“Gwz ha, gou dwg Laujlinz. Dingqnaeuz mwngz bineix daihhag bizyez lo, dou ban vunz neix geq lo, ndaw mbanj aeu miz bouxcoz daeuj ciepban cijndaej, muengh mwngz dauq ranz ne.” Ranzmbanj Laujlinz dwk denva naeuz Vuz Gwz.

“Gou naemjnaemj gonq.” Laujlinz sawqmwh dwk denva daeuj gangj gij saeh neix, Vuz Gwz mbouj rox baenzlawz guh caengj ndei, de naihsim dingq Laujlinz gangj sat le, han naeuz.

Vuz Gwz ndang sang noh hau, dwg ndaw mbanj boux lwgnyez ceiq roxsoq ndeu, de gauj ndaej daihhag seiz, bohmeh Vuz Gwz youh angq youh you, song bouxlaux ciuhvunz cij rox ngaem gyaeuj guh reihnaz, caen mbouj rox bae gyawz ra baenzlai cienz soengq lwg doegsaw.

Mwhhaenx yaek haihag lo, bohmeh Vuz Gwz lijcaengz ra ndaej cienz hawj Vuz Gwz, you dwk haemh cungj ninz mbouj ndaek.

Laujlinz dwg cunhcangj, goeng neix naj luenz bak mbaeu sim mbaeu, guh saeh maedsaed, gangj daengz guh daengz. Ngoenzhaenx banhaemh gwn caeuz gvaq le, Laujlinz daeuj daengz ranz Vuz Gwz. Laujlinz daj ndaw daeh yut ok dab cienz nanupnup ndeu daeuj, ndenq daengz ndaw fwngz Vuz Gwz, riu naeuz:“Mwngz nyinhcaen doegsaw couh baenz.”

Vuz Gwz gig doeksaet muengh coh Laujlinz, mbouj rox gangj maz ndei.

“Mwngz couh sou ba.” Laujlinz naeuz.

“Docih Aulinz.” Vuz Gwz gaemdawz gij ngaenz neix, raemxda yaek doek roengzdaeuj.

“Gaej gangj gij neix, gaxgonq ranz mwngz hix bang gvaq ranz gou ne.”

Ndaw mbanj caengz faen reihnaz daengz ranz bande, gyoengqvunz youq ndaw doih guh hong, cungj baengh goengfaen gwn ngaiz. Daxgoeng Vuz Gwz youq ndaw doih dwg boux geiq goengfaen he, daengz haemh souhong, gyoengqvunz cungj daengz canghaeux bae geiq goengfaen.

Seizhaenx daxboh Laujlinz ciengx geij duz douq bwnraez, bingzseiz couh baengh raed bwndouq gai aeu cienz cawx gyu youz. Haemh souhong haeuj ranz, boh Laujlinz lij aemq loz hwnj bya bae gvej nywj douq, lij haifwz, ndaem di doenghgo dienz dungx.

Seizhaenx, souhong dauq ranz le, cengdi haemhhaemh haihoih, danghnaeuz byawz mbouj daengz ciengz, couh mbouj ndaej geiq goengfaen, ngoenzneix couh guh hong ndwi lo. Mizseiz nyaengq lai, daxboh Laujlinz doiq daxgoeng Vuz Gwz naeuz, ndaw ranz douqmeh roengzlwg yaek ganq, lij hwnj bya bae haifwz, haemhneix mbouj ndaej bae haihoih lo, mwngz bang gou geiq goengfaen ndaej mbouj?

Moix baez yienghneix, daxgoeng Vuz Gwz cungj bang boh Laujlinz geiq goengfaen. Gvaqlaeng daxboh Laujlinz hwnj bya bae aeu mboet, doek roengz laj dat deng ga raek, hong naek guh mbouj ndaej. Daxgoeng Vuz Gwz caeuq duicangj doxyaeng, heuh boh Laujlinz guenj aen canghaeux, dak duh dak haeux, guh gij hong mbaeu neix, ranz Laujlinz gig geiqmaenh faenh cingz neix.

Vuz Gwz dwg ndaw mbanj boux daih’it bae doeg daihhag, Laujlinz yawjnaek lumj gim, de dawz gij saeh ranz Vuz Gwz dangq ranz swhgeij daeuj guh, dawz Vuz Gwz dang guh lwg swhgeij daeuj goq, gvaqlaeng youh bang ranz Vuz Gwz sinhcingj dihbauj. Vuz Gwz daengx ranz gamjdoengh dangqmaz. Ranz Laujlinz caeuq ranz Vuz Gwz couh yienghneix ciengzciengz doxbang doxcoengh.

Seizneix Laujlinz heuh swhgeij dauq ranzmbanj, naemj daengz bohmeh ciemh geq, Vuz Gwz cam dahyoux de Cauz Fangh yienghlawz guh.

