Gou mbouj rox gij dauhleix de, cij rox ndeiangq, couh goemz youq henz caeuq ndenq di fwnz、boek di raemx yienghneix, daengz bohmeh ma ranz yawj gou le, gou couh ndei swngzgei aeu goenglauz vuenh’aeu ngaenzlingz.

Loengh ndaej saek aen cung le, aen bak- caengq iet okdaeuj haenx couh hainduj ndik raemx baenz rij, gij baihnaj saek song gaen ngamq riuz okdaeuj haenx, dingzlai dwg raemx, goengda boekbak, gij laeng okdaeuj haenx goengda couh doq cimz doq baengh gingniemh daeuj buenq, seizlawz laeuj ceiq cingqhuq, seizlawz yaez di, gvaqlaeng faenbied aeu doxgaiq coux ndei.

Cib gaen haeux, mbatnaengz ndaej guh cibngeih gaen laeuj baedauq, hoeng siengj aeu dohsoq engq sang, liengh couh noix lo, ndawde gij ceiq feih haenx, engqgya mbouj lai lo. Hoeng goengda daihfueng, baeznaengz ngauz laeuj ndei le couh youq ndaw mbanj baenqlik gien ndeu, naeuz vunzlai nyi, de miz laeuj ndei, cingj daihgya daengz haemh bae ndaw ranz gwn haeux gwn laeuj.

Naeuz dwg gwn haeux, saedsaeh dingzlai mbouj miz maz byaek. Couh dwg gyoengqvunz gvaengz henz gumzfeiz, cuengq aen gyaq sam ga he, gwnzde gak rek, ndawde dwk di daeuhfouh、byaekheu he. Caiq nda aen daiz he, gwnzde cuengq deb duhhenj, roxnaeuz lauxbaeg soemj、hing soemj, gij byaek ceiq bengz haenx, wnggai dwg doenghduz bya nyiuz lwg goengda aeu nyaqlaeuj bae henzdah dwksaeng lauz ndaej ma haenx, yungh youz bauq ndaej henjrwd byotbwd, rangfingfing.

Baezbaez cingj vunz daeuj gwn haeux, couh dwg seiz vunzmbanj doxcomz henz loz eu fwen haenx. Baeznaengz bouxcawj dwk haijvanj laeuj he cuengq gizhaenx, aeu aen cok faex gaenz raez ndeu, dwk cok ndeu, doq eu fwen doq iet aencok daengz naj bouxhek. Bouxhek aeu ciep ndaej gij fwen cij ndaej gwn, gvaqlaeng caiq lwnz daengz bouxlaj ciep fwen gwn laeuj.

Mbanj dou miz boux vunzgik ndeu, bingzseiz mbouj guhhong, baez daengz gwn haeux couh bae gak ranz ra gwn. Nanz le de rox gij singqheiq goengda, rox goengda cungj dwg dawz gij laeuj ceiq ndei haenx daeuj daihhek, hoeng laeuj noix vunz lai, de cix mbouj miz bonjsaeh doiq ndaej hwnj fwen, couh ngeix ok aen banhfap ndeu, mbatmbat cungj daeuj laeng. Baez haeuj daiz, boizleix gonq, naeuz bonjfaenh daeuj nguh lo, doiq mbouj gvaq daihgya, de gag fad sam cok, yienghle de doq aeu dawz aencok, yaepyet couh dawz gij laeuj ndaw haijvanj gwn bae buenqbangh.

Baezbaez seizneix, goengda couh aj bak da daengx yawj de, gaen ndwnjsoksok, lumj boux ndoet laeuj haenx dwg bonjfaenh nei, daengz baihde cuengq aencok, goengda cij haep bak, nunu fwngz, dawz aenvanj haeuj ndaw rug bae haeujsim dwk laeuj rim le caiq dawz okdaeuj.

Byawz cungj yawj ok bouxgik neix cing gvaqbouh, hoeng goengda mbouj naeuz de gvaq, lij ciengzseiz caegcaeg coux di haeux ndeu yo youq ndaw buh, gvaqlaeng gyajcang cunzranz oet doxgaiq hawj de. Gou mboujdanh laengz gvaq goengda, lij capeiq cam de, cij naeuz yaek baengh lauzdung gwn haeux, lienz gou cungj rox yaek hwnj bya raemj liu, bouxde mbouj guh saek yiengh, baengh gijmaz hawj de gwn hoengq!

