Mboengqneix, gij mingzdan ndaej ciengj Gaiq Cibngeih Gvangjsih Vwnzyi Cauhguh Dungzgujciengj cingqsik goengbouh. Cek saw 《Sing Moq》 neix ak gvaq doengzdoih cozbinj daengx gih ndaej aen ciengj Gvangjsih vwnzyi ciengj ceiq sang, cek saw neix dwg canghraiz Dungcuz Liujcouh Yangz Swfangh raiz、Gvangjsih Gyauyuz Cuzbanjse okbanj.

《Sing Moq》 raiz gij gojgaeq caensaed hawj vunz gamjdoengh. Cozbinj hopheux Yungzsuij Myaucuz Swciyen Dangjgiuh Cunh Vuhyingh Mbanjmyauz dieg bya laeg gapgyaiq Gvangjsih Gveicouh, lwnh gij yienghsiengq mehmbwk minzcuz vunznoix aeu Liengz Cuzyingh guh daibyauj de. Gyoengqde aenvih lizsij diuzgienh hanhdingh mbouj ndaej doeg saw gvaq, guekgya haenqrengz doigvangq cienzdoh saw vah doengyungh guekgya、hengzguh “cienz Bujdunghva coenghrengz guhhoengh lajmbanj”, si、yienh gak gaep minzcungh、fulenz、senhconz doengh gij bouhmonz neix gaenx guh, doenggvaq hai yezyau doengh gij guhfap neix, bang gyoengqde hag saw vah doengyungh guekgya. Ganbu capmbanj naihsim bang, gyoengqde ngamq hainduj deng bae hag, cugyamq bienq baenz gag bae hag、 gag naemj lai rox saw. Dij ndaej naeuz dwg, ganbu capmbanj mwh son saw vah doengyungh guekgya, hix gaenx hag vah minzcuz vunznoix dangdieg, rox caeuq vunzlai dangdieg gangjgoj.

Cienzdoh saw vah doengyungh guekgya, bang aenmbanj minzcuz bienqvaq lailai. Gyoengq mehmbwk mboujdan ndaej caeuq baihrog doxgyau, engq hag rox yungh vangjdoxlienz caeuq aen seiqgyaiq engq gvangq lienzciep, guhbaenz aeu gij vwnzva maenhndei minzcuz bonjfaenh nyoengx coh daengx guek caiqlij daengx seiqgyaiq.《Sing Moq》 cek saw neix aeu lwnhgangj haenqrengz duetgungz caeuq guhhoengh lajmbanj, yungzhaeuj aen dem aen benqduenh ndwenngoenz caensaed ndaej rox bae, mboujdan langhbaij gij cingzcik caensaed mwh Gvangjsih guhhong banggungz caeuq guhhoengh lajmbanj, hix yienh’ok gij yiedcingz haenqguh gak cuz vunzlai, yienjok le hag ndei saw vah doengyungh guekgya caeuq couqmaenh gij eiqsik Cunghvaz Minzcuz ranz vunz ndeu、coihaeuj swnjcienz minzcuz vwnzva、bangrengz guhhoengh lajmbanj miz yungh lailai.

Gij gojgaeq mehmbwk Vuhyingh Mbanjmyauz 《Sing Moq》 lwnhgangj haenx, gaenq yingjyangj daengz rog guek. 2025 nienz 6 nyied 19 hauh, youq gwnz Gaiq Samcib It Bwzgingh Gozci Duzsuh Bozlanjvei, 《Sing Moq》Sawyinghvwnz、Sawhanzvwnz、Sawyeznanzvwnz、Sawyinnizvwnz、Sawlaujvohvwnz haj loh banjbonj saw cingqsik fatbouh. Lai cungj vah doiok, aeu vwnzyoz daplaeb aen giuz moq Cungguek caeuq rog guek vwnzva doxgyau, hawj seiqgyaiq ndaej lai rox gij hwngfat bienqvaq dieg minzcuz vunznoix Cungguek, caeuq gij guhbaenz couqmaenh gij eiqsik Cunghvaz Minzcuz ranz vunz ndeu aeundaej haenx.

(Liz Yingzyingz Suh Gyahli)