Cauz Fangh dwg vunz ndawsingz, noh hau naj maeq, baez riu hwnjdaeuj, aen naj gyaeqgaeq de couh lumj aen makdauz cug gvaq nei, baenzde maezvunz, de naeuz:“Youz mwngz senj, mwngz daengz gyawz, gou gaen daengz gyawz.”

Gij vah Cauz Fangh sawj Vuz Gwz ndawsim raeujrubrub, de gietdingh daiq Cauz Fangh caemh dauq ranzmbanj.

Couh yienghneix, Vuz Gwz caeuq Cauz Fangh dauq ranzmbanj dang hakmbanj, gyoengqvunz lwnhnyaengnyaeng.

Mbangj vunz naeuz:“Ndawsingz ndei mbouj youq, dauqma lajmbanj, doegsaw lai mbouj gvai cixbah, dauq bienq ngawz lo.”

“Daihhagseng dauq ranzmbanj guh saeh, raeuz roxnyinh miznaj caeuq ndaengndiengq cij deng, faex sang cien cik mbouj lumz goek.”Hix miz mbangj vunz yienghneix han naeuz.

Diuzlinx vunz mbouj miz ndok, baenzlawz ndau cungj ndaej, Vuz Gwz caeuq Cauz Fangh mbouj leixlangh.

Seizhaenx guekgya gizgiz cungj guh cingcinj bangfuz, Vuz Gwz caeuq Cauz Fangh hix yiedsim bae guh. Hong banggungz haidaeuz lo, Cauz Fangh raen gyaeujmbanj miz ranz ndeu, naihgeq ndeu ndaej caetcib lai bi, caeuq daeglwg ga gvez de caez youq. Naih neix byoem hausaksak, buh cingh vaq seuq, vunz cungj heuh de guh Buzsien.

Buzsien beizheiq gig gaengj, ciengzciengz vih gij saeh saepsoiq caeuq vunzmbanj doxceng, ndaw mbanj dingzlai vunz deng de vet gvaq. Hoeng Buzsien baez raen Cauz Fangh couh mbouj doengz, riunyumnyum caeuq de doxdongx gangjgoj.

Baez ndeu, Buzsien riuj geij aen maenzbwn daeuj hawj Cauz Fangh, naeuz aeu daeuj cawj dang baenz gwn.

Youq lajmbanj, miz boux vunz ndeu doiq swhgeij baenzneix ndei, caiqlij gaxgonq caengz roxnaj gvaq, Cauz Fangh roxnyinh Buzsien naihgeq neix gig geizheih.

Buzsien lumj rox ndawsim Cauz Fangh naemj maz nei, riuhehe naeuz:“Dahsau, mwngz dwg vunz ndawsingz, baenzsau youh roxsaw, ndaw mbanj byawz lumj mwngz. Mwngz daeuj mbanj dou, dwg mbanj dou miz fukheiq, Vuz Gwz lwg neix caemh miz fukheiq.”

Raen Buzsien baenzneix depgaenh Cauz Fangh, miz vunz laeglemx doiq Cauz Fangh naeuz:“De guhsien guhyaz, rox fap rox fouz, cienmonz yaeuh gij dahsau, mwngz aeu re bw.”

“Gou yawj de mbouj lumj cungj vunz haenx.” Cauz Fangh riu naeuz.

Doengxhaemh dauq ranz, Cauz Fangh doiq Vuz Gwz gangj boux naihgeq geizheih neix. Vuz Gwz muengh coh gyaeujmbanj ranz Buzsien, numqnumq lwnh gij saehgaeuq Buzsien haenx.

Laxlawz, Vuz Gwz ngamq doeg cuhcungh mwhhaenx, ngoenz he haetromh, doek fwn hung. Fwn dingz le, Vuz Gwz couh bae ndaw suen mbaet byaek.

Aen suenbyaek ranz Vuz Gwz youq gyaeujmbanj, gyawj ranz Buzsien, suenbyaek ranz Laujlinz hix youq gizde, bae mbaet byaek cungj aeu byaij gvaq aen diegdangz Buzsien.

Doek fwn lohnamh niunwknwk, song din Vuz Gwz gyuek rim namhboengz, byaij gvaq aen diegdangz Buzsien, ce diuz rizdin boengz henjlamlam ndeu.

Buzsien raen le, sing hung vet naeuz:“Duz lwgndai mwngz, byaijroen hix mbouj yawjyawj neix dwg gijmaz dieg, din uq boengz hix byaij gvaqdaeuj, ngoenzlaeng mbwnrengx gou baenzlawz dak haeux!”

Vuz Gwz naeuz:“Caj gou mbaet byaek sat couh uet seuq hawj mwngz.”

“Uet ndaej seuq ngoenzneix, lij miz ngoenzcog, sou geij ranz ngoenzndit ngoenzfwn cungj gvaq aen diegdangz gou, ngoenzndit laj daejhaiz nem miz rinreq sinz haeujdaeuj, ngoenzfwn gouh haiz gyuek rim namhboengz lah doh aen diegdangz, sou miz geijlai baez uet gvaq?”

