Bunz riep baengzndaij daxdaiq daemj haenx, ce ndwi baenz ngeihcib lai bi. Mboengqgonq cingjleix aen’gvih, mehyah yiemz de ciemq dieg, nyenghdingh yaek vut bae, gou gienq bae gienq dauq buenqngoenz, de cij nyienh louzce.

Bunz riep baengzndaij neix aeu naengndaij rag baenz sei nu baenz mae cij daemj baenz. De cocat, nanwt, bunz ndeu miz cib lai gaen naek. Aenvih de naekna, duenghrumrum, din riep cungj ndaej depgaenh seiqhenz mbonq, duznyungz haeujbae mbouj ndaej. Mae’ndaij geh iqmaetmaet, doeng rumz gig ndei, seizhwngq duznyungz mbinnyaengnyaeng, hix mbouj roxnyinh daengz oemhwngq mbaetheiq.

Mwh bohmeh gou gietvaen, daxdaiq caenfwngz daemj bunz riep baengzndaij neix guh buenxhaq. Bunz riep baengzndaij neix buenx bohmeh baenz ciuhvunz, couh lumj gienh buhdiet nei, caih fagnaq baenzlawz nyingz cungj dwk mbouj byoengq, geij cib bi lumj ngoenz ndeu vaiqvit, couh baenzneix venj ndaej maenhmwd, coengzlaiz mbouj byoengq gvaq vaih gvaq, itcig daengz song bouxlaux gvaqseiq.

Doengh bi haenx, ndaw ranz miz bunz riep baengzndaij ndeu, caen dwg miznaj lai lo, roxnaeuz dwg cungj loqsiengj ndeu. Ndaejgeiq dwg bi 1987, gou boux dangzgo ndeu gietvaen, beixnangz riengz sing loxlez aendoih couxcin, loq mizdi najmong yamq ok aendou ranzmeh, byaij daengz byonghroen, caeuq gyoengqvunz couxcin gangjgoj, dingqdaengz dangzgo mbouj guh riep baengzndaij, de song diuz ga gyaengjgyat, ning mbouj ndaej lo. De naengh roengz gwnz namh bae, faj naj de laepnyamnyam, lij miz geij caek raemxda laelili. Vah van vah unq lox geij aen cung, caj daengz cienz daeuj aen siusik dangzgo cawx ndaej bunz riep baengzndaij venj hwnjdaeuj, beixnangz naj cij hai, fajnaj yungzyubyub, ndwn hwnjdaeuj laebdaeb byaij bae. Yienzbonj dingh youq banhaet cib diemj cung baedauq baiqdangz, nyengh ngaiznyed daengz banringzgvaq sam diemj cung cij hainduj guh yizsiz, hawj gyoengq lwgnyez dou nyouq dwk noh rangfwt dungx iekngaungau, caj dwk nanznwd myaiz rihraengraeng.

Daxdaiq gou dwg boux lauxhangz nu cagndaij. De sien dawz gij naengndaij naenx haeuj ndaw ndaijngaz deihyaenyaen haenx, menhmenh rag baez ndeu, diuz naengndaij saek lwgfwg song lwgfwngz gvangq haenx couh sikhaek bienqbaenz diuz seindaij saeqsetset. Mwh gwed naengndaij baihswix bienqbaenz baihgvaz gwed mae’ndaij saeqset le, daxdaiq couh hainduj nu cagndaij ciep mae. De naengh youq gwnz daengqeij iq, vid dinvaq daengz gagoek ceiq dingj haenx sangvidvid, dinvaq caeuq gyaeujhoq ndawde, couh baenz giz nu cagndaij. Sien dwg aeu seindaij nu baenz mae’ndaij, caiq aeu gizgyaeuj mae’ndaij caeuq mae’ndaij doxlienz hwnjdaeuj, baenz diuz mae raez, fwngzgvaz cuengq aen cuzbaenq ndeu, diuz mae’ndaij daj baihswix ciep gvaqdaeuj haenx gaeuq raez le, couh aeu fwngzgvaz bae cienq aen cuzbaenq haenx, hawj mae’ndaij menhmenh bienqbaenz ndaek mae hungloet ndeu.

Daxdaiq daeuj ranz dou nu cagndaij, bingzciengz dwg youq hanzgyaj caeuq sujgyaj. Hagdangz baez cuengqgyaj, daxboh couh heuh gou caeuq daeggo byaij cib geij leix roenbya, daengz ndaw luegbya bae coux daxdaiq daeuj, daengz sougyaj haihag, cij soengq de ma daengz ndaw luegbya. Daxdaiq baez daengz, dou sim’angq raixcaix, aenvih daxdaiq youq ranz, gek song sam ngoenz, couh ndaej gwn lai ndei di. Aen sigij gonq bet goujcib nienzdaih, youq lajmbanj, bingzciengz gig noix ndaej gwn noh, siengj daih gwn daih ndoet, ciengzseiz yaek caj daengz ngoenzcieng ngoenzciet cijndaej gwn. Bat nohbiz dawz daengz gwnz daiz, cungj dwg ciuq gij gvigawj yiemzgek daxboh bae gwn, de mbouj hawj dou haj beixnuengx gag nip, deng caj de baez lwnz baez lwnz bae fat, haujlai lwnz de caeuq daxmeh cungj mbouj ndaej gwn saek gaiq, songde cungj bak gangj doxdoengz naeuz, dou bouxlaux aenndang gaenq dinghyiengh lo, gwn haeux imq couh ndaej, mbouj yungh gwn baenzlai noh, daxboh nip noh seiz, lij gig miz bouhloh, baezbaez cungj ciuq gonqlaeng daeuj, gaiq hung nip hawj daeggo, gaiq iq nip hawj daegnuengx, mwh ndaw bat lw doeklaeng sam seiq gaiq noh, couh dingz gouh dawh naeuz: “Faen mbouj doh lo, geij gaiq neix ce hawj daxdaiq donq laeng gwn, de geq lo, yaek bouj yingzyangj, sou miz maz yigen lwi?”

