10 nyied 14 hauh, hong sawqdiemj hwnqguh binjbaiz langhyawj “denjying Cunghvaz” diemj hwnqguh Nanzningz Banzlungz Segih biengjbaiz hailangh, aen sawqdiemj neix youz Gvangjsih Siujsoq Minzcuz Sawgeq Baujhoh Yenzgiu Cunghsinh、Gvangjsih Minzcuz Yijvwnz Yenzgiu Cunghsinh、Gvangjsih Minzcuz Cuzbanjse、Gvangjsih Gyauyuz Cuzbanjse daengj danvih caemh daiqdaeuz hwnqguh, Guekgya Minzveij Daengx Guek Siujsoq Minzcuz Sawgeq Cingjleix Yenzgiusiz daezhawj yezvuz cijdauj, gak caemhhwnq danvih fucwzyinz caeuq daibyauj camgya hozdung biengjbaiz.

Hwnqguh binjbaiz langhyawj “denjying Cunghvaz” aeu gij swhsiengj vwnzva caeuq gij swhsiengj youqgaenj gvendaengz gyagiengz caeuq gaijndei hong minzcuz Siz Ginbingz guh cijdauj, hopheux diuz sienqmeh couqmaenh gij eiqsik Cunghvaz Minzcuz ranz vunz ndeu, cauhlaeb aen bingzdaiz vwnzva cienzboq guh goeng’ik comz doigvangq senhconz yawjsaw daengj goengnaengz youq doxcaez. Gaxgonq, aen binjbaiz neix gaenq youq Gvangjsih Minzcuz Dayoz Duzsuhgvanj daengj dieg biengjbaiz hailangh, ngamq miz di cingzyauq, rengz yingjyangj sevei ciemh hung.

Banzlungz Segih dwg aen cizdij guhyiengh daengx guek minzcuz doxgiet baenaj, hix dwg aen gihcwngz segih Siz Ginbingz cungjsuhgi daeuj cazyawj cijdauj gvaq haenx. Youq neix laeb sawqdiemj, dwg lozsiz gij gidij guhfap cijsi cingsaenz cungjsuhgi “Gvangjsih hwnqguh gih guhyiengh couqmaenh gij eiqsik Cunghvaz Minzcuz ranz vunz ndeu, aeu daj gihcwngz segih gaem hwnj”, hix dwg saedhengz doidoengh Cunghvaz conzdungj vwnzva maenhndei cauhguh cienjvaq、cauhmoq hwngfat. Doenggvaq hwnqguh binjbaiz, ndaej hawj Cunghvaz ginghdenj daengj vwnzva dijbauj yungz haeuj ndwenngoenz segih ginzcung, gyagiengz daengx sevei nyinhdoengz Cunghvaz vwnzva, vih doidoengh couqmaenh gij eiqsik Cunghvaz Minzcuz ranz vunz ndeu daezhawj gaiqdap caeuq neiyungz.

Gawq roxyiuj, cieplaeng Gvangjsih mizgven danvih yaek laebdaeb doidoengh binjbaiz langhyawj “denjying Cunghvaz” haeuj hagdangz、vwnzboz cangzgvanj、lajmbanj、segih、giyez、dieg hozdung cunghgyau daengj, baenzyamq cauhlaeb vangjloz dijhi daengxcungq cienzboq Cunghvaz conzdungj vwnzva maenhndei.

(Vangz Yinz/黄云 Couh Senhyangz/周先阳 Cwnz Yizsenz/岑奕璇)