9 nyied 18 hauh daengz 21 hauh, Gaiq Daih Cibngeih Fei Yaudungh Yozsuz Swhsiengj Yenzdaujvei youq Laizbinh guh, aen hoih youz Sanghaij Dayoz cawjbanh, Minzmungz Gvangj- sih Gihveij、 Laizbinh Siveij Dungj- canbu、 Laizbinh Si Minzcunghveij、 Ginhsiu Yenveij、 Minzmungz Sang- haij Sihveij —— Sanghaij Dayoz Fei Yaudungh Yozsuz Swhsiengj Yenzgiu Cunghsinh daengj danhvei ciepbanh. Yenzdaujvei aeu “byagim raemxgyaeu · ndeindei caemhdoih” guh cawjdaez, 90 lai boux conhgyah yozcej gauhyau、 mizgven danhvei lingjdauj daj ndaw gih rog gih daeuj Laizbinh doxcomz, geiqniemh Fei Yaudungh sienseng hainduj haeuj mbanj diucaz Dayauzsanh 90 hopbi, gyaepra rizdin yozsuz Fei Yaudungh sienseng, damqra gyauhliuz gij yenzgiu cwngzgoj caeuq gij gyaciz dangdaih yozsuz swhsiengj de, coenghrengz dieg minzcuz henzguek engq ndei hwngfat.

Aen hoih yungh gij hingzsik “cawj yenzdaujvei + 6 aen diuyenz lwnhgangj” bae guh. Gwnz hoih, gyoengq conhgyah Cunghyangh Dangjyau、 Cunghgoz Sevei Gohyoz Yen、 Bwzgingh Dayoz、 Cunghyangh Minzcuz Dayoz、 Sanghaij Dayoz、 Gvangjsih Gij Eiqsik Cunghvaz Minzcuz Ranz Vunz Ndeu Yenzgiu Yen faenbied gangj vah, gyoengq conhgyah yungzhab ndei gij yozsuz swhsiengj Fei Yaudungh caeuq gij hong saedguh couqmaenh gij eiqsik Cunghvaz Minzcuz ranz vunz ndeu, neiyungz miz swhsiengjsing caeuq yienhsaed gyaciz, vih doidoengh hwnqguh Cunghvaz Minzcuz ranz vunz ndeu dwk roengz lijlun giekdaej maenhsaed.

6 aen diuyenz lwnhgangj cix faenbied hopheux cawjdaez “Fei Yaudungh caeuq Minzmungz” “dauqyawj caeuq haigvangq yozsuz yizcanj Fei Yaudungh” “gij meg swnj ciuhneix diucaz Dayauzsanh” “gij minzcuz lijlun caeuq saedguh Fei Yaudungh” “gij lijlun caeuq saedguh couqmaenh gij eiqsik Cunghvaz Minzcuz ranz vunz ndeu” “‘song bya’ lijlun caeuq gij saedguh yendaiva yiengh Cungguek Dayauzsanh”, gij conhgyah yozcej daj gak dieg daeuj haenx faenyiengj yenzgiu cwngzgoj、 gyauhliuz gingniemh saedguh, haeujlaeg damqcaz.

Hai hoih gaxgonq, gyoengqvunz cam hoih daengz Vujsenh Yen Dunghyangh Cin dieg gaeuq Gveicungh Daih’it Cihbu、 Siengcouh Yen Yin’gyangh Singz Ciuhgeq、 Siengcouh Yen Bwzcang Yangh Mbanjbwzcang、yienhciengz canj meijsuz cozbinj Minzmungz mungz- yenz geiqniemh Fei Yaudungh haeujmbanj diucaz 90 hopbi daengj dieg diuyenz, dauqcungz byaij diuz roen Fei Yaudungh sienseng haeuj- mbanj diucaz, saeddeih gamjsouh Laizbinh Si gij hwngfat bienqvaq minzcuz vwnzva baujhoh cienzciep、 lajmbanj saenqhwng daengj fueng- mienh.(Se Liengzyij/谢梁雨)