Mboengqneix, youq Fungsanh Yen Gyanghcouh Yauzcuz Yangh Sienghih Cunh dieggoek ciengx gaeq, 25 aen rungzgaeq baij youq ndaw ndoeng, gaeqndokndaem bwnq lwenqyubyub youq laj faex baebae dauqdauq. Boux ciengx gaeq baez heuh, baenz cien duz gaeq couh comz daeuj, nauhyied raixcaix. Baengh aen vunqsik “dangjgen+hozcozse+cunh cizdij+nungzhu”, aen yangh neix yungh ndei gij swhyenz cuengq ndwi、cuengq gijndei swnghdai okdaeuj, hawj youq laj ndoengfaex ciengx gaeqndokndaem baenz aen canjnieb miz daegsaek guhhung cunh cizdij ginghci、ragdoengh bouxguhnaz laisou.

Aen dieggoek ciengx gaeq- ndokndaem youq ndoenglaeg neix, yienznaeuz dieg bienbik, hoeng swnghdai vanzging ndei. Bineix 2 nyied, Sinhhauz Dajndaem Dajciengx Ciennieb Hozcozse co 25 aen rungzgaeq cuengq ndwi Sienghih Cunh, caeuq Swconh Ginhveih Dajciengx Nungzminz Ciennieb Hozcozse doxgap, cingqsik hainduj youq ndaw ndoeng ciengx gaeqndokndaem.

Sinhhauz Dajndaem Dajciengx Ciennieb Hozcozse bouxfucwz Loz Funglingz gaisau, youq goekfaex dajciengx guhbaenz “ndoengfaex—gaeq—bwnh—nywj” aen hop swnghdai ndei. Daengz seizneix, dieggoek cuengq 13 fanh duz gaeqlwg gvaq, ndawde gai ok 4 fanh duz, gungh ndaej ngaenz 176 fanh maenz; seizneix miz 9 fanh duz.

Canjnieb hwngfat riengjret, liz mbouj ndaej aen vunqsik “dangjgen+hozcozse+cunh cizdij+nungzhu” cengjdingx maenhdwd. Aen vunqsik neix, gak baih faen goeng mingzbeg、dox boiqhab gaenjmaed: Swconh Ginhveih Dajciengx Nungzminz Ciennieb Hozcozse son dinfwngz、 banhleix swhciz caeuq baujdaej soudauq huq; Sinhhauz Dajndaem Dajciengx Ciennieb Hozcozse caeuq cunh cizdij doxcaez fucwz guenjguh; nungzhu doenggvaq caeuqfaenh dajciengx、guhhong doengh gij neix yungzhaeuj canjnieblienh bae.

“Dou gunghawj dinfwngz、swzliu, caemhcaiq guhndei baujgyaq soudauq, baujcingq boux doxgap ndaej ngaenz, guhbaenz bouxboux ndaej hingz.” Swconh Ginhveih Dajciengx Nungzminz Ciennieb Hozcozse bouxfucwz Linz Cinyuz naeuz. Ngaenzcienz faenboiq fuengmienh, dieggoek laebbaenz aen cidu faenboiq ngaenzcienz cunh cizdij, ei okcienz lai noix faenhoengz, guhhung cunh cizdij ginghci souhaeuj; caemhcaiq fat gaeqlwg hawj nungzhu bang ciengx, caiq baujgyaq soudauq, hawj nungzhu youq bakdou ranz couh ndaej leih.(Yaz Hanzliengz Lanz Denhyangz)