9 nyied 21 hauh, Gaiq Daih 22 Cungguek—Dunghmungz Bozlanjvei youq Nanzningz hai sat. Gicej daj aen hoih fatbouh saehmoq Gaiq Daih 22 Cungguek—Dunghmungz Bozlanjvei roxyiuj, gaiq dunghbozvei neix hopheux cawjnieb、hopheux Dunghmungz、hopheux raenhamq, baez nduj haicauh aen ciengzgingj canjvei gvai moqsag, guhbaenz le gaiq hong yawhgeiz cwngci vaigyauh gveihgwz sang、AI guh cawjgiek、giyez guh daeuz sam aen fuengmienh, aeu “AI hamzliengh” doenghbaez caengz miz gvaq bae coenghrengz doinyoengx cauhlaeb aen minghyinh caezcaemh Cungguek—Dunghmungz engq gaenjmaed de.

Gaiq dunghbozvei neix langhbaij najdieg 16 fanh bingzfanghmij, laeb dieg langhbaij daeuz Nanzningz caeuq dieg langhbaij baeyouz Gveilinz, comz 60 aen guekgya 3260 aen giyez camgya langhbaij. Ndawde, dieg langhbaij daeuz Nanzningz najdieg 10.2 fanh bingzfanghmij, giyez camgya langhbaij 1910 aen; seiqgyaiq baihnaj 500、Cungguek baihnaj 500、giyez mizmingz doenghgij giyez daibyauj neix 432 aen, lai gvaq gaiq gonq 7.5%; Dunghmungz daengj dieg langhbaij najdieg ciemq 30%, giyez Dunghmungz 627 aen、ciemq 32.8%, Dunghmungz camgya langhbaij najdieg caeuq gveihmoz youq ndaw guek canjvei laebdaeb baujmaenh daih’it. Miz 1.1 fanh lai aen giyez、mauhgvaq 3 fanh boux daengz dieg dajcawx.

Gaiq dunghbozvei neix miz haj aen daegdiemj：

It dwg miz dungxcaiz lai. Gaiq dunghbozvei neix AI hawjrengz guh langhbaij guh hoih liuxliux, haimuqsik AI diemjrongh lailai、dieg ciemmonz langhbaij AI hawj vunz gyaez, yienghsaeh AI hawj vunz haeujrwz, canjvei hawj vunz miz roxnyinh moq.

Ngeih dwg gaiq moq lai. Gaiq dieg langhbaij neix gveihva gaemdawz fuengyiengq gag cauhmoq, baez nduj laeb aen guenj gij swnghcanjliz akmoq、dieg langhbaij ginghci saeklamz、dieg langhbaij huqndei vaimou, doenghgij huq moq、dinfwngz moq、fugsaeh moq lailanglang, hawj vunz yawj mbouj rox sat.

Sam dwg youqgaenj lai. Engqgya yawjnaek saeddaej ginghci hwngfat gangjgouz, haenqrengz lai hawj giyez daeuj camgya langhbaij camgya haihoih roxnyinh ndaejdaengz, gaenx doinyoengx dunghbozvei daj binjbaiz bienqbaenz baizgim. Fatbouh cek sawbeizlamz 《Gij Baugau Deqmuengh Ginghmou Doxgap Cungguek—Dungh- mungz(2025—2026)》； guh yiengh- saeh doxgangj ginghmou doxgap Cungguek—Dunghmungz、yienghsaeh doxgaiq langhbaij bingzsenj、yienghsaeh baenzroix doxgaiq moq oknaj baez nduj, doenghgij huq moq、dinfwngz moq neix fatbouh ciuyinx haujlai giyez caeuq canghseng’eiq haeujrwz、camcaz、doxyaeng, giyez miz engq lai seizgei haigvangq hawciengz.

Seiq dwg habhoz lai. Yienh’ok coh moq coh saed, laebdaeb cauhmoq gak hangh banhfap fugsaeh saeddaej ginghci, guhndei aen liuzcwngz bauq banh cingqgienh; baez nduj gunghawj 200 aen gih fanhoiz dawz ngaih hawj canghseng’eiq Cungguek caeuq Dunghmungz doxdoeng mbouj gazngaih, baez nduj youq veicanj cunghsinh guh yienghsaeh ciet angq “youq Dunghmungz gwn”; “veicanj+” baeyouz ciepdaih doengh gij fugsaeh neix, hawj canghseng’eiq daeuj camgya langhbaij camgya haihoih roxnyinh daengz dunghbozvei lienzdaemh baenaj.

Haj dwg haeujrwz lai. Cawjlouz meizdij ndaw guek rog guek lai bauqlwnh gaiq dunghbozvei neix, gungh miz 25 aen guekgya caeuq gizdieg 170 aen meizdij gihgou、1700 lai boux gicej daeuj caijfangj.

Gwnz hoih lij lwnh Gaiq Daih 23 Dunghbozvei seizlawz guh, cobouh dinghyouq bicog 9 nyied 17 hauh daengz 21 hauh, Feihlizbinh yaek guh aen guek cawjdaez, Cangzcunh Si guh “aen singz yinxdaeuz Cungguek”.

(daj 《Gvangjsih Yizbau》 aeu daeuj genj hoiz Vangz Cing)