Dahraemxhoengz caen ndei,

Meiz(miz) fwen youh meiz（miz）goj;

Mbanjsanggiuz mbouj yoq,

Yienghyiengh moq liuxcaez.

Daj bae Dava Yen Gungconh Yangh Mbanjsanggiuz caijfungh dauqma, gou lij ciengzciengz loq raen gizde. Sanggiuz, lumj dieg sien nei, bya sang, raemx saw, vunz gvai, hawj vunz roxnyinh gig daegbied.

Mbatnduj yamq haeuj Mbanjsanggiuz, gou lumjnaeuz bae daengz aen seiqgyaiq moq ndeu. Dahraemxhoengz lumj diuz seicouz nei loegsausau, ngutngut ngeungeu, lae gvaq henz Mbanjsanggiuz. Henz dah rumz boqfifi, gij feihdauh raemx、namh、nya haenx, unqswnh rub gvaq gwnz gyaeuj gou daeuj, yaepseiz siu gij fanznyap ndaw sim gou bae liuxcaez.

Hai da yawj bae, gij bya Mbanjsanggiuz goengq ing coh goengq, mbaq dap coh mbaq, lumj bang beixnuengx ceiq ndei ndeu, maenhmaenh ndwn youq baihlaeng mbanj. Bya miz goengq sang goengq daemq, doxrangh mbouj goenq, moix goengq bya cungj dwg gienh doxgaiq yisuz gwnzmbwn saeqsim deugaek baenz, hawj vunz lienzsiengj bae gyae. Vangz lauxsae caeuq gou doengzdoih, de beng giz cimbuh gou cam:“Beixnuengx, mwngz yawj gij bya Sanggiuz miz gijmaz daegbied ne?”

“Miz gijmaz daegbied? Gou yawj mbouj ok, mwngz gangjgangj hawj gou dingq.” Gou doiq Vangz lauxsae naeuz.

Vangz lauxsae saengzswdswd naeuz:“Mbanjsanggiuz dwg baihbaek yiengq baihnamz, youq ndaw sawdeihleix daeuj gangj, baihbaek gvi ‘raemx’, baihnamz gvi ‘feiz’, yienghneix baijbouh, couhdwg ‘raemx feiz doengzbangh’, yaem yiengz bingzyaenx. Mwngz yawj baihswix Sanggiuz, dwg aen singz Dava ceiq sang, hoeng baihgvaz ne, couh daemq gvaq baihswix, neix dwg aeu baihswix bouj baihgvaz. Youq ndaw sawdeihleix naeuz, baihswix dwg ‘cinghlungz’, baihgvaz dwg ‘bwzhuj’, bingzciengz naeuz ‘cinghlungz goemq bwzhuj, daihdaih ok vwnzvuj’, ndigah aen mbanj neix wnggai miz daihbaj vunz okrog dang guen dang hak.”Gou riengz fwngz de ceij haenx yawj bae, caen lumj Vangz lauxsae naeuz. Gij bya deihseiq baenzlai daegbied, lumjnaeuz Mbanjsanggiuz cangz miz gij minghhoen coenzlaep daegbied, hawj vunz miz di doeksaet.

Ndwensam, lij miz di nit lumj seizdoeng, dou daenj buh na, hwnj saz bae. Sam aen saz cug doxcoh, daj Cingzyinzvanh hai haeuj Bizsuijvanh. Youq gwnz dah, rumz nit ci haeuj naj, aensaz bonghfifi, gyangdah sikhaek miz raemxlangh, dou angq heuh hwnjdaeuj, aensim maez youq gij gingjsaek gyangdah neix. Vunzlai caenhsim angq riu, angq dwk bya ndaw dah haenx hix saet hwnjdaeuj.

“Raemx Dahraemxhoengz lae bae haij, fwjgyaepbya ingj raemxlangh, niemh gij aencingz dai mbouj lumz. Sanggiuz dwg ranzmbanj gou, Sambaujsanh ronghndwen hwnj, ciuq youq aen van Cingzyinzvanh……”Sawqmwh, miz soujgo rwenzrwd daj ndaw saz cienz okdaeuj, hawj vunz roxnyinh miz raemx raeujrub lae youq gwnz ndang. Boux hujgeiq canghraiz Veiz Yungzvwnz byaij gyawj gou naeuz:“Boux sij souj go neix dwg vunz Mbanjsanggiuz Veizcungj, de youq baihrog guhhong, goj miz dungxcaiz lo.” Gangj liux, de aeu fwngz ceij gvaqbae, naeuz:“Yawj! Bouxde couhdwg Veizcungj.” Gou siujsim riri byaij gvaqbae, caeuq Veizcungj gaemfwngz. Cij raen de dwg boux vunz sang, ndang maengh, bwnda de raez youh fonx, naj seiqfueng, yawj hwnjdaeuj yiemzsuk youh miz simsingq. Doenggvaq caeuq de gangjgoj, rox de miz aen caw ndiep guek ndiep biengz gyaez ranz gyaez mbanj ndeu.

