10 nyied 10 hauh, Swcigih Dangjveij youq Nanzningz hai Aen Hoih Doxyaeng Ciendaez Haenqrengz Hwngfat Gizdieg Ginghci Bi 2025, haeujlaeg doekguh baenzroix lwnhgangj youqgaenj gvendaengz gizdieg ginghci hwngfat caeuq gij iugouz youqgaenj gvendaengz lwnhgangj hong Gvangjsih Siz Ginbingz cungjsuhgi, dingq gij yigen genyi haenqrengz hwngfat gizdieg ginghci gak minzcuj dangjbai、gunghsanghlenz、boux daibyauj mbouj miz dangjbai, caezcaemh doinyoengx gih raeuz gizdieg ginghci hwngfat ndei saed, haenqrengz ok goengrengz Gvangjsih coengh gij yendaiva yiengh Cungguek roengzgiek maenhdwd. Swcigih Dangjveij suhgi Cinz Gangh cujciz aen hoih caemhcaiq gangjvah. Swcigih Dangjveij fusuhgi、Swcigih cujsiz Veiz Dauh camgya haihoih caemhcaiq gangjvah.

Cinz Gangh daegbied gangj daengz, hwngfat gizdieg ginghci aeu daj goek gaijgez ndei aen vwndiz “naemj mbouj naemj guh”, caen gikfat gij rengz ndaw ganbu gizdieg guh saeh cauhnieb, baengh gagrox caeuq dangrap haenqrem, gag naemj diuzroen gizdieg hwngfat, gaenx maeuzveh gij banhfap gizdieg ndaej hwngfat, haenqrengz doinyoengx gizdieg ginghci mboujduenh haicauh buenz moq. Aeu niujdawz cungdenj gaijgez ndei aen vwndiz “guh gijmaz”, caezcingj cinjdeng doekguh gij leixniemh hwngfat moq liuxliux, sojmiz daj gij saedsaeh gizdieg haidin, dawzmaenh diuzroen “ciuq saed dingh geiq、 hwngfat gijndei, canjnieb hwng yienh、fouq minz demsou, swnghdai cuk giek、singz mbanj yungzhab”, lai gotdawz aen seizdaih yinzgungh cinwngz, doinyoengx it ngeih sam canjnieb yungzhab hwngfat, hawj engq lai vunz youq bakdou couh miz hong guh, faenloih doinyoengx hwnqguh hawsingz yienghmoq, haenqrengz cauhlaeb aen gwzgiz moq gizdieg ginghci daegsaek ronghsien、gijndei doxbouj、rengz doxceng ak. Maqmuengh gak minzcuj dangjbai、gunghsanghlenz caeuq boux mbouj miz dangjbai lai yungh gijndei lienzhaeh gvangq lai、dungxcaiz ak, laebdin dieg hong bonjfaenh, gaemdawz seizgei hwngfat, gaenx gangj coenz miz yungh lai ok banhfap, lai ok goengrengz doinyoengx Gvangjsih gizdieg ginghci hwngfat ndei saed.

Veiz Dauh daegbied gangj daengz, aeu lai rox doinyoengx gizdieg ginghci hwngfat youqgaenj caeuq gaenjgip, lai yungh gijndei、guhbaenz ndei rwix doxbouj, yungh ndei gijndei diegvih caeuq cwngcwz gih raeuz, yungh ndei gij swhyenz ndei aen’aen yienh, caez dingh aen gviveh gizdieg canjnieb hwngfat, “aen yienh aen banhfap” ciuq saed dingh geiq doinyoengx baenaj, dajcauh buek canjnieb ndei gizdieg miz rengz doxceng ak ndeu; aeu dawzmaenh sam canj boiqhab、saekloeg hwngfat, aeu lohnaemj guh gunghyez bae guh nungzyez, doinyoengx nungzyez “ciep ngeih rangh sam”, guhbaenz it ngeih sam canjnieb yungzhab laegdaeuq, gyavaiq cienjyiengh baenz saekloeg hwngfat liuxliux, guhbaenz rangh comz canjnieb gizdieg dox boiqhab raenhamq haenx; aeu gyaak ciu canghseng’eiq daeuj roengz cienz, dawzmaenh bouxdaeuz ciengzseiz ciu canghseng’eiq, gangj ndei gij gojgaeq Gvangjsih, ciuyinx hanghmoeg giyez ndei doekdieg majrag、haiva dawzmak; aeu yungh ndei aen yenzgih, guhlaeg “dieg biucinj+yiengh wngqcingz+bang banh caez” gaijgwz, laebdaeb daezswng fugsaeh yauqnaengz、cungbyoengq gizsaek roengzgoek giyez, gikfat rengzhoengh hawciengz ndei’ndi、hawjrengz gizdieg ginghci hwngfat; aeu gaem ndei aen seizgei dinghguh hengzguh gizdieg ginghci “cauh daeuz ceng ndei” sam bi hengzdoengh fueng’anq, lai gyalai caizcwng haeujcoengh, laebcaez aen gihci gaujhaed gikleih, gungganq engqlai gizdieg miz gij ak, doenggvaq aen yienh ak byaij gonq ragdoengh gak aen yienh baenaj.

(daj 《Gvangjsih Yizbau》 aeu daeuj genj hoiz Loz Canghlieng Gungh Vwnzyingj)