Haetromh, gou hai dou couh raen lwgsai hung song ga geuhgingj naengh gwnz aen cisamloek youq najranz de, boux ndeu cit ien fefe, hoenz ien geuj rim ndaw cisamloek le youh mbin ok rog, baenz diuz baenz diuz mbin haeuj ranz gou daeuj.

Haetromh couh mup deng gij hoenz ien neix, gou wen dwk yaek rueg bae. Baez ndeu song baez mbouj miz gijmaz, ngoenzngoenz yienghneix, gou caen miz di souh mbouj ndaej, doenghngoenz baez mup daengz gij hoenz ien neix, gou couh bienq ndaej lumjnaeuz yaek fatbag nei, daengx ngoenz simnyap caez, youq mbouj onj, gwn mbouj feih.

Mizseiz gou cang guh hozndat dwk vut aen doengj roxnaeuz aen lamz ok bakdou bae, naemj haep lwgsai hung gaej haetromh couh daeuj bakdou cit ien. Lwgsai hung lumj mbouj roxyiuj saeh nei, ciuq faenhde guh.

Mizseiz gou hix youq ndaw ranz ndaq:“Haethaet cit ien, hawj gou hix gwn oenq, byaj mbouj rox bag mwngz lo.” Lwgsai hung lumj miz rwz mbouj miz congh, dingq ndaejnyi hix mbouj guh- sing. Gou ndaenq dwk yaek gwn mbei de.

Lwgsai hung neix samcib lai bi, vunz ndangreux, noh haubieg, ngoenz daengz haemh mbouj nyi gangj geijlai coenz vah, hix mbouj raen bae guh gijmaz hong, daengz donq cij rox gwn, daengz seiz cij rox ninz.

“Ngaizromh cawj baenz lo, daeuj gwn lo.” Naihlaux youq ndaw ranz hemq naeuz. Lwgsai hung vut aen gumqien youq gwnznamh, song sam yamq couh haeuj daengz ndaw ranz bae lo, ciepdwk couh dingqnyi sing rek sing duix yiengj gvangli gvanglang.

Lwgsai iq dawz vanj mienh he daj ndaw ranz byaij ok bakdou daeuj, de lajdin baez raeuz, vunz yaek laemx roengz, “gvang” sing ndeu, aen vanj gyangfwngz de doek daengz gwnznamh, vanj soiq lo, gij mienhdiuz ndaw vanj sanq youq gwnznamh. Miz geij geu mienh sinz daengz bakdou gou daeuj, mienh yaek haeuj bak youh bok roengz namh bae, lwgsai iq yawjmyoegmyoeg, mbouj rox baenzlawz guh ndei, ndwn dwk mbouj doengh hix mbouj gangj vah, yaek daej hix mbouj gamj oksing.

“Baenzyouq lo, baenzyouq lo.” Naihlaux daj ndaw ranz doq hemq doq buet ok bakdou daeuj, raen daengz lwgsai iq yienghneix, hemq naeuz:“Gwn lo, gwn lo, baezneix mwngz miz gwn lai lo, heuh mwngz youq gwnz daiz gwn, mwngz cungj mbouj dingq, baenzneix euqci, raen lwi? Iek mwngz sam ngoenz yawj mwngz dingq mbouj dingqvah dem!”

Gij sing naihlaux youh sang youh set, cog rwz cog saej, gou ngoenzngoenz dingq gij sing neix, yaek dai mbaet bae.

“Sinhoj cawj hawj sou gwn cixbah, lij hawj gou sinhoj bang sou uet haex mad gumq dem.” Naihlaux doq ndaq, doq dawz sauqbaet baet gij mienh caeuq gij mengduix sanq youq gwnznamh haenx.

Lwgsai iq caet bi lai, doeg siujyoz it nienzgaep, lwg neix manzgyaengj, de youq ranz mboujdwg aeu cag cug daengq guh ci rag bae rag dauq, couhdwg youq najranz buet hwnj buet roengz, miz geij baenz cungj yaek deng ci nap dem. Ngoenz daengz haemh mbouj raen de dingz roengzdaeuj gvaq, naihlaux baenzlawz ndaq, baenzlawz maenj, de cungj mbouj dawzhaeujrwz, lwgsai hung yawj lwgsai iq baenzneix nauh, lumj saeh mbouj gven de nei, hix mbouj ndwet saek coenz.

Lwgsai iq neix ceiq dwghaemz, de cungj maij loenghsaeh dwk gou, mizseiz de dawz sauqbaet youq najranz de daegdaengq dawz faenx roxnaeuz dawz nyapnyaj baet daengz douranz gou daeuj cuengq; mizseiz de gwn doxgaiq lw le couh dauj youq naj douranz gou. Raen gou baez hai dou de couh vaiqdangq buet deuz, gou caen naemj maenj de geij coenz, hoeng gou caengz haeuj gaenh de gaenq buet deuz mbouj raen ngaeuz.

Naihlaux caetcib lai bi, vunz iq ndang byom, lumjnaeuz rumz baez ci couh yaek ci de bae roxnaeuz ci de laemx roengz nei. De cawj hawj lwgsai hung caeuq lwgsai iq gwn ndei le, couh baij daiz guhhong. Naihlaux mizseiz bang vunz ding lwggaet, ding naed lwggaet ndaej faen ngaenz he; mizseiz bang vunz roix lwgrou(lwgcaw), dingqgangj roix baenz roix lwgrou he ndaej song gak ngaenz, cawzliux daengz donq aeu hwnqbae cawj gwn, naihlaux ngoenz daengz haemh cungjdwg naengh youq ndaw ranz guhhong, hix mbouj rox de ngoenz guh ndaej geijlai ngaenz.