Raen gou hujdengdeng, goengda mbat anj, yaepyet caiq riu hwnjdaeuj. De menhmenh goemz roengzma, cing gvaq fwngz gou cuengq hwnj gwnz fwngz de bae nyednyed, simgyaez dwk naeuz gou: “Lwg ha, vunz raeuz ne couh lumj baj fwngz neix nei, gan naeuz lwgfwngz doxfaen, hoeng cungj caemh rag. Yienghneix daihgya aeu doxbang, cijndaej baenz gaemxgienz, rox caengz?”

Seizde gou dangyienz mbouj rox. Gaemxgienz miz maz yungh? Gou sou lwgfwngz gaem baenz gienz, yawj bae yawj dauq, raen caen mizdi lumj gij yiengh doengxhaemh gyoengqvunz comz naengh ranz gou.

Ndaw yaenqsiengq, gumzfeiz ranz gou, seizseiz coemh daengz ranzrongh. Daxdaiq boihfaenh sang, gyoengqdoih ndaw mbanj caez majhung haenx cungj heuh gou guh daxgo, goengda yienznaeuz mbouj dang ganbu lo, hoeng vunzlai cungj dingq de lai, yienghneix gij vunz maij youq gyanghaemh sathong le, daeuj ranz gou gangj di goj ndeu, roxnaeuz ra goengda guhlaux.

Moix baez ndaw ranz miz vunz daeuj, goengda couh rag daengq okdaeuj heuh daihgya naengh youq henz gumzfeiz, ndingq geij cenj laeuj, naihsim dingq gyoengqde gigi getget naeuz duzgaeq ranz byawz cungj haeuj suen vunzwnq caeg gwn, byawz mbatmbat cungj oet gij hong baeg dai baeg lix haenx hawj vunz guh……Dingzlai dwg di saeh iqet he, hoeng gij vunz haenx cungj ndaej ceng dwk najhoengz rwznding bae. Mbatnaengz saeh iq ne goengda couh hozswnh gienq geij coenz, daihgya caiq gwn geij gaemz laeuj couh mbouj miz maz lo. Hoeng bungz daengz saeh reihnaz ne, couh dwg fwngz caeux hoz dangh lo.

Gij reihnaz gak ranz bonjlaiz couh sanq, mbangjbaez daem daengz hwnqranz、hoemmoh roxnaeuz coihroen daengj saehhong, couh miz gij saeh ciemqyungh reihnaz vunzwnq, yaek aeu reihnaz bonjfaenh doxdaengh haenx caeuq de doxvuenh cijndaej. Danghnaeuz doxvuenh cijndaej hawj song mbiengj rimhoz, gvaqlaeng mbouj miz vah, doxhuz doxndei yienghneix, couh yawj gij bonjsaeh bouxguhlaux neix raixcaix.

Goengda doiq ndaw mbanj gijmaz cungj rox, daiq ranz lawz youq lajfaex lawz ndaw gemh lawz miz geij leiz reih cungj rox. Yiengh le moix daem daengz gij saeh neix, de couh naengh dwk dinghyouq dingq gij iugouz song baih doxceng haenx, seiz mbouj seiz get gaemz laeuj he, nu fwngz ngeix saeh. Daengz gyoengqvunz ceng baeg lo, yaek dingq de gangj lo, de cij “emem” song sing, dawz gij bonjsaeh ak “baiz minz yienq gej minz you” okdaeuj, naihsim guhlaux.

“Cien gim hoj cawx reih doxrangh, baengzyoux doxngamj dij gvaq ngaenz. Ngoenzneix mwngz ok reih sam faen, cog gou nyiengh haengj naz buenq moux……

Vunz ndaw bya mbouj miz gijmaz mbouj ndaej bien fwen eu, mbouj miz gijmaz yienqhaemz mbouj ndaej aeu laeuj vaqgej. Gyoengqde ciengzseiz doq ciengq doq gwn, vanj laeuj ndeu gwn baenz haemh, sing fwen hix yiengj baenz haemh. Gou ne senq youq ndaw laeuj rang de, bamq gwnz ga goengda ninz ndaekndaek lo.

Caj gou ndiu le, gyoengq vunzmbanj ngoenzgonq lij ceng dwk duzma mbouj gamj raeuq haenx, caiq mwngz vad gou, gou cing mwngz, doxbuenx ok dou guhhong lo, moix baez raen yienghneix gou miznaj raixcaix, goengda baenzlawz ndaej baenzneix ak ha.

