Daxbuz gou gvaqseiq gaenq ndaej cib bi lo, siengjniemh cix lumj gogaeu gwnz ciengz geujheux aen sim gou, lumjnaeuz de coengzlaiz mboujcaengz bae gyae, gij sing daengq raeujrub caemh ciengzciengz rwenz youq henz rwz. Gou cungj genhciz saenq daxbuz cij dwg bienqbaenz aen ndaundeiq gwnzmbwn——Lumj aen gojgaeq de gangj nei, vunzndei cungj ndaej bienqbaenz ndaundeiq, youq gyanghaemh muengh dwk boux ndawsim ndiepniemh haenx. Seizneix gou gaenq baenzranz baenzgya, aen hong gou hix dingh lo, moix baez siengj hwnj aen rungj raeujrub daxbuz, caeuq gij geiqhauh deng ndwenngoenz cimqnyinh de, couh lumj diuzmae gwnz congzrok gungx ciengz ranz gaeuq, baenz diuz baenz diuz, youq dangqnaj gou mbe hai.

Daxbuz dwg boux vunz ceiq giengz ndeu, lwgfwngz raezremh, laeng fwngz yaeuqyat, hoeng bajfwngz deng muz ok caengz reh nanwt ndeu, rag fwngz gou seiz, lumj gaem dawz diuz gaen youh co youh raeujrumrum ndeu. De bouxvunz ndang reux youh sang, daxbuz mwhcoz wnggai dwg lwgmbwk ceiq saundei ndaw mbanj. Hoeng mwhhaenx youq ndaw sim gyoengq lwgnyez dou, de miz aen bonjsaeh ceiq geizheih ndeu, couhdwg ndaw dungx de miz aen mboq gojgaeq ndeu, cijaeu haibak baenzlawz gangj hix gangj mbouj caenh.

Youq 70 nienzdaih mwhde, saedceij lumj baengzgaeuq saeg ndaej hausaksak, dandiuh youh hojgungz. Mbouj miz densi gaijmbwq, hix mbouj miz saek bonj saw yawj, aen goj daxbuz couh dwg gij yinxdaeuz dijbauj dou. Mboujguenj dwg ngoenz langh vaiz roxnaeuz ngoenz san haiz, danghnaeuz dou humx dwk de, de couh cuengq hong ndaw fwngz roengzdaeuj, gaeu bak menhmenh riunyumnyum hwnjdaeuj:“Gaxgonq miz duz yahnyenz ndeu……” Aen sing gangjvah de lumj raemxrij henz mbanj nei mbouj rox naetnaiq mbouj gip mbouj muengz menhmenh lae dwk, gangj daengz giz mizyinx, de couh yaengx diuz bien ndaw fwngz hwnjdaeuj, lumjnaeuz yaek aeu fad dawz duz yahnyenz ndaw gojgaeq de.

Ceiq lumz mbouj ndaej lij dwg ngoenz langh vaiz ndeu. Ndaw mbanj gyoengq lwgnyez cungj doxceng bang daxbuz yien cag vaiz、gip haexvaiz, cij dwg vihliux ndaej humx youq henz ndang daxbuz. Duzvaiz ngaem gyaeuj gwn nywj, dou couh caez humx naengh youq gwnz haenznaz, doq yawj daxbuz aeu mbaw nywj san baenz duzdaek、duzgoep, doq dingq de gangj “duzsae dahsau” baenzlawz aemq aen gyaw bae mbaet go’ngaeux, gangj “bouq cauxvangz” bi ndwenlab baenzlawz hwnj gwnzmbwn bae “bauq bingzan”. Miz baez ndeu gangj daengz mbwn yaek laep, rieng’vaiz youq ndaw saek fuemx fad baenz diuzngaeuz ndaemndwtndwt ndeu, dou lij rag cimqbuh daxbuz mbouj nyienh baema ranz:“Daxbuz、daxbuz, ngoenzcog lij daeuj gizneix langh vaiz ndei lwi? Aen gojgaeq neix caengz gangj sat ne！” Daxbuz riunyumnyum ngaekngaek gyaeuj naeuz:“Ndei ha, cijaeu sou gyaez dingq, gojgaeq daxbuz gangj mbouj liux.”

Daxbuz cungj mbouj haengj youqndwi, gyangngoenz aen ngaeuz de youq gyangnaz gipgip muengzmuengz, youq henz rienghmou rienghvaiz baebae dauqdauq, banhaemh youh naengh haeuj aen rok gyangranz bae daemjrok. “Gada gada……” Aen daeuqfaex youq ndaw geh mae luet bae luet dauq, lumj duzroeg iq mbouj rox baeg, daemj baenz mbaw baenz mbaw gaen’gyaeuj okdaeuj. Mizseiz gou ninz youq aen mbonq henz rok, yawj daeng’youz ingj aen ngaeuz daxbuz raezrangrang de, doek youq gwnz baengz rok, caeuq aen daeuq caez bibuengq baebae dauqdauq.

De mizseiz heuh gou bang de:“Nding, vit aen lutmae gvaqdaeuj.” Gou couh ndenq din, daj ndaw swxmae gip aen lutmae iet hawj de, lwgfwngz ngamq bungq daengz mae, humznyap raixcaix. Daxbuz couh dawz geij naed duhdoem, roxnaeuz gaiq maenz ndeu oet haeuj ndaw fwngz gou daeuj——Neix dwg de guhcaeg cang youq ndaw daeh ce hawj gou. Mizseiz gou baiqninz, daxbuz couh eu fwen, sing go gyaux sing daemjrok caez yiengj hwnjdaeuj, san baenz mbaw re unqswnh ndeu, menhmenh duk gou ninz ndaek.

（1）