9 nyied 5 hauh, Aen Hoih Yenzgiu Daujlun Yozsuz “Gveilinz Vwnzva Dingjhoenx Ndaej Cungguek Gungcanjdangj Lingjdauj” youq Nanzningz hai, haeujlaeg hagsib doekguh gij cingsaenz gangjvah youqgaenj Siz Ginbingz cungjsuhgi youq gwnz Aen Daihhoih Geiqniemh Cungguek Bouxminz Gangyiz Cancwngh Nem Seiqgyaiq Fanj Fazsihswh Cancwngh Ndaejhingz 80 Hopbi caeuq gwnz aen hoih ciudaih, geiqmaenh lizsij、geiqniemh senhlez、inmaij hozbingz、haicauh coglaeng, cienzswnj caeuq fatyiengz gij cingsaenz dingjhoenx hungmbwk, haeujlaeg yaenglwnh gij neihanz lai caeuq gij gyaciz seizdaih Gveilinz vwnzva dingjhoenx, haeujyamq saenqhwnj cingsaenz、rom rengz, haenqrengz ok goengrengz Gvangjsih hawj gij yendaiva yiengh Cungguek. Swcigih Dangjveij suhgi、Swcigih Yinzda Cangzveijvei cujyin Cinz Gangh camgya haihoih caemhcaiq gangjvah. Swcigih cujsiz Veiz Dauh cujciz aen hoih.

Cinz Gangh naeuz, Cungguek Gungcanjdangj lingjdauj vwnzva dingjhoenx caeuq ginhsw、cwngci、ginghci doengh gij fuengmienh neix dingjhoenx ityiengh, dwg dingz gapbaenz youqgaenj ciengz ciengq dingj Yizbwnj hungmbwk bouxminz Cungguek, Gveilinz vwnzva dingj- hoenx ndaej Cungguek Gungcanjdangj lingjdauj couhdwg ndawde gaiq youqgaenj ndeu. Gyaak yenzgiu gij lizsij Gveilinz vwnzva dingjhoenx, leih daengz hoizfuk yienzyiengh lizsij saedsaeh、gyalai roxyiuj gij lizsij dingjhoenx liuxliux, leih daengz cungjgez gingniemh, lai gyaak vwnzva gagsaenq, leih daengz vatcimh gij swhyenz lizsij vwnzva、gyavaiq hwnqguh aen hawsingz baeyouz gaep seiqgyaiq Gveilinz.

Cinz Gangh daegbied gangj daengz, aeu laebdaeb cienzswnj gij cingsaenz dingjhoenx hungmbwk, daengj mbawgeiz ronghsien dawz- maenh Cungguek Gungcanjdangj lingjdauj, aeu Dangj lingjdauj doekguh daengz gak hangh hong daengx gih gaijgwz hwngfat onjyamq bae, baujmaenh mbawgeiz Dangj youq gak diuz camhsienq mbinnyegnyeg; gyaak swhsiengj lijlun vujcangh, dawzmaenh mbouj soeng aeu Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz bae comz rengz, hag swhsiengj、gyaak dangjsing、yawjnaek saedguh、laebguh goeng moq, haeujyamq dingjmaenh vwnzva gagsaenq, gyavaiq doihaeuj vwnzva saehnieb hwngfat ndei saed; gyamaenh guhhung diuz doengjit camhsienq gyaez guek seizdaih moq, comz rengz hung hwnqguh aen Gvangjsih maenghndei seizdaih moq; gyalaeg doiqrog doxgyau doxgap, fugsaeh cauhlaeb aen minghyinh caezcaemh Cungguek—Dunghmungz engqgya doxgyawj de. Maqmuengh lauxcangh yozcej guh ndei gijndei ciennieb bonjfaenh, haeujlaeg vatcimh gij swhyenz vwnzva saekhoengz Gvangjsih, baenzroix bae yenzgiu gij cingsaenz gyaez guek、doxgiet、minzcuj、baenaj Gveilinz vwnzva dingjhoenx miz de, gangj ndei gij gojgaeq vwnzva dingjhoenx, lai gikfat gyoengq bouxminz gyaez guek caeuq roxnyinh minzcuz miznaj, ok rengz cingsaenz hungloet bae coengh hwnqguh aen guek ak、gij saehnieb hungmbwk minzcuz fukhwng.

(daj 《Gvangjsih Yizbau》 aeu daeuj genj hoiz Cinz Yizcwz Cungh Siujgij)