Mboengqneix, ndaw guek bouh nduj sawsonhag yijvwnz daihhag cawjdaez dwg “couqmaenh gij eiqsik Cunghvaz Minzcuz ranz vunz ndeu”——《Sawsonhag Cawjdaez Couqmaenh Gij Eiqsik Cunghvaz Minzcuz Ranz Vunz Ndeu：Yijvwnz Daihhag》 cingqsik okbanj. Cek sawsonhag neix dwg Bwzgingh Swhfan Dayoz gyausou Cwng Gozminz、Sinhgyangh Dayoz gyausou Liuz Cwnggyangh doxcaez cawjbien, youz Bwzgingh Yijyenz Dayoz Cuzbanjse okbanj.

Couqmaenh gij eiqsik Cunghvaz Minzcuz ranz vunz ndeu dwg diuz sienqmeh hong minzcuz dangj seizdaih moq, hix dwg diuz sienqmeh gak hangh hong dieg minzcuz, gauhyau dangguh dieg son’gyauq couqmaenh gij eiqsik Cunghvaz Minzcuz ranz vunz ndeu ndawde dieg ndeu, rapdawz mbaqrap son vunz guh ndei. Geij bi neix daeuj gauhyau doinyoengx “gocwngz swhcwng” caeuq “swhcwng gocwngz” dox boiqhab, aeu couqmaenh gij eiqsik Cunghvaz Minzcuz ranz vunz ndeu gyonjhaeuj mwh guh sonhag bae, hoeng sawsonhag mizgven yijvwnz lijdwg hoengqhang. Aen daihhag neix doiok sawsonhag yijvwnz, ndaej bouj gij hoengq neix.

Cek sawsonhag neix bienraiz hopgaenj gaiq hong gauhyau son vunz, yenzcwz dwg “swhcwng yijvwnz doxyungz、lwnhgangj lijlun haeujgyawj ndwenngoenz”, doenggvaq 16 aen danhyenz neiyungz, gvendaengz cawjdaez “couqmaenh” liux, nangq- daengz lai fuengmienh, cauhlaeb daengx aen roxyiuj caezcaemh. Mwh cuknet hagseng yijvwnz suyangj doengzseiz, dazyinx hagseng nyinhrox gij lizsij gihyinh caeuq cingsaenz baihndaw Cunghvaz Minzcuz.

Dij ndaej haeujrwz dwg gij saedguh Gvangjsih、gojgaeq Gvangjsih couqmaenh gij eiqsik Cunghvaz Minzcuz ranz vunz ndeu hix ndaej sou haeuj ndaw cek sawsonhag neix. Gvangjsih dwg aen dieggagguenj daengx guek gyaeujvunz siujsoq minzcuz ceiq lai, daj geq daengz neix, Gvangjsih gak minzcuz doxbyaij doxgyau doxyungz gojgaeq haeujlaeg simvunz. Sawsonhag senj aeu bien faenzcieng 《Dangh Hoenxciengq, Heuh Yaek Dauq》 lwnhgangj gij saehsaed akmaenh Vajsi Fuhyinz dingjhoenx Yizbwnj, langhbaij aen sim dingjmaenh caeuq cingsaenz doxgiet bouxminz gak cuz Gvangjsih youq gwnz lizsij caez dingj baihrog ciemqfamh; 《Boux Ndaej “Caetit Yinhcangh” Vangz Vwnzsiu：De Aeu Sengmingh Lwnhgangj Gij Seizcoz Ceiq Gyaeu》 cix lwnhgangj gij saehsaed boux ganbu maenhndei Bouxcuengh Vangz Vwnzsiu, yienh’ok le bouxcoz Gvangjsih daihneix haenqrengz mbouj soeng bae coenghrengz guhbaenz Cunghvaz Minzcuz fukhwng hungmbwk; 《Go Byadah Gveilinz》 yungh cihsaw gyaeundei veh ok byadah gyaeundei Gvangjsih, hawj hagseng roxnyinh gij gyaeu swhyienz Gvangjsih doengzseiz, roxnyinh daengz Cunghvaz vwnzva youh gvangq youh laeg.

Ciuq cam rox, bineix haggeiz seizcou, Sinhgyangh Dayoz、Hozsih Yozyen doengh gij gauhyau dieg minzcuz neix daiqdaeuz hainduj yungh cek sawsonhag neix. Cograwz, cek sawsonhag neix yaek bang gauhyau lai dazyinx hagseng bouxcoz gyaak “haj aen nyinhdoengz”, bangrengz gungganq bouxmoq seizdaih rapdawz rapnaek minzcuz fukhwng.

(Veiz Yingjcinh)