Bonjbauq siusik（gicej Vangz Yinz）Gaenh ngoenz neix, daengx guek sinhvwnz ingjsiengq gicej Majgwzswh cujyi sinhvwnzgvanh caeuq sinhvwnz ingjsiengq yezvu beizyinbanh youq Gyanghsuh Vuzsiz guh. Henz Daihuz, gyoengq vunzak ingjsiengq daj daengx guek gak dieg daeuj haenx doxcomz gizneix, aeu gingqdaeuz geiqloeg Vuzsiz Binhhuz Gih gij saedhengz sengdoengh gohgi cauhmoq、canjnieb swnggaep caeuq vwnzva cienzciep.

Cinghmingz Giuz Lizsij Vwnzva Gaihgih dangguh aen daizheiq 2025 nienz Yanghsi Cunhvanj Vuzsiz faenhoihciengz, aeu cien bi dahyinh guh maeg, doenggvaq suijmu gvanghyingj、cenzsiz douzyingj daengj gisuz, gig ndei yungzhab gij unqndei mbanjraemx Gyanghnanz caeuq gij lingzdoengh susw gohgi, dwg gij gejgangj “honghraemx Gyanghnanz” seizneix. Caeuq neix doengzseiz, gij canjnieb cauhmoq Binhhuz Gih doengzyiengh iengjsagsag: Siznanz Gohgi haeujsim lingjyiz guh mbaeu giceh, gij doxgaiq gvamq yazgigih cingmaed de gai daengz seiqgyaiq gak dieg; Lungzswng Sinhnwngzyenz baengh yenzgiu haifat dietsim gihdung dengih, caenx ndang hangznieb baihnaj; Luzboh Meijsuzgvanj cix doenggvaq gaijcau ranz gaeuq gunghcangj, dajcauh aen gunghgung vwnzva ndawhoeng ndeu comz langhbaij yisuz、haw doxgaiq vwnzva youq doxcaez.

Swnghdai gensez hix dwg gij ronghsaek Binhhuz. Cangzgvangjhih Diegcumx Gunghyenz doenggvaq swnghdai coihfuk laebhwnj diuz loh saekheu raez 2 goengleix, Nenhvahvanh aeu “sim seuq dieg seuq raemx seuq” guh saekdaej, dwg aen denjfan cinwngz lijyouz caeuq swnghdai youqndwi. Dahliengzhihhoz ceihleix gunghcwngz yungh gihgiyinz miz loek、damqdieg leizdaz daengj gohgi soujduenh, dwk doeng “lwedguenj” diegraemx, caiq yienh gij dozveh swnghdai “cib leix hongh veh”; Veisanh Singzgeq dwg aen “lizsij bozvuzgvanj dangdien” Vuzsiz, aeu swzdangz vwnzva、gujdenj yenzlinz lienzdaemh faenzmaeg hawsingz.

Baez hozdung caijfungh neix, gyoengq gicej doenggvaq gingqdaeuz gaep gij yaepyet gohgi caeuq swnghdai doxyungz、conzdungj caeuq yendai doiqvah, mboujdan yienh’ok le Vuzsiz gak fuengmienh hwngfat ndei, engq aeu gij rengz ingjsiengq cienzsoengq ok gij rengzhoengh cauhmoq caeuq yinzvwnz vwnhdu Binhhuz Gih. Ciengz gvanghyingj caeuq swhsiengj doxbungq neix, cingq dwg saedhengz sengdoengh sawjmingh sinhvwnz ingjsiengq seizdaih moq.

① Lijsiengj gyahyenz Segih.

② Lijsiengj gyahyenz Segih gyoengq vunzgeq baizdoih daek haeux.

③ Luzboh Meijsuzgvanj boux hekyouz daejniemh feihyiz.

④Cangzgvangjhih Diegcumx Gunghyenz hekyouz daejniemh hangh- moeg gwnz raemx.

⑤ Hekyouz youq Siujdenzmiz Nungzcangz naengh siuj hojceh.

⑥ Lungzswng Sinhnwngzyenz boiqgienh swnghcanj cehgenh.