Gou boux mehmbwk ndeu gag youq, ranz gou caeuq ranz naihlaux couh gek mienh ciengz ndeu, ok aen roet yiengj he hix dingq ndaejnyi sing.

Gou soqlaiz mbouj raegraeh gij saeh bouxwnq, couhsuenq dwg ranznden gou hix mbouj bae cam it ngeih. Lwgsai hung seiz mbouj seiz couh biemq haeuj ranz gou daeuj, song da sohlwtlwt dwk lumj ra gijmaz nei, hainduj gou miz di dwglau, seizgan nanz le, gvenq lo, hoeng gou caen nyap ndaek vunz neix, mizseiz raeuz caengz ndaej daenj ndei, de gaenq naengh daengz gwnz cisamloek douranz de, song da dinghdingh cim haeuj ndaw ranz gou daeuj, loengh dwk gou cungjdwg aeu daenj ndei cij ndaej hai dou, ngoenzndit ngoenzfwn hix mbouj ndaej hai dou gvangq gvaq.

Gaenh ranz gou miz haujlai aen denswjcangj, gij cangj neix guh wjgih, bae ndaw cangj guhhong hix ndaej, lingx doxgaiq dauq ranz guh hix ndaej.

Geij bi gonq gou mbouj rox miz gij hong neix guh, mbwqlanglang ngoenz gvaq ngoenz.

Ngoenz ndeu, gou haep dou yaek okbae youz, Dahcej ranznden daengz baihlaeng gou naeuz: “Dahnuengx, mwngz ngoenz youq yienghneix hix dwg youqndwi, baenzlawz mbouj bae ndaw cangj lingx hong daeuj guh ha?”

Gou naeuz: “Gou mbouj rox baenzlawz bae lingx doxgaiq.”

“Daeuj vei, gou daiq mwngz bae aeu.” Dahcej yiedsim naeuz.

Ranz dahcej caeuq ranz gou doxgek sam ranz, bingzseiz byaij gvaq douranz doxraen hix dwg ngaekngaek gyaeuj, mbouj gangj geijlai vah. Dahcej hix bae ndaw cangj lingx doxgaiq daeuj guh, seiz mbouj seiz cungj aeu roen gvaq najranz gou, dou couh yienghneix sug lo.

Daj baezhaenx hwnj, geij bi roengzdaeuj gou cungj dwg youq ranz guh hong soujgoeng. Ranz naihlaux miz gijmaz saeh cungj youq ndaw da ndaw rwz gou, mbouj cam hix rox.

Goenglaux ranznden hix dwg caetcib lai bi, vunz ndang byom, byoemgyaeuj hau liux lo. Mbouj rox de bae gizgyae guhhong roxnaeuz youq gizlawz nyaengq gijmaz, de nanz mbouj nanz cij dauq ranz baez ndeu, goeng neix baez dauq, ranz neix couh engq ndwet lo. Goenglaux mbouj dwg ndaq lwgsai hung gaenx gwn gik guh, couhdwg ndaq lwgsai iq mbouj dingqvah, mbouj dingqson, mizseiz song gvanbaz haetromh haj diemj lai cung couh hwnqdaeuj gangj neix gangj haenx, sing’yaem coenz beij coenz sang, singsing haeuj rwz haeuj uk gou daeuj, loengh dwk gou sim luenh uk ndat, caen naemj bongx dou haeuj ranz bae, fok gyoengqde ngoenzhwnz mbouj faen, mbouj rox naemjnaemj ranz baihswix ranz baihgvaz lijmiz vunz youq. Gvaqlaeng naemjnaemj: Caemh roq doq swj, haet mbouj raen haemh raen, suenq lo. Gou couh yienghneix nyaenx dwk, geijlai bi gvaqbae, song ranz mbouj doxndei, hix mbouj miz gijmaz baklai.

Mizseiz gou gag naemj, gou suenq dwg bouxvunz ceiq mizhoz ndeu lo, mboujni, miz gij ranznden neix, mbouj rox gaenq doxceng doxndaq geijlai baez.

Haemhneix gaenq byonghhwnz cibngeih diemj lai cung lo, naihlaux youq ndaw ranz daihsing hemq hwnjdaeuj: “Ngoenzlwenz gou cuengq bak maenz ngaenz youq lajswiz, bouxlawz aeu bae ni?”

Gou gaenq ninzndaek, youh deng sing naihlaux hemq ndiu gvaqdaeuj, gij saeh yienghneix, gou mbouj rox bungz daengz geijlai baez.

“Gou aeu bae cawx ien lo.” Lwgsai hung naeuz.

“Dai lo, dai lo. Bak maenz ngaenz neix gou ce ngoenzcog aeu bae cawx haeux, haeuxgwn liux lo, sou yaek gwn mbouj gwn dem. Vaih ciuh mwngz lo, gwn codciuh mwngz lo, ngoenz gwn gutgungq youq ranz cij rox yungh ngaenz mbouj rox guhhong, yaemgoeng sonj lo!” Naihlaux hemq lumj banngoenz nei.

Ranz vunz neix cungj dwg yienghneix aeu banhwnz bae guh banngoenz, bouxlaux hemq bouxnyaeq nauh, caeuq ranz vunz yienghneix guh ranznden, caen simnyap dai lo, yaek naeuz mbouj gamj naeuz, yaek ndaq mbouj gamj ndaq, gou naemj: Dwg aen rongzroeg roxnaeuz rongznou, gou caen buen bae gizwnq youq suenq lo.（1）