai lo, danghnaeuz mwngz bae doi de, faenx couh lumj raq mok nei goemq daeuj. Seizneix，mwngz gaej doeng ngeix sae ngeix，ngeix le，yied ngeix yied nyapnyuk.

Gaej aeu bae doi aen ci hung neix，aenvih de faenx daiq lai lo, seizneix, danghnaeuz mwngz bae doi de, faenx couh mbin mbangq laep mbwn liux, seizneix, mwngz gaej aeu haeujsim bae ngeix lai, mboujne, yied ngeix yied baenz bingh haeuj ndang.

(西林县：梁 锋/Liengz Fungh)