10 nyied 17 hauh banhaemh, heiqgo minzcuz 《Liuj Liujcouh》 youq Ciet Yisuz Cungguek Gaiq Cibseiq youq Cungzging banh haenx oknaj, bouh heiq neix dwg Gvangjsih Gohvuj Giyen baizyienj. Bouh heiq neix miz gij fungcingz deihfueng Gvangjsih naekna caeuq gij yisuz lai yiengh, hawj bouxyawj yienhciengz lai roxyiuj gij yinxdaeuz seizdaih vwnzva Gvangjsih, dingq gij “yaem ak vwnzva” diegdeih Betgveiq.

《Liuj Liujcouh》 dwg Swcigih Dangjveij Senhconzbu、Swcigih Vwnzva Caeuq Lijyouz Dingh doiok, Gvangjsih Vwnzva Canjyez Cizdonz lienzhab doiok. Bouh heiq neix diuz sienqmeh dwg gij ginglig boux guen Dangzdai Liuj Cunghyenz deng gyangq guh Liujcouh swsij, lwnh de guenj Liujcouh seiq bi doengh gij guhfap gaijbienq gij yak cwngcwz、feiqcawz gij yak sibgvenq、hwngfat guhhong、doihengz gyauyuz, doenggvaq yisuz yienghsiengq cauh okdaeuj, langhbaij gij leixniemh guh guen “guen dwg hoiq minz”“aeu leih hawj minz” de. Heiqmoeg yungzhab gij yenzsu Seidangz Yozfuj Cunghyenz、fwen Gvangjsih caeuq heiqgo seiqgyaiq, aeu gij daejheiq vwnzva Cunghyenz caeuq fungcingz Bwzyez doxyungz hwnjdaeuj, hengzguh gij leixniemh yisuz “cauhyienj gaiq bonjdieg、gangjok gaiq gozci”.

Haemhhaenx Cungzging Dagiyen vunz lai vunz daih, buenx miz gij yaem’wenq gujcwngh ndeidingq, heiqgo minzcuz《Liuj Liujcouh》 hainduj yienj. Gwnz daizheiq, miz gij baijbouh daizheiq fungcingz baihbaek Gvangjsih caeuq dinfwngz gvanghyingj daihneix dox yungzhab, mboujdan hoizdauq gij yienghsiengq gaeuqgeq Liujcouh Dangzdai, youh cauh’ok gij gingqeiq yisuz gig miz seieiq. Gyoengq bouxyienj ciengq ak caeuq yienj ndeiyawj, yienjok Liuj Cunghyenz youq Liujcouh hwng guh yozdangz、cuengq bouxhoiq、guh cingjraemx、buqcawz maezsaenq doengh gij saeh neix, aeu gij cingz vih bouxminz “sim you lajmbwn、cauhfuk bouxminz” de langhbaij okdaeuj liuxliux. Mwh yienjok, Seidangz Yozfuj caeuq fwen Gvangjsih doxhab ciengq、yaem daihgeq caeuq daihneix doxyungz, diuh rwenzrwz ndeidingq, hawj bouh heiq neix mboujdan baujmiz gijndei minzcuz yinhyoz, youh miz gij rengz yisuz heiqgo daihneix.

(Sunh Yenjbungz)