Seizde, gou miz haujlai saeh ngeix mbouj doeng, gou mbouj rox vihmaz daihgya gungz doxdoengz, goengda lij seizseiz cingj vunz gwn haeux gwn laeuj; vihmaz doenghboux lungzau bajliuz ndaej aenvih di saeh ndeu ceng dwk mbwn fan bae, goengda vanzlij menhmenh gienqnaeuz; gou lij mbouj rox goengda gwn laeuj neix, laemxseiz yawj hwnjbae naj hai, laemxseiz yawj hwnjbae siengsim.

Seiz goengda ndaw sim hojyouq, de cungj dwg yaemz youq, lienz gwn laeuj cungj mbouj miz sing. Goengda nanznanz ninzai youq gwnz eij, dinghnini yawj gwnz dingj ranz laepyauyau haenx. Gou ciengzseiz laihnaeuz de ninz lo, hoeng youh raen de byoq gaemz ien ndeu, uetuet gokda ndwn hwnjdaeuj, gwn gaemz laeuj ndeu, caiq ninz roengzbae.

Seiziq caenh ngvanh, doengh gij saeh neix hung le couh ndaej rox lo, hoeng gou ciemhciemh majhung ciemhciemh nyaengqfwd, mbouj rox seizlawz doengh gij geizheih haenx caeuq ranzmbanj doengzcaez deng gou gveng daengz laenglaeng bae lo.

Seiz goengda gvaqseiq, gyoengqvunz ganj daeuj diuqsang haenx buek youh buek. Miz hauxseng, miz bouxlaux gaem dwngx, miz daj mbanjhenz hai ci daeuj, miz daj aen si wnq cienmonz ganj daeuj, mbangj lai gou mbouj rox naj, miz mbangj lienz daxmeh cungj mbouj rox coh.

Gyoengqde rag fwngz dou, sei gij sim’in hix gangj vah gyo’mbaiq. Miz vunz gyo’mbaiq goengda bang gyoengqde ceng ndaej cwngcwz ndei, miz vunz gyo’mbaiq goengda caeuq de gyau cienzhag, lij miz vunz dawz bonj iq ndeu okdaeuj, gwnzde dwg gyoengqde aeu bit gag geiq bi lawz ndwen lawz goengda bae caeuq gyoengqde soengq haeux soengq ngaenz. Gou hix youq gij vah ngeixdauq gyoengqvunz, rox le gij caensiengq seizhaenx.

Youq gij saehgonq mbouj nyaenxsim ngeixdauq haenx, goengda caemh deng gienj haeuj ndaw raemxdah lizsij bae. De gaiq miznaj maz cungj ndwi liux, lij lw aen caensim dem lo.

Geij cib bi daeuj, goengda mbouj lumz gvaq doenghboux vih fwen doxsug、vih laeuj doxngamj haenx, mbouj lwnh dwg ndaw mbanj hixnaeuz henz yienh, cijaeu de dingqnaeuz bouxvunz caeuq de doxgyau haenx miz hoj, de couh siengj caenh banhfap bang bouxde, mboujcix caenndang hwnj dou, mboujcix dak vunz cienj ngaenz daiq doxgaiq. Yienznaeuz miz buenq ciuh mbouj ngamjhoz, goengda lij nyienh ciuhvunz bingzfanz, nyienh guh boux lanvaihseng yawj daeuj dwg bouxnungzminz bingzciengz youh gyaez gwn laeuj ndeu.

Hawj gou ceiq doeksaet dwg, youq gyoengqvunz daeuj mbouj dingz mbouj duenh haenx, gou angq raen bouxgik seizhaenx. De senq mbouj raen youq ndaw mbanj cib geij bi, dingqnaeuz dwg okrog guh gaujvaq lo. Seizneix, de bwn nyungq ndang ngaeh, buh byoengq vaq vaih, vunzlai gangj ndaej cingq deng.

Mbouj leixlangh vunzwnq baenzlawz yawj de, bouxgik byaij daengz naj lingz, goenggoeng gingqgingq hwnj le sam duk yieng, ra gizdieg laenglaeng he, naengh dwk mbouj guhsing. Gou ndenq vanjdawh hawj de, caiq raix boi laeuj ndeu hawj. De song fwngz dawz dwk saenzded, cimzcimz di ndeu, sawqmwh hemqnaeuz: “Goeng ha, gou youh daeuj laeng lo……” Raemxda de doq doekbyobbyob.

Gou baez dabuep, gaen de gwn gaemz ndeu, dangq bang goengda gingq bouxyoux de. Baezneix, gou cimz raen gij heiqrang lingzhoenz.