It

Daeggyong caeuq Daeglaz dwg vunz caemhsaemq, dwg ranznden. “Caen gyae mboujyawx ranznden”, aen dauhleix neix byawz cungj rox. Mwhgonq, song ranz vunz de mbouj dwg vunzcaen cix caen gvaq vunzcaen, doxhuz caemh gvaq ndwenngoenz. Hoeng sam bi neix daeuj, songde baenz bouxcaeuz. Caeuz daj gizlawz daeuj ni?

Bihaenx mbwn rengx, raemx ndaw suijgu mboek yaek daengz daej, hai cin lo, suijli ceizceiz mbouj hai raemx roengz suijgu, bouxdajndaem ciuq seizgei roengz haeuxceh, go’gyaj baenz ndaem lo, suijli lij caengz daeuj raemx, naz mbouj ndaej cae mbouj ndaej rauq, gyoengq bouxdajndaem simgaenj lumj duz maed ndaw cauq ndat nei. Cunhcangj caeuq suijgu doxyaeng, suijgu naeuz ndaej hai raemx, mboujgvaq cij hai haj ngoenz. Haj ngoenz neix, vunzmbanj doxceng aeu raemx haeuj naz rauq naz ndaem naz.

Cib lai ngoenz gvaqbae, go’gyaj ndaem roengz naz haenx heu lo, seizneix suijgu caiq hai raemx baez moq, hoeng cij hanh hai sam ngoenz. Vunzmbanj youh doxceng aeu raemxnaz. Diuz mieng gvangq song mij、laeg mij ndeu haenx, aeu coq bak lai moux naz, neix couh lumj youq diuz suijguenj ndeu hai lai aen suijlungzdouz nei, yied roengz- bae raemx yied noix, daegbied dwg mieng duenhbyai, raemxmieng ca di goenq bae, hawj vunz simgaenj.

Naz Daeggyong caeuq naz Daeglaz doxnem, mbe gwnz mbe laj, cungj youq duenhbyai miengraemx, aeu raemxnaz caen dwgrengz. Daeggyong gyanghwnz bae aeu raemxnaz, banngoenz vunz lai, doxceng mbouj gvaq vunzlai, banhaemh vunz noix di, mbe naz de moux ngeih, de souj baenz sam aen lai cungdaeuz cij aeu ndaej doh, maeuq daengz ga naet hwet gengj liux, mbouj souj youh lau ngaiz vunz dimz miengnaz.

Hai raemx ngoenz doeksat, Daeggyong bae cunz naz, mbouj cunz mbouj rox, baez cunz doeksaet yat, raemxnaz hawq liux, de gig geizheih, riengz haenznaz cazyawj, caen raen aen congh ndeu, congh neix hung lumj lwgdinmeh, deng nya haenznaz hoemq dwk, mbouj sijsaeq yawj, caen yawj mbouj raen. Raen yienghneix, de hozndat dwk saihoz yaek dek bae, de dawz faggvak gwnz mbaq roengz, “bo” sing ndeu, bak gvak vat aeu ndaek naez ndeu, yaek dimz aen congh, hoeng, de lumj fwt siengj daengz maz ni, daengx fwngz roengzdaeuj, yawj doenghnaz gvangqlangh neix da ndeu, giz mbouj gyae haenx, Daeglaz cingq yiengq baih neix byaij daeuj, aiq dwg daeuj cunz naz.

“Lauxlaz, mwngz vaiq di gvaqdaeuj.” Daeggyong vad fwngz hemq.

Daeglaz laihnaeuz miz maz saeh ndei, buetdedded gvaqdaeuj.

“Mwngz daeuj yawj, banneix nienzgeij, cungj saeh rwix neix mwngz hix guh ndaej ok!”

“Gou mbouj rox mwngz gangj maz vah, neix mbouj dwg congh nou ma?”

“Congh nou? Congh nou baenzneix ruemj?”

“Bak congh mbouj dwg miz gij riz nou vat ma? Cixdwg mbouj mingzyienj ajmah.”

“Congh neix haengjdingh dwg mwngz aeu daengx dongj! Caeg raemxnaz gou.”

“Mwngz gaej vahdoeg haih vunz!”

……Songde mwngz coenz gou coenz doxdingj, doeklaeng doxmoeb. Caeuz couh yienghneix daeuj lo.

Ngeih

Song ranz baihlaeng cungj miz aen suenbyaek iq ndeu, song aen suen doxdemq, aeu lagcuk daeuj humx, sang daengz hwet vunzlaux, neix dwg fuengz duzgaeq duzmou haeuj suen gwn byaek. Ndaw suenbyaek Daeggyong miz go maksigloux ndeu, maj youq baih haenz dep suenbyaek Daeglaz, go neix aiq miz cib bi mak lo.

“Ciuciu” sing hung sing iq, Daeglaz cingq gaem liemz laet gij ngez gomak iet gvaq baih suen de daeuj haenx.

“Vei vei, raemj gomak gou guhmaz ne? De git mwngz maz ni?” Daeggyong hat naeuz.