Raemx bingz lumj gingq, aensaz menhmenh biu bae, song haenzdah bya heu faex loeg, lumj fuk veh ndeu menhmenh hai daeuj. Veizcungj aeu fwngz ceij haeuj goengqbya laeng mbanj lwnh naeuz:“Neix dwg bya Sambaujsanh.” Baez yaep da, gou couh siengj daengz souj go de sij haenx:“Sambaujsanh, ronghndwen hwnj, ciuq youq Cingzyinzvanh……”

Veizcungj ciep roengzdaeuj caiq naeuz:

Youq gig gyae gig gyae gaxgonq, Gvangjsih Dava Yen Mbanjsanggiuz cij dwg aen mbanj bingzciengz ndeu. Vunz ndaw mbanj cij rox mbwn rongh cix guhhong, mbwn laep cix bae ninz, aeu song fwngz youq benq deihnamh neix dwgrengz guhhong gvaq saedceij. Yienznaeuz bouxboux dwg vunz soh, hoeng gwndaenj cungjdwg hoj lai. Engqgya boihseiz dwg, aen mbanj neix mbatnduj yienzbonj mbouj miz saek ga dah.

Miz bi ndeu, mbwnrengx cib lai ndwen, fwn mbouj doek, ndit ndat lumj yaek remj nei, ndaw reih dek baenz hub gvangq, gohaeux hwnjdaeuj couh dai lo. Vunzmbanj yaek dai iek, dauqcawq bae ra raemx, hoeng bae ra haujlai ngoenz cungj ra mbouj raen, bouxboux doeknaiq dauq ranz, naengh youq bakdou simfanz najcaeuq.

Ndaw mbanj miz boux lwgmbauq ndeu, mingzcoh heuh Daegyungj. De raen vunzmbanj souh gij hoj neix, sim in lumj cax gvej, de mbouj fug, boux dog gag haeuj ndaw bya bae ra raemx, aeu daeuj gouq gyoengq vunzmbanj. Daegyungj boux dog gag haeuj goengqbya coengzlaiz mbouj miz vunz bae gvaq haenx, ngoenz hwnz byaij mbouj dingz. De dawz fag cax ndeu, doq raemj oen doq ra raemx. De mbouj rox byaij geijlai nanz lo, roxnyinh hoz youh hawq, bak youh ndangj, song din naek lumj diet, cadi couh laemx youq ndaw ndoeng lo. Couh youq mwh de baegmou mbouj baenz vunz, miz duz loegvameiz deng sieng ndeu sawqmwh youq ndaw nya ndonj okdaeuj, laemx youq lajdin de. Daegyungj hojlienz de, mbouj yaemhywq saekdi couh sik geu buh de, hawj duz loegvameiz duk baksieng.

Siengj mbouj daengz duz loegvameiz baksieng ngamq duk ndei, de couh menhmenh ndwn hwnjdaeuj, heuh mbaeumbaeu bae coh Daegyungj, yienzhaeuh baenq ndang couh ndonj haeuj ndaw ndoengfaex bae, nanz mbouj nanz nyeux gyaeuj dauq laeng yawj Daegyungj, lumjnaeuz hawj Daegyungj riengz de bae nei. Daegyungj baez ngeix daengz, roxnaeuz duz loegvameiz dwg gwnzmbwn baij daeuj hawj de daiq roen bae ra raemx? Yienghneix, de cingsaenz hwnjdaeuj, maenhmaenh riengz duz loegvameiz bae.

Ginggvaq cib rungh gouj bya, daeuj daengz aen rungh cienzbouh dwg dathau ndeu, duz loegvameiz aeu gij gaeu de bae daemj coh dathau, faj dathau menhmenh aj hai, cij raen dathau baihndaw miz aen conghgamj ndeu. Daegyungj miz di dungxcieg, de menhmenh byaij haeuj ndaw gamj bae. Haeuj daengz ndaw bae, de yawj- raen gij gingjsaek ndaw gamj dadaengx caez. Ndaw gamj gij mokfaenx haj saek mbin bae mbin dauq, lumj dahsien gaem mbaw beizsen diuq foux nei. Haeujbae ceiq co, cij raen miz aen daizrin baij miz sam gienh bauj, sam gienh bauj youq ndaw gamj ronghsagsag. Duz loegvameiz naeuz:“Youq baihswix geq bae, gienh daih’it dwg huznyawh; gienh daihngeih dwg cawbauj; gienh daihsam dwg dwngxsaenz. Huznyawh de rox gag ok raemx; cawbauj rox hawj miuz haeux cug vaiq baenz lai; dwngxsaenz ndaej gyaep bingh yw bingh beksingq.

Daegyungj angq raixcaix, ngamq dawz sam gienh bauj hwnjdaeuj, conghgamj baihrog foemxfwg dieg doengh bya saenq hwnjdaeuj. De ganjgip buet okbae yawj, cij raen miz duz lungz ndeu youh hung youh yak heuj rig cauj mbe boemz gvaqdaeuj, de haenqdingding naeuz:“Gij bauj neix dwg gij bauj gou, mwngz gamj dawz bae, vaiqvaiq aeu hawj gou, mboujni gou couh caij biengh aen Mbanjsanggiuz mwngz.” Yienzlaiz, duzlungz yak neix senq rox gij bauj neix youq gizneix lo, itcig naemj gag aeu, hoeng aenvih ndanggaeuq de guh haujlai vaihsaeh, mbouj ndaej haeuj conghgamj bae aeu gij bauj neix. Mwhneix, de raen Daegyungj aeu ndaej gij bauj haenx, de couh naemj ciengj bae.(1)