Seizgan lumj raemx lae,

Bongh bae vaiqvidvid,

Yaepda daengz ndwencib,

Gvaqbae gip dangqmaz.

Ndwencib ngoenz daihdaeuz,

Guek raeuz ndaej caetroek,

Daj laebguek heij goek,

Caetroek hopbi daengz.

Ngoenzseng guekcoj raeuz,

Wnggai aeu geiqmaenh,

Raeuz miz gwn miz daenj,

Geiqmaenh ngoenzseng de.

Laebguek caetroek bi,

Miz angq miz danqheiq,

Guekcoj miz ngoenzneix,

Saedcaih mbouj yungzheih.

Mwhgonq Cungguek gaeuq,

Vunz ukgyaeuj mbouj gvai,

Gueklig doeklaeng lai,

Ngaiz vunzrog daeuj haep.

Bazgoz Lenzginh bing,

Sien ginggvaq Denhcinh,

Caiq hoenx haeuj Bwzgingh,

Dawz cungq couh nyingz vunz.

Gyoengqde lumj mabag,

Rag vunz youh ciengj ngaenz,

Dub bouq aen dem aen,

Faen ngaenz dwk roengz daeh.

Yizbwnj vunz ceiq doeg,

Raen vunz couh moeb dai,

Daengz couzyah vunzsai,

Bae haujlai diuzmingh.

Raeuz daengx guek lwgminz,

Gwn ninz youq mbouj onj,

Vihliux ndang ndaej fonj,

Gonq laeng daeuq mbouj dingz.

Daj laeb guek moq daeuj,

Raeuz haeujsim gaijgwz,

Guh saeh miz fucwz,

Gaijgwz ndaej swnhleih.

Bouxguen caeuq beksingq,

Caezsim gauj ginghci,

Yied ngoenz yied bienq ndi(ndei),

Ginghci hoenghhwdhwd.

Ginghci gauj ndaej hwnj,

Caiq hwnqguh gozfangz,

Guekrengz ndaej daezsang,

Gozfangz aeu maenh’ak.

Guekcoj raeuz maenh’ak,

Vunzyak haep mbouj you,

Miz vunz daeuj hoenx raeuz,

Aeu de dai roengz namh.

Mwngz yawj gwnz seiqgyaiq,

Baih vunz luenhumhum,

Mbouj gangj naeuz donqgwn,

Dai hwnz lawz mbouj dingh.

Mwhneix youq lajmbwn,

Haujlai vunz doxhaep,

Lumj duzma doxhaeb,

Aenmbwn laepnyamnyam.

Giz vunz cungj hoenxciengq,

Mbiengj baihdoeng bingzan,

Gyoengq Cungguek lwglan,

Bingzan ciuh dam ciuh.