“Ngazfaex famh gvaq baih gou daeuj, lij naeuz mbouj git gou dem.” Daeglaz han.

Go mak neix bibi baenzmak, gawqgonq song ranz caemh gwn, coengzlaiz mbouj miz byawz haeujsim de “famh gizlawz” , seizneix miz caeuz le, yawj maz cungj gitda.

Sam

“Gok gok gok” raq sing gaeq swenj ndeu daj suenbyaek Daeggyong cienz daeuj, cungj sing neix baez dingq couh rox gaeq deng vunz gyaep dai. Daeglaz okdaeuj yawj, cij raen duzgaeq swhgeij deng Daeggyong gyaep, aeu rin dat, aeu daengx gveng, yaek gvangj duzgaeq dai bae, duzgaeq saet hwnj saet roengz, ra roen deuz mbouj raen.

“Hei hei, gyaep duzgaeq gou guhmaz ni?” Daeglaz swenj hemq.

“Duz maz haeuj suenbyaek daeuj cungj ngaiz dai!” Daeggyong naeuz.

“Danghnaeuz duz gaeq gou sieng, gou mbouj cuengqgvaq mwngz bw!”

……

Gawqgonq, doenghduz haeuj suenbyaek, byawz cungj dwg hozswnh laeh okbae couh baenz lo, mbouj yunghcaiq moeb gaeq dai bae.

Seiq

Ngoenzneix, duzma ranz Daeggyong lumj bingzseiz nei soengyiedyied byaij haeuj bakdou ranz Daeglaz daeuj liuh. Seizneix Daeglaz cingq naengh gwnz sahfaz yawj densi, raen duzma haeujdaeuj, de vazmuengz duet ga’haiz lajdin gveng coh duzma:“Mboujcinj daeuj ranz gou, dawz ngoenh mwngz, dauqbae ranz mwngz!” Ga’haiz mbouj bien saek di, cingq dat deng najbyak duzma, lij sinz ok rogdou bae dem. Duzma “vang vang” swenj, baenq gyaeuj deuz lo.

Gijneix deng Daeggyong yawjraen, de cingq youq bakdou ranz swhgeij san loz, “yo yo” de heuh duzma dauqbae. Duzma sikhaek buet daengz henzndang de, gungj hwet baet rieng coh bouxcawj, singdaemq “vang vang” gongz, aiqdwg cam bouxcawj: Cawjranz ranznden vihmaz moeb gou? Daeggyong mo diuzhoz duzma naeuz: Baezlaeng gaej bae ranz de.

“Boh, mwngz caeuq duzma daeuqheiq, caen dwgriu!” Daeglwg Daeggyong naeuz.

“Mwngz rox maz ne?”

“Gou rox, mwngz dwg caeuq daxau ranznden daeuqheiq. Di saeh iq ndeu, miz maz baenz daeuq ni? Hajcib lai bi vunz lo, lij lumj lwgnyez nei maij daeuqheiq. Gawqgonq song ranz vunz doxhuz doxcoengh, caemhyouq baenzneix cwxcaih. Seiz- neix, ngaiz sou loengh ndaej najnyed liux, song boux cawjranz sam haj ngoenz ‘doxmbaenq’, dou guh lwgyah baez raennaj roxnyinh hojyouq dangqmaz!”

“Gou hix mbouj siengj yienghneix guh, hoeng, de……”

Haj

Ngoenzneix dwg ngoenzhaw. Caen dwg lohgaeb doxbungz, Daeggyong Daeglaz doengzseiz daengz diegcajci henz roen. Songde lumj song duz daekdaeq ngamq doxdaeuq ngamq sat nei, naj heu hoz saengh， songde gag cienq naj dauq mbiengj ndeu, ndwn deq cihek.

Ci daengz lo, daengx roengzdaeuj, aen gyaeuj bouxhaici iet ok conghcueng daeuj naeuz: Cij lw aen vih ndeu, cijnaengz boux ndeu hwnj ci.

Daeggyong ciengj gonq yamq ndeu bongh bae coh douci, hoeng, Daeglaz da raeh fwngz riengj nengh de dauq, songde mwngz nengh gou doeg, byawz mbouj nyiengh boux, yied daeuj yied haenq…… Bouxhaici raen yienghneix, anj lo, naeuz deq sou luklik dem! Ci hai bae lo, songde lij youq dieg haenx doxnengh……

“Gung laeng gaeng laeng” raq sing coegrwz ndeu cienz daeuj, aen cihek daxbaenh songde cungj mbouj ndaej dap haenx, youq giz mbouj gyae boek roengz laj dat bae……

Songde riengz sing yawj bae, moegsaed, bak ajloengloeng. Haemq nanz, songde lij doxrag, yaepyet, youh yawj bae giz ci boek, ngawzngwnh yawj dwk, yaep he caemh sing naeuz: Ciuhvunz dinjdet mbouj ndeindei gvaq, daeuq maz ni? Gangj sat mwngz bongx mbaq gou, gou bongx mbaq mwngz……

Daj ngoenzde hwnj, song ranz vunz doxhuz doxndiep lumj gyaeuh.