Seiz daengz ndwensam, rumznamz raeujrub, gingjsaek ndaw doengh ngoenz mbouj doengz ngoenz. Gou riengz gyoengq mehmbwk diuq foux haenx gwih denceh hwnj roen Gozdau 325, ganj bae Ginhcouh Dasw Cin Mbanjnazbouq. Gyoengqde yaek bae camgya aen hozdung ciengq go diuq foux angqhoh “sam nyied sam”, heuh gou bae bang ingj siengq. Mbanjneix bibi ndwensam cungj guh hozdung, nauhyied dangqmaz.

Ngamq saek ngeihcib faencung, dou couh hamj gvaq gyaiq yenzlaiz Yunghningz Yen daeuj daengz Mbanjnazbouq baih Ginhcouh neix lo. Aen dougvaengh bakmbanj dwg ganghginh suijniz cuk baenz hungloet moqsak, baihgwnz geij cih Sawgun “Mbanjnazbouq” saekgim haenx gig angjda, hoeng mbouj miz Sawcuengh buenx yawj hwnjbae miz di dandiuh. Seizneix, gou yawj coh ndaw nya henz roen miz gaiq baizsuijniz gaeuq ndeu, coij Sawcuengh coij Sawgun lij raen cingcing cujcuj, doxdaengh dangqmaz. Ndaw mbanj ranzlaeuz daengjcupcup, dajcang biegsisi, aen ranz vwnzva hozdung cunghsinh guh ndaej gyaqciq raixcaix.

Dou bouxboux cungj rox Mbanjnazbouq miz goeng feibyoem ndeu heuhguh Lauxleix, doenghbaez de cungj daeuj Mbanjgorenh dou feibyoem hawj vunz. Lauxleix daj Mbanjnazbouq bin ndoi hamj gyaiq daengz Mbanjgorenh feibyoem haujlai bi lo. Mbanjgorenh gvi Yunghningz Yen guenj, Mbanjnazbouq cix haeuj baih Ginhcouh guenj, song mbanj gek ndoi sang lueg laeg, seizneix miz roen gvangq ndei byaij, gwih denceh yaep he couh ndaej bae daengz, hoeng doenghbaez Lauxleix dawzrap nungjnungj nangjnangj, gyaeuj ndeu dawz siengfaex hung, gyaeuj wnq denz、 riep、 buhvaq, ndij diuz roen iq hwnj ndoi roengz lueg, byaij baenz ngoenz cij daengz.

Ndaejgeiq mwh lij iq, Lauxleix ndwenndwen cungj aenqseiz daengz Mbanjgorenh, youq laj goreiz gyaeuj mbanj, baij aen daengqgieg sang ndeu, daenj gaiq dox wenjyub ndeu hawj vunz, daengx mbanj vunzsai caeuq lwgnyez gag baizdoih deq feibyoem, fei ndaej le bongxbongx ndang couh deuz lo, cungj mbouj raen saek boux hawj ngaenz gvaq. Ndawsim lwgnyez dou cungj nyinhnaeuz, Lauxleix dwg bouxvunz lajmbwn ceiq ndei ndeu, bi daengz byai bang vunz feibyoem mbouj aeu ngaenz. Doeklaeng cij rox, laxlawz dwg aen swnghcanjdui dou byaibi cij daengxheij ok ngaenz hawj Lauxleix.

Youq ciengxgwq gwn haeux cizdij yinzminz gunghse haenx, vunz lajmbanj bouxboux cungj dwg bouxguhhong ndaw doih, mbouj ndaej gag guh laeuq ngaenz. Lauxleix okranz bae guh feibyoem, dingqnyi naeuz dwg ginggvaq bouxdaeuz mbanjde doengzeiq cijndaej okbae, laeuq ndaej ngaenz mbouj dwg haeuj daeh de bonjfaenh, deng gyau hawj doih ndaw mbanj bae. Mbanjnazbouq vunz lai reihnaz noix, dan baengh dajndaem guhgwn saedcaih hoj lai. Bouxdaeuz de gvai, raen Lauxleix miz gij dinfwngz feibyoem cojcienz roengzdaeuj haenx, couh baij de okbae daengz geij aen mbanj iq ranghdieg henzgyaiq Yunghningz guh feibyoem, vih ndaw doih doz lai di ngaenz, ndaw doih geiq goengfaen hawj de, bau ranz de baen ndaej haeuxgwn. Gwnz mbaq de, mboujdan dwg diuzrap bang vunz feibyoem, engq dwg diuzrap ceng’aeu “demsou” hawj aen doih mbanj de.

