9 nyied 11 hauh daengz 12 hauh, Swcigih Minzcunghveij cujdiuyenz daengz Majsanh Yen diuyenz gij cingzyauq hong couqmaenh gij eiqsik Cunghvaz Minzcuz ranz vunz ndeu caeuq cingzgvang hwngfat ginghci sevei minzcuz yangh daengj.

Cujdiuyenz gonqlaeng daengz Lijdangh Yauzcuz Yangh、 Gujcai Yauzcuz Yangh、 Gujlingz Cin Mbanjduhbwz、 Gujlingz Yinzminz Fazdingz daengj dieg, doenggvaq saeddieg cazyawj、 dingq veibau、 lwnhgangj gyauhliuz daengj fuengsik, ciengzsaeq roxyiuj Majsanh Yen gij cingzgvang hong couqmaenh gij eiqsik Cunghvaz Minzcuz ranz vunz ndeu、 cingzgvang hwngfat ginghci sevei minzcuz yangh caeuq seizneix hwngfat gizlawz nyieg gijmaz vwndiz yaek aeu gaijgez daengj. Cienz gij iugouz mizgven guenjleix hozdung guh ciet ceiq moq guekgya caeuq swcigih, dazyinx Lijdangh Yauzcuz Yangh aeu baez bungz cib hopbi neix guh seizgei, nyinhcaen maeuzveh caeuq hwnqguh buek hanghmoeg vih yinzminz banh saedsaeh ndeu, coicaenh minzcuz yangh engq vaiq hwngfat.

Cujdiuyenz cungfaen haengj- dingh gij cingzcik couqmaenh gij eiqsik Cunghvaz Minzcuz ranz vunz ndeu caeuq doidoengh minzcuz yangh ginghci sevei hwngfat Majsanh Yen. Doengzseiz iugouz, aeu haeujlaeg hagsib gvancez gij swhsiengj youqgaenj gvendaengz gyagiengz caeuq gaijndei hong minzcuz、 gij iugouz youqgaenj lwnhgangj gvendaengz hong Gvangjsih Siz Ginbingz cungjsuhgi, aeu couqmaenh gij eiqsik Cunghvaz Minzcuz ranz vunz ndeu guh sienqmeh, doiqciuq 《Hengzdoengh Fangh’an》 swcigih hwnqguh gih guhyiengh couqmaenh gij eiqsik Cunghvaz Minzcuz ranz vunz ndeu, hopheux gij muzbyauh yinvu “haj aen suenranz”, gaengawq saedsaeh、 doedok daegsaek, hagdangz、 lajmbanj、 segih、 giyez daengj gak dieg aeu cujdung guh、 soujcingq cauhmoq, engq ndei doidoengh hwnqguh gih guhyiengh couqmaenh gij eiqsik Cunghvaz Minzcuz ranz vunz ndeu byaij laeg byaij saed; laebdaeb doidoengh minzcuz digih ginghci sevei hwngfat, coicaenh gak minzcuz “sam gyau”, mboujduenh daezswng gak cuz ginzcung roxnyinh muenxeiq、 roxnyinh vuenyungz caeuq ancienz, vih hwnqguh couqmaenh gij eiqsik Cunghvaz Minzcuz ranz vunz ndeu okrengz. （Dou Dacenz/窦大全）