译文：

第十 四期

原文：

1941年5月7日，日军集结十余万重兵，动用百余架飞机、数百门重炮，发动了对中条山的猛攻。东线、北线、西北线友军相继溃退，唯西线寸性奇部如定海神针，死死顶住日军的狂攻。

战至10日正午，寸性奇右腿被炸伤，但他看也不看，只管指挥战斗。在率军冲锋中，他胸部与左肩中弹，腰部负伤，已不能行走。营长李振邦见他伤势很重，请求带兵守护。寸性奇挥手要李振邦等迅速突围，说：“毋以我累。”

13日晨，中条山的炮火撕裂了黎明，寸性奇以重伤之躯，指挥余部冲出胡家峪。后至毛家湾阵地上，又遭日军重重拦截，炮火猛烈，夺路不得。寸性奇左腿被炮弹炸断，血染焦土。深知最后的时刻来临，他拒绝拖累部下，从容自戕，壮烈殉国，将四十六载的生命，献给了中条山的抗日烽火。1942年，寸性奇被当时的国民政府追晋为陆军中将。

早在战云密布的5月初，他已写下给妻子罗树勤的绝笔信：“受命驻防以来，早已将中条山视为殉国之处，自无所惧者。余战死于此，正是军人所应承职责，一生戎马征战，能为国战死，即为余之幸事，可无憾此生矣。”

信中对年近九旬老父的牵挂、对妻儿清贫度日的愧疚，字字锥心，却更衬托出他为国捐躯的决绝：“身后抚恤金悉数捐献国家……吾家本是家徒四壁，汝等度日之难，余何尝不知，然而今日国难未止，汝等惟有艰苦以度日。”——新华每日电讯3版 要闻《寸性奇：为国战死，无憾此生》（节选）

It

1941 nienz 5 nyied 7 hauh, Yizbwnj ginhdui doxcomz cib fanh lai bing ak, doenghyungh bak lai gyaq feihgih、geij bak aen bauqhung, youq Byacunghdiuz fatdoengh liux ciengz gunghoenx haenq he. Youq rangh baihdoeng、baihbaek、baihsaebaek gyoengq ginhdui doengzdoih cungj doxriengz baihdoiq, cij miz baihsae aen ginhdui Cun Singgiz couh lumj gaenj saenzcim dingh haij nei, maenhmaenh dingj youq dangqnaj gunghoenx haenq bing Yizbwnj.

Hoenx daengz 10 hauh banngoenz, Cun Singgiz ga gvaz deng caq sieng, hoeng de yawj hix mbouj yawj, cijguenj cijveih hoenxciengq. Youq daiq bing bae cungfung seiz, bakaek caeuq mbaqswix de deng lwgyienz dwk deng, gizhwet hix dengsieng, gaenq byaij mbouj ndaej. Yingzcangj Lij Cinbangh raen de sieng gig naek, cingjgouz daiq bing baujhoh de. Cun Singgiz vad fwngz heuh Lij Cinbangh gyoengqde vaiqdi cung ok gvaenghhumx bae, naeuz:“Gaej deng gou ragnangq.”

13 hauh haetromh, mbwn lij momj, ciengz ciengq haenq he youh youq Byacunghdiuz hoenx hwnjdaeuj, Cun Singgiz ndang gaenq deng sieng naek, lij cijveih gij bing lamq roengzdaeuj haenx cung ok Huzgyahyi bae. Doeklaeng cung bae daengz cindi Mauzgyahvanh, youh deng bing Yizbwnj caengzcaengz lanz hwnjdaeuj, bauqfeiz haenq dangqmaz, cung okbae mbouj ndaej. Cun Singgiz ga swix deng yienzbauq caq raek, lwed nyumx namhremj. De rox sengmingh swhgeij daengz seiz doeklaeng lo, de mbouj nyienh ragnangq vunz lajfwngz, couh soengyungz gaggaj, canglez vih guekgya vutmingh, dawz diuz mingh seiqcib roek bi de, yienh hawj ciengz ciengq youq Byacunghdiuz dingjhoenx Yizbwnj neix. 1942 nienz, Cun Singgiz ndaej gozminz cwngfuj mwhde gyaepswng daengz luzginh cunghcieng.