“Seizdaih yamq baenaj, haemz gvaq rox baenz van, reihnaz baen daengz ranz, aen cang haeux rimrad.” Daih cizdij gaijsan bihaenx ndwen ceiq doeksat, gyoengqdou deq dwk byoem raezsauz hix mbouj raen Lauxleix daeuj bang fei, daj haenx hwnj vunzmbanj byoem raez le cungj dwg gag bae gwnzhaw fei lo. Gyoengq lwgnyez dou Lauxleix feibyoem majhung neix, mwh baez daih’it haeuj bouqfeibyoem bae feibyoem, deng gag mbon daeh aeu ngaenz hawj canghfeibyoem, roxnyinh caen mbouj gvenq, saek boux lij gae naeuz: “Lizsij daenq lo! Gij fukleih feibyoem mbouj deng ngaenz raeuz mbouj miz lo.”

Gij goengfou Lauxleix, mbouj dwg dan rox feibyoem, de lij gig rox gangjgoj. De doq feibyoem doq gangjgoj, gangj baenz roix vah ndei dingq, gangj gij saeh iq lajmbanj, gangj gij saeh moq gwnzhaw, gangj gij lunzlij daudwz ndawbiengz, lumj raemxmboq liengzsisi, sawj vunz ndaej gaij mbwq siu naiq, daengx ndang soengswt. “Cedced cedced”, fagfei youq ndaw fwngz de baez hai baez nap, byoemgyaeuj doek roengzdaeuj sadsad, gyoengq vunz baizdoih deq feibyoem haenx yaep angq yaep riu. Gij vah de ak gvaq rumz cin rumz raeuj, sawj vunz simsangj dangqmaz. Ndawsim Lauxleix lumj miz bonjbouh geiq coh vunz yawj mbouj raen ndeu, daengx mbanj vunzsai caeuq lwgnyez, ndwen fei baez, coengzlaiz mbouj raen lauq saek boux gvaq. Danghnaeuz fatyienh byawz caengz ndaej fei hix ra mbouj dawz vunz, de couh cam: “Goloeg bae gizlawz guhhong ni?” Rox vunz youq doenghnaz lawz le, de couh sikhaek riuj hongdawz couh bae. Laj ndit daengngoenz, gyaeuj haenznaz, vunz raeuz naengh yietnaiq, Lauxleix saeujsaeuj gaiq dox le daenj haeuj laj hoz de, lumj cw doh doengh gij saeh nyap saeh nyuk. Riengz dwk gij sing fagfei yiengj “cedced cedced” haenx, nem gij singheuh cwzvaiz youq gizgyae, nem gij singhemq goep gvej swenj gyonj doxcaeuq, doengzcaez ciengq ok hot fwen rwenz rwz ndeu.

Lauxleix bae bau Gorenh、 Gocueng、 Doengzgoet、 Nazbaiz、 Dakdien、Giuzdoem geij aen mbanj henzgyaiq nyuenz Yunghningz haenx feibyoem. Fei sat aen mbanj ndeu le couh cienj roengz aen baihlaj, lwnz mbat ndeu aeu buenq ndwen lai seizgan. Gwn ninz couh youq ranz vunzmbanj doq lwnz doq bae. De caeuq ranzranz cungj sug, haeuj ranz lawz bae cungj lumj haeuj ranz bonjfaenh. Saek seiz de gietdingh youq ranz neix gwn haeuxcaeuz, bouxlaux guhhong caengz dauq, couh bae daengq gij lwgnyez cingq guhcaemz haenx naeuz: “Nuengx iq, haemhneix gou youq laeng mwngz gwn caeuz, mwngz roxgeiq lai roengz faenh haeux ndeu bw!” Lwgnyez baez nyi couh doq han doq diuqyekyek baema caux feiz cawj caeuz lo, ndawsim angq gvaq maz bae. Aenvih Lauxleix bae ranz de gwn haeux, ranz de couh ndaej baengh mbawdan bae laeng bouxbaujgvanj ndaw doih lingx buenq gaen gyaeqbit caeuq buenq gaen duhdoem daeuj dakdaih! Gij doenghyiengh neix, doiq gij lwgnyez mwhhaenx nanznanz mbouj raen donq noh daeuj gangj, gaenq dwg donq “byaekndei fungfouq” ndeu lo. Mwh Lauxleix youq ranz gou gwn haeux, de haengj haenh bohmeh gou: “Baiqfug sou lai lo, son ndaej lwgnyez nyaenx gvai, geij boux lwg mwngz gwn haeux coengzlaiz mbouj yungh dawh bae cauq byaek ndaw banz. Gou bae nyaenxlai ranz gwn haeux, mbouj raen lwgnyez ranz lawz baenzneix roxsoq.” Gangj ndaej dou geij beixnuengx sim angqfwngfwng, ndawhoz raeujrubrub. Bohmeh gou caemh riuhehe, feiz ndaw bakcauq ingj dwk fajnaj unqswnh gyoengqde miz di ronghnding.

