Gangj daengz Sawcuengh, Gou youq Sihlinz Cangyau hag gvaq sam ndwen, daengz banneix gou cungj mbouj lumz.

Seizgan gvaqbae caen vaiq, yaeb da couh gvaqbae seiqcib sam bi lo. Bi 1982, gou daengz Sihlinz Cangyau hag Sawcuengh, yienzlaiz naemj bae hag dauq le couh son gyoengq vunzlai ndaw mbanj Sawcuengh, byawz liuhdaengz hag dauqma liux ngamq bungq daengz baen reih baen naz, haujlai vunz nyaengq bae guhhong, daj gyanghaet nyaengq daengz gyanghaemh, gwn caeuz liux couh daengz byonghhwnz cib diemj, miz boux lawz bae hag Sawcuengh dem? Gvaqlaeng gou bae gienq gyoengq vunzlai daeuj hag gvaq, vunzlai cungj mbouj dawzhaeujrwz. Yienghneix, gou cijndaej cuengq Sawcuengh youq henz, roengzrengz bae guh hongreih hongnaz lo.

Bi 2020, gou gyahaeuj Sihlinz Yen Nazlauz Nungzminz Vwnzyozse, vwnzyozse miz haujlai saw, gou caiq dauq daengz seizdaih mwh doegsaw lo, gou lumj bya raen raemx, daengx ngoenz mboet youq ndaw ranzsaw. Miz ngoenz ndeu, gou raen gwnz congz secangj Vangz Civeij miz bonjsaw Sawcuengh 《Sam Nyied Sam》 ndeu, gou gig geizheih, nanzdauh secangj de rox Sawcuengh? Yienghneix gou couh cam secangj, secangj riu le naeuz:“Geij bi gonq gou gag hag Sawcuengh, daengz banneix gaenq fat haujlai cozbinj, mwngz naemj hag lwi?”

Secangj gangj baenzneix, youh caiq diemjdawz gij feiz ndaw sim gou. Yienghneix gou couh lwnh gij saeh geij cib bi gonq gou hag gvaq Sawcuengh haenx hawj secangj nyi. Secangj angq raixcaix, de doiq gou naeuz:“Goliengz，mwngz ndaej hag gvaq miz giek, dauq daeuj menhmenh bae un, itdingh gig vaiq couh hag rox. Seizneix, 《Gvangjsih Minzcuz Bau》 hawj gaujfei maqhuz lai bw, mwngz hag ndei le caemh douzgauj sawqsawq ba.”

Dingq de baenzneix naeuz, gou angq raixcaix, danhseih，gwqde gij saw hag Sawcuengh cungj ra mbouj raen lo, doeklaeng secangj hawj gou bonj 《Gihcuj Sawcuengh》 ndeu，gou angq raixcaix, daj baezde hwnj gou couh menhmenh un Sawcuengh.

Ndaej saw daengz fwngz le, gou ngoenzngoenz guh hong ma ranz yietnaiq seiz，couh dawz saw daeuj doeg daeuj sij，gou ngeix：Cijaeu mbouj lau baeg, mbouj gik, ciengzseiz doegdoeg sijsij，itdingh ngoenz beij ngoenz rox lai.