Daengz Cungguek ngoenzseng,

Laux eng(nyaeq) daeuj goenghoh,

Gwnz fwngz gaem va moq,

Hoh mwngz fanh daih hwng.

Lwgminz ndiep guekcoj,

Guekcoj gyaez lwgminz,

Aencingz naek lumj rin,

Bouxboux cungj insik.

Gou gyaez mwngz Cunghgoz,

Baengh gohyoz fouqak,

Beksingq caeuq guenhak,

Gak boux caez haenqrengz.

Mauz cujsiz haucauh,

Gauq gag guh gag gwn,

Cauh hojcen hwnj mbwn,

Ndwn gwnz gyaeuj guekrog.

Cenzsuijdingj ndaem raemx,

Caemh cix ak gvaq vunz,

Caih ndaem haij mbin mbwn,

Gwnzbiengz dwg raeuz ak.

Sinhben deng funglaengz,

Naemj gyaeng raeuz mbouj ndaej,

Raeuz loemj de dauqdaej,

Gaej hawj de guhbaenz.

Yungh gohgi guekgiengz,

5G gwnzbiengz buet,

Cauhmoq youq Cungguek,

Hawj guekrog fug caez.

Gungcanjdangj lingjdauj,

Gauj ginghci gensez,

Gizgiz doeng gauhdez,

Sevei fazcanj vaiq.

Gauhdez doeng laujgih,

Feihgih daengz Bwzswz,

Ngaenz ciengxlaux ngaenzyw,

Cwgoemq mbanj Bouxcuengh.

Lwg Bouxcuengh maij fwen,

Dwen daengz raeuz guekcoj,

Eu fwen caiq gangj goj,

Danq guekcoj mbouj dingz.

Cwngfuj heuh ndaem ciengx,

Yienghyiengh cungj goq daengz,

Hawj nungzminz simfaengz,

Daengz gizgiz cungj haenh.

Dou dwg vunz Cunghgoz,

Swnghhoz ndei raixcaix,

Gak cuz cungj doxmaij,

Gaen dangj byaij roengzbae.

Gou gyaez mwngz guekcoj,

Gangj vahdoj danq mwngz,

Eu fwen youh bekfwngz,

Ciengq fukhwng hungmbwk.

Gou ndiep mwngz Cunghvaz,

Daihgya doengzcaez buek,

Maenh’ak raeuz Cungguek,

Ngoenzcog engq gyaeundei.