Aen hozdung ciengq go diuq foux Mbanjnazbouq banh ndaej hoenghhwdhwd, mwh sanq ciengz, gyoengq vunzlai deuz baema foenxfoenx, gou cix caengz gaenj baema, fwtfat siengj yaek bae cunz aen ranz Lauxleix mbat ndeu. Ndaej bouxlaux ndaw mbanj dazyinx, gou daeuj daengz naj bakdou aen ranzlaeuz sam caengz ndeu, boux hai dou dwg daeglwg Lauxleix, heuhguh Daeggiengz, daihgaiq roekcib lai bi, byoemgyaeuj yaek hau caez lo. De heuh gou haeuj ranz bae naengh, daj ndaw gvih dawz ok bau doenghyiengh baengz duk ndeu, baenz caengz baenz caengz hai okdaeuj, baihndaw gawqyienz dwg fagfei gaeuq dou sug haenx! Aen gaenz henjndaem, bakfaenz miz di hwnj myaex, daengx gaiq caemrwgrwg, lumj duz cwz geq bang vunz dajcae dajrauq baenzciuh baeg dai nei.

Daeggiengz naeuz:“Daxboh mwh yaek gvaq, lij nam naeuz doiq mbouj gvaq gyoengq beixnuengx geij mbanj baih Yunghningz haenx, din get mbouj ndaej bae bang daihgya feibyoem baez ceiq doeksat……” Gou iet fwngz yaeng’yaeng lumh fagfei, roxnyinh lumj miz di ndatraeuj iemq haeuj byai lwgfwngz daeuj, cienz doh daengx ndang gou. Neix aiq dwg gij raeujndang Lauxleix doenghbaez, roxnaeuz dwg gij ndat nditdak doenghbaez!

Biek Daeggiengz le, mbwn gaenq haeujhaemh, gij lohdaeng daiyangznwngz ndaw mbanj aen riengz aen rongh hwnjdaeuj. Gou nyeux gyaeuj yawj doxdauq, raen gij ronghdaeng gaenq veh ok yiengh moq Nazbouq, gyaeundei raixcaix. Hoeng ndaw sim gou cix miz di doeknaiq. Rumzhaemh ci gvaq, gou cungj roxnyinh ndaej nyi gij sing fagfei “cedced cedced” haenx. Gaiq baizsuijniz gaeuq geij cih Sawcuengh “Mbanjnazbouq” haenx, lij ciuqyiengh dinghdingh youq gizhaenx daezsingj vunz. Fagfei gaeuq Daeggiengz lij yo ndaej ndeindei haenx, cix lumj diuz cim raez aen cung hwnj myaex, ciengxlwenx dingz youq giz swnghcanjdui doengzcaez guhhong haenx mbouj rox byaij lo.

Gwih denceh itloh dauqma, gij faex gij ndoi myox ndaw laep daenq vit gvaq baihlaeng bae fwdfwd. Gij vit gvaq baihlaeng bae haenx, dwg diuz roen iq hwnj ndoi roengz lueg, dwg aen seizdaih fwzfwd, dwg duenh lizsij vunzlai doengzcaez gwn haemz deng hoj.

Gij sing fagfei yiengj “cedced cedced” haenx, yienznaeuz mbouj caiq ndaej nyi, hoeng rongh ronghndwen lij ciuqyiengh ciuq gwnz ndoi、 doenghnaz、 aen mbanj、 gwnz roen ronghsagsag.