Gouj nyied gizgiz va hai mboeng,

Gou yiengq baihdoeng eu Fwencuengh;

Seizneix gaiqwnq gou mbouj muengh,

Eu diuz Fwencuengh gangj saehcingz.

Gangcan ndaej hingz betcib bi,

Cungguek gizgiz yienghsiengq moq;

Fanj Fazsihswh vut gij hoj,

Cungqvunz byaij loh coh vuenyungz.

Seiqgyaiq bouxminz gyaez hozbingz,

Dwkciengq ndaej hingz bouxboux angq;

Cungguek cix gyo Gungcanjdangj,

Ngoenzneix lwnhgangj vah cix raez.

Gangj daengz seiqgyaiq Fazsihswh,

Vunz raeuz mwhmwh cungj hozhaemz;

Gyoengqde gaj vunz lumj guhcaemz,

Biengzdeih cungj haemz cienfanh daih.

Gij lizsij neix cungj yaek geiq,

Hawj vunz seiqseiq cungj mbouj lumz;

Gij hoj gij nanh daengx lajmbwn,

Gangj daeuj hawj vunz raemxda rih.

Ngoenzneix gou daeuj gangj lizsij,

Caux geij coenz bij(beij) si(gangj) hawj biengz;

Gangj Yizbwnjgveij vunz sim liengz,

Siengj ciemq lajbiengz dwk Cungguek.

Gwnz Luzgouhgyauz sing bauq yiengj,

Gveijswj hai cieng daeuj ciemqfamh;

Guek raeuz mbupmbap(soiq) minz souh nanh,

Caez hwnj gangcan lwed nyumx geiz.

Gangj daengz Saehbienq Goujitbet,

Doengbaek deng dek(dik) cungj loemq caez;

Beksingq bouxboux raemxda lae,

Vunzak hwnjbae gengq vunzdig.

Sunghhu Veican hoenz rim mbwn,

Lwed noh daeb hwnj baenz ciengzsingz;

Cungguek lwglan caez buekmingh,

Bouxboux haenq dingj fangz doegyak.

Ndawsingz Namzging mbwn laepcumz,

Samcib fanh vunz deng caeg gaj;

Gveijswj hengz yak youq dienyah,

Ienqcaeuz daihbaj lwnh mbouj caez.

Youq Bingzhingzgvanh raeuz ndaej hingz,

Bazluginh bing bongh boq fet(aenhauh);

Lumj guk roengz bya caeg mbei dek,

Gangyiz feiz fek(coemh) daengx Cunghyenz.

Gwnz Daizwzcangh mbawgeiz mbin,

Cungguek bouxbing lumj raemxrongz;

Nyumx lwed gaj caeg haenqrengz bongh,

Bouxboux cengq ndongj lumj goengq bya.

Cangzsah Veivan yienj saenzvi,

Gyoengqcaeg lumj gvi deuzrigrig;

Ginhminz doxgiet hoenx vunzdig,

Huznanz binglig ceiq mizrengz.

Bwzdonz Dacan caeg deng baih,

Bing raeuz buqvaih gyaudoeng caez;

Lumj byaj coeg rwz caeg hemq daej,

Youzgiz hengz ndaej cansuz ak.

Gwnz Daihangzsanh fwjrumz mbin,

Gangyiz ginhminz doengzsim hwnj;

Deng hoj deng nanh ceiqheiq vwnj(onj),

Gangdiet cangzcwngz cungj mbouj lak.

Yenzanh swngdi daeng ronghsag,

Lingjsiu fwngz vad vix fuengyiengq;

Diemj hwnj bogfeiz boq hauh yiengj,

Gangcan dwkciengq miz maqmuengh.

Dieg Nanznizvanh funggingj gyaeu,

Gag ok rengz raeuz caux cibcuk;

Cansw hai fwz ak lumj guk,

Sanjbwz dieg nduk(fwz) bienq Gyanghnanz.

Gyoengqvunz vazgyauz simswnh van,

Cihyenz gangcan gien ngaenzcienz;

Vunz youq haijvai sim doxlienz,

Doengzcaez simsienh bauj guekcoj.

Gozci baengzyoux daeuj bangcoh,

Dep mbaq caemh hoq gengq vunzcaeg;

Bwzgiuzwnh gij aencingz laeg,

Youjyiz va ndaek(bog) hom doh biengz.

Gangcan cingsaenz lumj aen daeng,

Ciuq rongh daihlaeng cienfanh ranz;

Coihawj vunz raeuz mbouj lau nanz,

Sim hoengz ciep ban guh fukhwng.

Cungguek gangcan dwg yienghneix,

Raeuz lij yaek geiq saeh guek wnq;

Fanj Fazsihswh doengzcaez hwnj,

Seiqgyaiq mwnqmwnq(gizgiz) cungj guh caez.

Bwzlinzciengz lak cij raen mbwn,

Wcan hoenz mwnh sanq liux bae;

Lwed feiz lienh ok gij caenleix,

Hozbingz cijndaej hwng seiqfueng.

Ndaw Cinhcuhgangj langh fanfoen,

Yizbwnj caeg hoenx lumj guk beuq;

Gwnz Daibingzyangz hoenzneuneu,

Yiz Meij doxdeuq(doxdaeuq) yak dangqmaz.