“Gou dingq bouxlaux naeuz, gaxgonq aen diegdangz mwngz mbiengj ndeu dwg diuz loh bae coh suenbyaek, mwngz ciemq caez guh diegdangz, dou mbouj miz loh byaij lo, cij byaij gizneix.” Vuz Gwz naeuz.

“Mwngz lwg fangzraq neix, mwngz luenh vab, gou euj hoz mwngz bae!” Buzsien fwngz ndeu capeiq, fwngz ndeu vix Vuz Gwz vet naeuz.

Laxlawz, gaxgonq miz diuz loh iq he hawj geij ranz vunz byaij bae suenbyaek, Buzsien guh diegdangz seiz nyengh ciemq bae caez lo. Gyoengqvunz mbouj miz loh byaij, mbouj ndaej mbouj byaij gvaq aen diegdangz Buzsien.

Vuz Gwz rox ngoenzneix nyexhux lo, mbouj caiq guhsing, nyaemh Buzsien gag vet gag dingz.

“Couh suenq gaxgonq Buzsien ciemq loh guh diegdangz mbouj deng, de seizneix saedceij hix mbouj ndei gvaq, ngoenzlawz raeuz caeuq Laujlinz bae ranz de yawjyawj.” Cauz Fangh naeuz Vuz Gwz.

Vah gangj dauqlaeng, Laujlinz youq ndaw mbanj dang daeuz seiz, cingq dwg seiz faen reihnaz daengz hoh. Buzsien naeuz Laujlinz rau reih mbouj goengbingz, rau gaiq reih gyaeujranz haenx mbouj gaeuq song faen hawj de.

Laujlinz naeuz:“Rau reih mbouj gaeuq, mbouj dwg aeu gij reih wnq bouj hawj luma?”

“Mwngz bouj hawj gij reih haenx cungj dwg reihbyom, ndaem doenghgo cungj mbouj baenz, mwngz yawjsiuj gou mehmaiq!”

Buzsien naihgeq neix maetmi hojgangj, gienh saeh neix gvaq le, Laujlinz gig noix bae ranz Buzsien. Seizneix Cauz Fangh iu bae ranz Buzsien yawjyawj, Laujlinz mizdi mbouj nyienh, hoeng youh mbouj bae mbouj ndaej.

Raen sam boux daeuz ndaw mbanj daengz ranz, Buzsien gig doeksaet. Gangjgoj yaep ndeu le, Cauz Fangh naeuz:“Daxbuz, daeglwg mwngz ga gvez, youh caengz baenzgya, mwngz hix geq lo, ranz mwngz hab banggungz diuzgienh.”

“Guekgya cwngcwz ndei, ndaej lwnz daengz bang gou couh ndei.” Buzsien muengh coh Cauz Fangh naeuz.

Laujlinz mbouj guhsing, mbon ci ien ndeu daeuj cit, dingq Cauz Fangh gyoengqde gangjvah.

Mboengqgonq ndaw mbanj couh rox, seizneix haujlai ranzgungz cungj duetgungz lo, hoeng lijmiz geij ranz diuzgienh hab banggungz caengz ndaej bang dem, Buzsien couhdwg ranz ndeu.

Miz vunz naeuz:“Buzsien cawz guhsien guhyaz, lij guhmoiz yaeuh vunz aeu cienz, de miz cienz mbouj laeuh rog, cang yiengh hojlienz.”

Dingq gyoengqvunz gangjsabsab, gij daeuz ndaw mbanj hix mbouj rox dwg caen dwg gyaj, caiq naeuz ndaw mbanj hong lai hong cab, gienh saeh neix couh yienghneix dingz roengzdaeuj.

“Gou guhsien guhyaz, bouxwnq daeuj ranz cingj, gou cij banhsaeh, mbouj dwg bae haw bae mbanj yaeuh vunz; gou guhmoiz yinx sienq hawj vunz, maqmuengh gyoengqde doxbuenx daengz gyaeuj hau. Vah ciuhgeq naeuz bau haeuj giuh mbouj bau gvaq ciuh, soqlaiz mbouj yukyon vunz doxliz. Boux dahoengz aeu rwz guh lwgda, saehndei naeuz saehyak.” Buzsien naeuz.

Vuz Gwz、 Cauz Fangh caeuq Laujlinz gwq dingq Buzsien gangj, youh caenndang daengz ranz yawjraen gyaranz de, ndawsim fubfeb mbouj dingz, gietdingh banggungz ranz Buzsien.

“Gou bak raeh sim unq, lijdwg gyoengq daeuz bouxcoz seizneix roxyiuj, dauqdaej dwg doeg daihhag okdaeuj, yawj saeh guh saeh caen hab sim vunz.” Buzsien naengbak gwq doenghyaebyaeb, lumjbaenz lij siengj gangj maz, hoeng caiq hix gangj mbouj ok saek coenz.