Bet nyied cibhaj ngoenzneix, cijaeu banngoenz nditndat ndei, banhaemh, gwnz mbwn cungj venj aen ronghndwen ronghcingx ndeu, ronghndwen cix lumj aen daengloengz nei ciuq lajdeih ronghsagsag, seizneix, ranzranz cungj okdaeuj baiq ronghndwen lo.

Caengz daengz bet nyied cibhaj, ranz gou couh youq gwnz daiz baij rim gak yiengh nyiedbingj, daengx ranz hom caez. Gij nyiedbingj neix cungj dwg dou gag cawx doxgaiq bae hawj vunz guh.

Yaek daengz bet nyied cibhaj, daxmeh couh bae cawx mienhfaenj、duhdoem、lwgraz、dangzlwgfaeg、hwzdauz、begdangz daengj gij liuh guh bingj haenx daeuj cauj ndei daem soiq.

Bet nyied cibhaj song ngoenz gonq, dou couh dawz gij liuh haenx bae baizdoih hawj vunz dajbingj, lwnz daengz dou guh bingj seiz, saefouh dawz gij liuh dauj roengz ndaw bat hung bae, gya di raemx、gya di youz doengzcaez lauz yinz, boux saefouh wnq dawz mienhfaenj bae gwnz daiz caeuq dangzliuh nu ndei faen baenz aen, baiz youq ndaw buenz, doeklaeng aeu naengmienh bau ndei cuengq roengz aen vunq nyiedbingj bae nap.

“Bap” sing ndeu, aen nyiedbingj ndeiyawj ndeu couh daj okdaeuj lo. Caj saefouh daj rim buenz, caiq aeu gyaeqgaeq yaeng’yaeng cat gwnz bingj, dwk roengz ndaw sienggangq bae gangq, daihgaiq buenq lai cungdaeuz, buenz nyiedbingj rangfwdfwd ndeu gangq okdaeuj lo, caiq youq gwnz nyiedbingj ndatfoedfoed haenx cat caengz youz ndeu, nyiedbingj ndeiyawj couh guh baenz lo, henjrwgrwg, rangfwdfwd, hawj vunz myaiz lae mbouj dingz.

Nyiedbingj guh baenz, cawzliux bouxboux cimz gwn, dou lij aeu daeuj baiq ronghndwen. Banhaemh ronghndwen lij caengz okdaeuj, dou couh daengz gyanghongh baij aen daiz luenz ndeu, gwnz daiz baij rim yieng、nyiedbingj caeuq mak, dou daengx ranz naengh youq laj gofaex. Daxboh daxmeh nyaengq guh gwn, gangj gojgaeuq hawj dou dingq, goenggeq son dou ciengq go：

Bet nyied cibhaj ronghndwen rongh ya,

Goenggeq vih gou daj nyiedbingj ya,

Nyiedbingj luenzluenz van youh moq ya,

It gaiq nyiedbingj it benq cingz ya……

Singfwen youq byonghmbwn mbinyagyag, lwgnyez dawz daengloengz seiqlengq buet, dou miz gangj miz riu, doq gwn nyiedbingj doq yawj ronghndwen.

Bet nyied cibhaj ronghndwen luenz, lajdeih ranzranz gvaq ndaej ndei.