Senq youq ngux nyied cogaep yaek hoenxciengq gaxgonq, de gaenq sij fung saenq doeksat cehawj yah de Loz Suginz: “Daj ciep minghlingh souj dieg neix daeuj, gou senq couh dawz Byacunghdiuz yawj guh dieg vih guekgya vutmingh haenx, ndigah mbouj miz maz lau. Gou youq neix hoenxciengq dai, cingq dwg gij cwzyin bouxbing wnggai raphwnj haenx, ciuhvunz gou dawz cungq hoenxciengq, ndaej vih guekgya vutmingh, couh dwg gij saeh dijndaej gou angq guh haenx, ciuhvunz gou mbouj miz maz doeknaiq lo.”

Ndaw saenq cix gvaqniemh daxboh gyawj goujcib bi haenx, ndawsim doiq lwg yah gwn haemz gwn hoj gvaq saedceij haenx gig mbouj gvaqeiq, cihcih coeg sim coeg saej, dauq engq yienjok gij simgenq de vih guekgya vutmingh haenx:“Gij ngaenzfujsiz guekgya hawj haenx cungj gien hawj guekgya caez……Ranz raeuz yienzbonj couh dwg hojndoq, sou gwn haemz gwn hoj, gou baenzlawz mbouj rox ne, hoeng seizneix gueknanh caengz gvaq, gyoengqsou cijndaej gwn haemz gwn hoj gvaqngoenz lo.”

（平果市：李雄章/Lij Yungzcangh）

Ngeih

Bi 1941 ndwen 5 ngoenz 7 hauh，bing Yizbwnj gyoebcomz cib fanh lai bing ak，yungh bak lai gyaq feihgih，geij bak aen daihbauq，haenqmengx gunghoenx diegbya Cunghdiuzsanh. Youxginh youq doengsienq、baeksienq、saebaeksienq gaenlaeng deng dwkloemq，dan miz bing Cun Singgiz youq saesienq lumj saenzcim dingh haij nei，gaenjmaenh dingj bing Yizbwnj gunghoenx.

Daihhoenx daengz ngoenz 10 hauh banringz，gaiqga baihgvaz Cun Singgiz deng caq sieng，hoeng de yawj cungj mbouj yawj saek da，cij goq cijveih candou. Cingq youq mwh daiqlingx bing doxhoenx，bakaek caeuq mbaq baihswix de ngaiz bikmax nyingz deng，gizhwet deng sieng，gaenq mbouj naengz byaij le. Lij Cinbangh yingzcangj raen gijsieng de gig youqgaenj，cingjgouz dawz bing soujhoh. Cun Singgiz vad fwngz aeu Lij Cinbangh vaiqdi loemjhumx okbae，naeuz:“Mbouj ndaej aenvih gou deng lienzlih gij bing lw.”

Ngoenz 13 hauh，yienzbauq caq dek le gyanghaet diegbya Cunghdiuzsanh，Cun Singgiz yienznaeuz ndangdaej souhsieng, vanzlij cijveih bing lw cung ok dieg Huzgyahyi. Doeklaeng daengz cancangz Mauzgyahvanh，youh deng bing Yizbwnj caengzcaengz daengj dangqnaj，daihhoenx cingq haenqmengx，ciengjciemq roen bae mbouj ndaej le. Gaiqga baihrwix Cun Singgiz deng yienzbauq caq goenq，doek youq cungqgyang namh remjratrat, lwedyaeng’yaeng. Gig roxndeq mwh ciuhvunz ceiq byai yaek daengz lo，de mbouj hawj bonjfaenh lienzlih bing wnq，mbouj gaenj mbouj menh gaggaj，vih ndawbiengz daimingh，aeu seiqcib roek bi sengmingh，soengq hawj aen daihhoenx fanjgang Yizbwnj Cunghdiuzsanh neix. Bi 1942，Cun Singgiz deng aen gozminz cwngfuj mwhde gyaepgya daezswng baenz luzginh cungciengq.

Senq youq ndwen 5 hainduj hoenxciengq fwjbumz hoenzlaep seiz，de gaenq sij fung saenq ciedbit ndeu hawj baz de Loz Suginz：“Ciepsouh aen sawjmingh youq dieg neix fuengzre gvaqdaeuj，senq gaenq aeu Cunghdiuzsanh yawjbaenz dieg dai vih guek，gou mbouj lau gijmaz. Vih guek hoenxciengq dai youq gizneix，cingq dwg aen cwzyin bouxbing wngqdang dawzrap haenx，ciuhvunz guh bouxbing hoenxciengq ndeu，ndaej dai vih guek，hix dwg ciuhvunz gienh saeh ceiq vuenyungz ndeu，mbouj miz gijmaz hojsik le.”

