9 nyied 16 hauh, Aen Yenzsizyingz Son’gyauq Vunzcaiz Cingjleix Caeuq Okbanj Sawgeq Sawndip Daengx Guek（Geiz Ngeih） hai yingz yizsiz youq Gvangjsih Minzcuz Dayoz guh sat.

Baez yenzsizyingz neix iucingj Guekgya Minzveij Minzcuz Vwnzvagungh Duzsuhgvanj、Sanhdungh Dayoz、Anhveih Swngj Senhcwngz、Gvangjsih Minzcuz Dayoz doenghgij lauxhangz ndaw guek mizmingz caeuq boux guhhong coihfuk sawgeq、cingjleix Sawndip soqcihvaq daeuj hwnjdangz, hopheux gak minzcuz doxbyaij doxgyau doxyungz ndaw sawgeq minzcuz、cingjleix caeuq yungh bei ndaw daengx aen sijliu caezcaemh Cunghvaz Minzcuz、fuengfap cingjleix caeuq guh fanhoiz sawgeq Sawndip、yungh dinfwngz moq cingjleix okbanj sawgeq minzcuz vunznoix、faensik anqlaeh baujhoh sawgeq、loeghaeuj caeuq baizbanj Sawndip doenghgij neix, bae yenzgiu hagsib, maqmuengh ndaej lai guhhung aen doih yenzgiu cingjleix sawgeq Sawndip, son’gyauq boux vunzcaiz sawgeq minzcuz caeuq sawgeq Sawgun rox caez. Miz lauxhangz yozcej mizgven gauhyau caeuq gohyenz yensoj、bouxbien gak cuzbanjse、bouxfucwz danhvei guhhong souyo sawgeq、aen doih sawgeq minzcuz vunznoix Gvangjsih “haj aen doih” daibyauj ca mbouj lai 100 boux camgya.

(Cangh Sinhyiz Liuj Yinzlungz Cwnz Yizsenz)