Geij bi neix daeuj, Nazboh Yen laebdin gij saedsaeh dieg minzcuz henzguek, cauhmoq guh caezhwnq dieg saekhoengz、caezyungh swhyenz saekhoengz、caezbanh yienghsaeh saekhoengz, doinyoengx couqmaenh gij eiqsik Cunghvaz Minzcuz ranz vunz ndeu haeuj simvunz.

Caezhwnq dieg saekhoengz, cukmaenh gij giek doxgiet. Gaijcauh hwnjmbaek Nazboh Yen Lezsw Lingzyenz、Denhciz Gozfangz Minzbingh Sausoj doengh gij dieg saekhoengz neix, guhndei giekdaej sezsih. Cauhmoq aen gihci caezhwnq “cwngfuj giyez hagdangz”, yungh aen vunqsik doxgap “1+N”, caeuq 4 aen giyez youqgaenj bonjdieg ciem hezyi doxgap, youq dieg giyez laeb aen dieg langhbaij “gojgaeq henzguek”“gak minzcuz caezcaemh hwngfat” doengh gij neix, guhbaenz swhyenz caezyungh、gijndei doxbouj. Caemhseiz, caeuq daengx yienh 22 aen cunghsiujyoz laebbaenz “aen lenzmungz guh son’gyauq saek- hoengz”, aeu 12 aen dieg son’gyauq saekhoengz gvihaeuj hagdangz dangz swhcwng bae.

Caezyungh swhyenz saekhoengz, gietcomz gij rengz doxgiet, hwnqlaeb aen fungh dangjanq saekhoengz daengx yienh gyonjcomz, cingjleix 20 lai dieg dieggaeuq saekhoengz、1000 lai gienh swhliu saw doz gwzming vwnzvuz, doenggvaq langhbaij、guh sibinz gangjgej、yaenq cek saw senhconz doengh gij fuengfap neix cienzboq hawj vunzlai; caeuq Cingsih Si caeuq Yinznanz Swngj Vwnzsanh Bouxcuengh Myauzcuz Swcicouh Funingz Yen daengj dieg gapgyaiq doxcaez guh gij yienghsaeh “dauq byaij loh Hungzginh” 12 baez; gapbaenz senhgyangjdonz “bien’gvan hoengz” youz 16 boux ganbu geq gapbaenz haenx, gangj Vahcuengh、Vahmyauz bae lwnhgangj 80 lai ciengzbaez.

Caezbanh yienghsaeh saek- hoengz, ung laeg gij cingz doxgiet. Nazboh Yen dajcauh gij binjbaiz “saekhoengz+”, aeu gij saeh vunzlai haengj dingq gyaez yawj haenx doinyoengx son’gyauq minzcuz doxgiet guh laeg guh saed. Mwh ciet youqgaenj, roengzsim guh baenzroix yienghsaeh “cingmingz caeq yinghlez”“gozging gyo’mbaiq dangj” daengj, bineix duenh ciet cingmingz, ciuyinx gak cuz vunzlai caeuqfaenh caeqbaiq 3.2 fanh vunzbaez.

(daj 《Yougyangh Yizbau》 aeu daeuj genj hoiz Nungz Siujhanz)