Gawq vah ndaw saenq gvaqsim daxboh geq yaek goujcib bi、najmong doiq lwgyah haemzhoj gvaq saedceij，coenzcoenz coeg sim，wngq dwg gangj ok aen gietsim de vih guek soengq ndang：“Gou dai gvaqlaeng ndaej gij ngaenz fujsiz cungj gien hawj guekgya……Ranz raeuz yienzbonj dwg aen ranz gungzgeuj ndeu，mwngz caeuq daeglwg daengj hojnanz gvaq ndwenngoenz，gou cungj roxndeq，hoeng seizneix guekgya lij souhhaemz souhhoj mbouj cij，gyoengqsou cijndaej dwgrengz gvaq ndwenngoenz lo.”

（西林县：黄锋克/Vangz Funghgwz）

Sam

Bi 1941 ndwen 5 ngoenz 7, bing Yizbwnj gyonj bingnaek cib lai fanh, yungh bak gyaq feihgih、bak lai aen bauqlaux, doiq Cunghdiuzsanh fathwnj gunghoenx. Gyoengq bing doxbuenx sienqdoeng、sienqbaek、sienqsaebaek gaenlaeng baihsat, cij miz bouhdoih Cun Singgiz sienqsae lumj diuz cim dingh haij ndeu, buekmingh daemx gunghoenx bing Yizbwnj dwk.

Hoenx daengz banringz ngoenz 10, Cun Singgiz ga gvaz deng caq sieng, hoeng de yawj goj ndi yawj, cijguenj yeixvad hoenxciengq. Mwh daiq bing bungh bae, aek caeuq mbaq swix de deng nyingz, hwet deng sieng, byaij ndi ndaej gvaq. Yingzcangj Lij Cinbangh raen gijsieng de naek lai, gangjnaeuz daiq bing youq baengx ganq. Cun Singgiz vad fwngz aeu Lij Cinbangh daiq vunz cung okbae heihhumx, naeuz:“Gaej hawj gou nangq sou.”

Ngoenz 13 haetromh, feizbauq Cunghdiuzsanh nyingz gvaq mbwn ronghlwenj, Cun Singgiz aeu meh ndang deng sieng haenq haenx, yeixvad bouhlw cung ok Huzgyahyi. Doeklaeng youq dieghah Mauzgyahvanh, youh deng bing Yizbwnj caengzcaengz laengz dwk, feizbauq haenqmengx, dued roen ndi ndaej. Cun Singgiz ga swix deng bauqdan caq raek, lwed nyumx namhremj. Rox dingh mwh doeksat daeuj daengz, de ndi sij nangq lajfwngz, soengyungz gaggaj, vutmingh vih guek, aeu aen mingh seiqcib roek bi, soengq hawj Cunghdiuzsanh gij hoenxciengq dingj Yizbwnj. Bi 1942, Cun Singgiz deng cingqfouj guekminz mwhde gyaepswng guh cungciengq loeggun.

Youq ndwen 5 co, de senqseiz raiz fung saenq doeksat hawj maex de Loz Suginz:“Daj souhmingh youqsouj doxdaeuj, senqseiz yawj Cunghdiuzsanh guh dieg vutmingh vih guek, cix ndi lau lawz lu. Gou hoenxdai gizneix, cingq dwg gij rap bouxbing, ciuhvunz dajciengq, ndaej vih guek vutmingh, gou cix angq lai lo, ciuh neix hix ndi gwnheiq maz lo.

Ndaw saenq raiz doh gvaqsim daxboh yaek goujcib bi、najmong doiq lwg yah gvaq ndwenngoenz haemzhoj, sawsaw camx sim, dauq engq boiq ok aen gietsim vih guek vutmingh de:“Daengzcog gij ngaenzboiz haenx gyonj gien hawj biengz raeuz……Ranz raeuz coengzlaiz gungzhoj, gyoengqsou gwnhaemz souhhoj, gou baenzlawz ndi rox, hoeng raq neix gueknanh caengz sat, gyoengqsou cij miz dwgrengz gvaq ndwenngoenz.

（上林县：覃彦龙/Cinz Yenlungz）

（8）