9 nyied 8 hauh, Swcigih Dangjveij Dungjcanbu、 Swcigih Minzcunghveij youq Nanzningz hai hoih haidoengh caeuq hoih beizyin yezvu hong biensij《Dauqsaw Gvangjsih Minzcuz Ci》(cek daih’it). Swcigih Dangjveij Dungjcanbu cangzvu fubucangj Linz Vaizyungj camgya veiyi caemhcaiq gangjvah. Swcigih Dangjveij Dungjcanbu fubucangj, Swcigih Minzcunghveij Dangjcuj suhgi、 cujyin Lij Cinlinz doeg le aen dunghcih biensij veijyenzvei gvendaengz laebbaenz 《Dauqsaw Gvangjsih Minzcuz Ci》, caemhcaiq daibyauj Swcigih Dangjveij Dungjcanbu、 Swcigih Minzcunghveij caeuq dauqsaw benhcizbu fucwzyinz ciemdingh biensij hezyi, hauh’ok hong biensij cingqsik haidoengh.

Aenhoih giengzdiuh, biensij 《Dauqsaw Gvangjsih Minzcuz Ci》 dwg hangh guhfap youqgaenj haeujlaeg gvancez lozsiz gij swhsiengj youqgaenj gvendaengz gyagiengz caeuq gaijndei hong minzcuz caeuq gij iugouz youqgaenj gvendaengz lwnhgangj hong Gvangjsih Siz Ginbingz cungjsuhgi, haeujlaeg doicaenh hwnqguh gih guhyiengh couqmaenh gij eiqsik Cunghvaz Minzcuz ranz vunz ndeu, dwg hangh vwnzva gunghcwngz cungdiemj Swcigih Dangjveij doengzeiq guh ndeu. Mizgven bouhmonz、 biensij donzdui aeu lai roxnyinh gij yiyi youqgaenj hong biensij, gaenjgaenj hopheux sienqmeh hong couqmaenh gij eiqsik Cunghvaz Minzcuz ranz vunz ndeu, genhciz gyalaeg aen fuengyiengq caezcaemh caeuq yungzhab, guh caez guh ndei yinvu biensij, roengzrengz dajcauh gij minzcuz yenzgiu cingbinj giem miz gyaciz lizsij swhliu caeuq yiyi daihneix, vih cauhlaeb lizsij swhliu dijhi、 vahgangj dijhi、 lijlun dijhi Cunghvaz Minzcuz ranz vunz ndeu Cungguek gag guhcawj guh gung’yen Gvangjsih.

Ciuq cam rox, 《Dauqsaw Gvangjsih Minzcuz Ci》 giva youq 2027 nienz nienzdaej biensij caez. Dauqsaw bauhamz Cuengh、 Gun、 Yauz、 Myauz、 Dung、 Mulauj、 Veiz、 Gingh、 Yiz、 Suij、 Gwzlauj daengj 12 aen minzcuz, doenggvaq hidungj cingjleix caeuq gohyoz geiqlwnh lizsij goekrag、 vwnzva daegcwng caeuq hwngfat ginglig Gvangjsih gak minzcuz, yienh’ok gij saedguh sengdoengh gak minzcuz youq ndaw ciengzgeiz lizsij cincwngz doxbaengh doxgauq、 doengzcaez haenqguh haenx, biengjloh gij gvilwd hwngfat Cunghvaz Minzcuz daj gag youq daengz gag rox、 daj lai yiengh daengz caezcaemh. Dauq saw neix yaek aeu cauhmoq lijlun cijdauj caeuq cauhmoq lizsij swhliu guh daegsaek yienhda, gyoebhab yungh gaujguj fatyienh moq、 yenzgiu cwngzgoj moq, yawjnaek vatcimh caeuq baijok gij lizsij saedsaeh gak minzcuz “sam gyau”, yienh’ok Gvangjsih gak minzcuz youq cwngci、 ginghci、 vwnzva、 sevei daengj gak fuengmienh mboujduenh demgiengz caezcaemh, cienzmienh baijok swcigih laebbaenz doxdaeuj daegbied dwg Cibbet Daih Dangj doxdaeuj Gvangjsih minzcuz doxgiet baenaj saehnieb miz cingzcik hungloet.

（Veiz Yingjcinh/韦颖琛 Cwnz Yisenz/岑奕璇）