Swhdalinz Gwzlwz nae mbin,

Dwzginh dietdin bungq ciengz dangj;

Hoenx dwk Dwzginh dai baenz bang,

Mbawgeiz Hungzcangz mbinyagyag.

Youq Nozmandij sing bauq yiengj,

Mungzginh doxciengj hwnj hamq caez;

Dwk byoengq Dwzginh fangzsen bae,

Buqloemq moengh ndei Fazsihswh.

Gvangjdauj Cangzgiz hwz bauq yiengj，

Hoenz laep lumj liengj hoemq daengngoenz;

Vunz caeuq faex nywj cungj dai goenq,

Fanjcan hwnzngoenz hemq doengh mbwn.

Mwhde gwnz mbwn Bulezdenh,

Feihgih doxnenx(hoenx) lumj roeg mbin;

Aeu nyieg dwk giengz guh ndaej hingz,

Swyouz geiz mbin youq byonghmbwn.

Nae hau rog singz Mozswhgoh,

Dwzginh byaij loh bungz naenoengz;

Naehang lumj mid camx caeg roengz,

Hungzginh baenzgoeng daeuj fanjgung.

Gwnz haij dwkciengq hix youqgaenj,

Meijginh guh haenq nda cancangz;

Ruz hung Yizbwnj caem baenz bang,

Gwnz Daibingzyangz dauq cienj hoengh.

Dieg Ahlahman faenx mbinfi,

Mungzgohmajli lumj guk beuq;

Dwk baih Dwz Yi gyaep caeg deuz,

Bwzfeih mbwn seuq ok daengngoenz.

Liuzvangzdauj Can lwed baenz dah,

Meijginh cung gaj lumj raemx lae;

Cap hwnj mbawgeiz miz ceiqheiq,

Fazsihswh bae byaij loh fangz.

Lezningz Gwzlwz humx nanz raeuh,

Ginhminz dawzsouj lumj ciengz diet;

Mbouj lau mbwn nit mbouj lau iek,

Doeklaeng mied caeg raen daengngoenz.

Bohswzdanj ok gunghgau hung,

Fanjfaz Dungzmungz lumj ciengz yangj(ndongj);

Lwzling Yizbwnj vaiq douzyangz,

Faggiemq haucanq(hau) dingj cingqheiq.

Doengging sinjban fagcuiz baeuh(yiengj)，

Ciengqfamh gumj gyaeuj bae nyinh coih;

Lizsij goengdauh ndaej okdoiq(baijok),

Guh yak vunzloih cungj biqmyaiz.

Fanjfaz gyoengqdoih fwngz gaem fwngz,

Duh gou duh mwngz sim doxhab(doxlienz);

Doengz rengz caez bae gaj fangzyak,

Lajmbwn hwngfat vunz vuenyungz.

Gvaq betcib bi lij aeu siengj,

Lizsij lumj giengq(gingq) geiq ndwenngoenz;

Mbouj lumz mwhgonq gij feizhoenz,

Doengzsim byaij roen bae coh naj.

Ngoenzneix seiqgyaiq fwjrumz fan(bienq),

Hozbingz fazcanj dwg cawjlouz;

Gij saeh gaxgonq geiq simdaeuz,

Gaem fwngz doxcaeux(yien) hoh dienyah.

Cancwngh ngaeuzraemh caengz sanq ndi(ndei),

Gungjbu cujyi lij luenh hengz;

Daengx biengz hozcoz doengz haenqrengz,

Dingh aeu mbwn gveng gyaep moklaep.

“It rangh It loh” gyaq giuzgim,

Gak guek hai din doengz fazcanj;

Doengz leih gungh hingz caez sim van,

Hozbingz va rang cawqcawq lengj.

Gyauyuz guh bonj biengz doxhuz,

Gohgi cinbu coih hoenghvuengh;

Vwnzva gyaulouz caen miz muengh,

Doengz guh beixnuengx youq lajmbwn.

Insik hozbingz gij ngoenzndei,

Roengzrengz doxbae guh hong haenq;

Cienzswnj gangcan gij cingsaenz,

Yienghyiengh guh baenz guek giengzak.

Ciloek lizsij bongh mbouj dingz,

Cingqngeih dingh hingz gvaq doegyak;

Muengh raeuz Cunghvaz engq hwngfat,

Seiqgyaiq ndaep sat gij feiz hoenz.

Gouj nyied sam hauh youq Baekging,

Leixbauq singsing doengh daengz mbwn;

Hoenzsiu sanq bae caemh mbouj lumz,

Ngoenzneix cungqvunz doengz gingqhoh.

Samginh bingdoih ngozfwdfwd,

Yamqdin byaij dwk gig cingjcaez;

Goujhau singsing doengh mbwn bae,

Giengzak budui vunz nanz beij.

Sinhhingz canghbei youq seiq viq(fueng),

Danjgwz feihgih caeuq daujdanz;

Gangdiet bingdoih dwg haujhan(vunzak),

Bauj guek hoh ranz onj fanhdaih.

Cuengq gyoengq roeggap hai fwed mbin,

Baekging ngonzbing daengx biengz maez;

Geiq ndei lizsij byaij doxbae,

Hozbingz bae gyae youh bae nanz.

Beijfwen ciengq lai bak hix naet,

Gij foux saet lai ga hix naiq;

Danghnaeuz beixnuengx cungj lij maij,

Caj gou yietnaiq youh caiq damz.