“Mbouj miz!” Dou haj beixnuengx caemh sing han, couh lumj hagseng hoizdap gij vwndiz lauxsae nei.

Caj daengz donq daihngeih, daxdaiq nyenghdingh yaek faen saek gaiq song gaiq noh hawj song daegnuengx dahnuengx ceiq iq haenx, hoeng daxboh mbouj hawj, cij raen de naj laepbwt, caengzroemroem, naeuz, gou naeuz baenzlawz guh couh baenz de guh! Daxdaiq couh mbouj gamj gag guhcawj, daxboh simsoh hozgaenj, youq fuengzcug caeuq caencik ndawde okmingz lo.

Mizseiz nanz mbouj miz noh gwn, daxboh couh youq henz rongzgaeq baenqloekloek, danghnaeuz ra ndaej song aen gyaeq, de couh heuh daxmeh cien baenz aen, dandog cuengq haeuj ndaw vanj daxdaiq; danghnaeuz lai miz saek aen song aen, de couh heuh daxmeh cien hawj song daegnuengx dahnuengx ceiq iq haenx.

Song diuz gagoek daxdaiq aeu daeuj nu cagndaij haenx, haemhhaemh cungj yaek aeu raemxraeuj oep. Yiengh hong neix, daxboh couh heuh dou geij boux lwgnyez bae guh. Daxboh naeuz, vahsug gangj “roega rox dauq ciengx bohmeh, yiengzlwg gvih gwn cij nyinh cingz”, sou mbouj ndaej lienz roega caeuq duzyiengz cungj mbouj ha, ciuhvunz raeuz, yaek rox geiq cingz.

Daxdaiq daj lij iq couh cug din. Gou baenz gien baenz gien bang de gej diuz baengz cug din——cukcuk miz mij raez ndeu, mwh faj din iqetet de baij youq dangqnaj, dou roxnyinh geizheih dangqmaz; baihnaj fajdin, haj lwgdin bingzbaiz doxcaenx ndaetndet, lwg dinmeh guhdaeuz, youq baihnaj soemswtswt, baenz faj din yawj hwnjdaeuj couh lumj gaeuyiengz iqetet. Din daxdaiq iqetet, nanzgvaiq de byaij roen baenzneix numq. Doeklaeng gou naemj, daegdaengq baenzneix bae cang gyaeu, aenvih mbouj dwg gij gyaeu swyenz, couh mbouj suenq dwg yaeundei lo!

Gou baez dem baez nyaenj gagoek、gahengh、angjdin daxdaiq…… Diuz gagoek de banngoenz aeu daeuj nu cagndaij haenx, fanzdwg gizdieg deng mae’ndaij ngad haenx, haujlai cungj mizdi ndaem aeuj, gou oep mbaw sujbaq mbaeq ndat haenx youq gwnz de, gvaq geij miux cung youh fan baez ndeu. Daxdaiq ngeng ing aen daengqeij, song faj fwngz cuengq bingz youq gwnz gaiqbaengh daengqeij haenx, song ngveih lwgda buenq hai buenq haep, bak lij damzbedbed. Yaep ndeu naeuz, ai, lanbengz, menh di; yaep ndeu youh naeuz, ai, lanbengz, mbaw sujbaq naenx haenq di……

Baenz ndaek baenz ndaek mae’ndaij cang rim geij aen loz le, daxdaiq couh hainduj baij ndei aendaemjbaengz. Bouxlawz hix ngeix mbouj daengz, bingzciengz daxdaiq aenvih nienzgeij laux guh hong menhmwd fwngz bamzbwd neix, daemjbaengz seiz, aenlwt cix vad bae riengjret vaiqvit. Mbouj miz vunz saenq, neix dwg gij dinfwngz bouxlaux caetcib lai bi ndeu. Dou yawj dwk dava bae, hoeng cix riengz mbouj hwnj fajfwngz de geq ok baezsoq.

Ciepdwk cix cawj baengz, gyaq aen rek hung ndeu, cuengq baengzndaij roengz ndaw rek hung bae, gya di mbawromj、mbawraeu oiq, nywj nyumx ngaiz, feiz iq menh cawj, song sam diemj cung youh dawz okdaeuj moeb baez ndeu, hawj baengzndaij menhmenh dawzsaek, bingzciengz yaek cawj song sam ngoenz, cij ok rek dak hawq, gij saek baengzndaij ciengxlwenx mbouj doiqsaek. Dak daengz saujsang, couh ndaej aeu daeuj nyib riep lo.

Daxdaiq daeuj ranz dou nu cagndaij daemj baengz, laebdaeb miz haj roek bi sujgyaj hanzgyaj, bibi dwg baenzneix yiengh. Seiznyez gou, buenxriengz daxdaiq nu cagndaij caeuq dingq gij gvigawj daxboh menhmenh majhung, menhmenh roxnyinh daengz gij vunz gij saeh ndawbiengz. Mwh gou baenz vunzhung ok rog bae guhhong le, baezbaez ngeix daengz doengh gij ndwenngoenz haenx, gij saeh hung saeh iq doenghbaez, hawj gou ndiepniemh nanz lumz. Cungj gamjcingz haenx miz haemzhoj siengsim gij saedceij doenghbaez, hix miz gij angqyangz vuenyungz mwhneix.