Sai:

Raeuz song boux miz eiq,

Gaej heiq mbouj miz gwn,

Boux vunz doengz boux vunz,

Miz gwn baengh gaenx guh.

Mbwk:

Boux guh reih sinhoj,

Hanh daeuj lumj mboq lae,

Dawzrauq caiq dawzcae,

Bae ngoenz laep ngoenz haemh.

Sai:

Guh yienghyiengh cungj hoj,

Roxnaeuz daeuj ranz gou,

Gwn imq cix ndaej youz,

Youq lumj mou cuengqlangh.

Mbwk:

Siengj bae caeuq mwngz youq,

Lau gou mingh mbouj ndei,

Seng daeuj mbouj deng seiz,

Mingh mbouj ndei lumj doih.

Sai:

Boux vunz oiq lumj rangz,

Ndang ndei mingh mbouj yak,

Mingh nuengx mingh bouxhag,

Gap bouxlawz cungj hoengz.

Mbwk:

Gou seng youq ndaw rungh,

Cungj naemj ra ndaej goeng(gvan),

Aen seiq neix mbouj doengz,

Ra goeng mbouj yungzheih.

Sai:

Mwngz seng youq ndaw mbanj,

Ra gvan ndei cij bae,

Ciuhvunz geijlai raez,

Gvan ndei cij baenz ciuh.

Mbwk:

Gou lij youq ranzmeh,

Baenz geq fouz vunz ra,

Gou mbouj miz vwnzva,

Vunz haida mbouj yawj.

Sai:

Mwngz naeuz caengz okhaq,

Gangj vahgyaj cungj miz,

Boux vunz mwngz sau ndi(ndei),

Vunz gizlawz mbouj lienh.

Mbwk:

Vah mbouj yaem mwngz beix，

Meiz(miz) moiz daeuj daengz ranz,

Gangj coenz unq coenz van,

Cam gou aeu coenzvah.

Sai:

Boux vunz doengz boux vunz,

Rox mwngz yienghlawz naemj,

Gou mbouj sang mbouj daemq,

Haethaemh rox ra ngaenz.

Mbwk:

Mbouj yaem mwngz guh beix,

Gizgiz meiz vunz cam,

Aen sim gou mbouj van,

Caen raen nanz gvaq ciuh.

Sai:

Gizlawz haeux mbouj gwn,

Gizlawz mbwn mbouj hoemq,

Ndaw singz yienznaeuz hoengh,

Youqhoengq hix bienq gungz.

Mbwk:

Gou samcib bi geq,

Meh naeuz mbouj luenh bae,

Haq mbouj ndaej boux ndei，

Bae gyae mizmaz yungh.

Sai:

Ndaw bya cix ndaw bya,

Yaek miz maz daih yoq(yaez),

Haq ndaw mbanj gaenh boh,

Gangj coenz goj hix diemz.

Mbwk:

Gou seng youq ndaw bya,

Ra giz ndei cij haq,

Gou caeux couh gangj gvaq,

Mbouj haq youq gaenh ranz.

Sai:

Ndaej haq youq gaenh ranz,

Saeh van ndei doxheuh,

Nuengx mwngz haq hamj geuq,

Yaek heuh hix mbouj raen.

Mbwk:

Youq lajmbanj mbouj baenz,

Hai da raen sinhoj,

Sam ngoenz mbouj miz noh,

Rox ngoenzmaz baenz vunz.

Sai:

Mwngz gaej gangj yiengh vah,

Haq gaenh meh engq ndei,

Geu buh geu vaq heiz(uq),

Meiz meh daeuj bang saeg.

Mbwk:

Youq lajmbanj sinhoj,

Mwngz mbouj rox luenh naeuz,

Ndaemndaem liux caiq sou,

Gou simfanz nanz lwnh.

Sai:

Naeuz ndaw bya mbouj ndei,

Ciengzseiz miz vunz deq,

Nuengx mbouj yiemz gou geq,

Deq mwngz daeuj caemh ranz.

Mbwk:

Nienzgeij geq cix geq,

Miz nyeq(noh) gwn cix baenz,

Ndaej caeuq beix doxgaen,

Gwn lwgmaenz hix nyienh.

Sai:

Mwngz ndaej bae ranz gou,

Mbouj hawj mwngz sinhoj.

Raeuz song boux ciuqgoq,

Gij sinhoj gag lumz.

Mbwk:

Baengh beix boux vunz ndei,

Nuengx bae gaen gvaq ciuh,

Mbouj aeu ci aeu giuh,

Rox ciuqgoq cix baenz.

Sai:

Gou seiqcib bi laux,

Gvaq seiz mbauq aeu baz,

Ngoenz daegdaengq daeuj ra,

Miz maz vah cix naeuz.

Mbwk:

Mwngz vunz youq ndaw singz,

Gwn ninz mbouj youheiq,

Nienz laux daengz ban neix，

Lawz aeu mbouj ndaej baz.

Sai:

Gou ndang youq ndaw singz,

Vunz hix sim mbouj maij.

Gangj okdaeuj dahraix,

Vaih dangqnaj liux caez.

Mbwk:

Mwngz vunz baenzlai mbauq,

Youh dauq lajmbanj aeu.

Yawj siengq lumj bouxdaeuz,

Baenzyouq aeu yahrungh.

Sai:

Vah gaej gangj gvaqloengz,

Gangj loeng nanz doiq dauq,

Gou vunz mbouj baenz mbauq,

Seiz yaek lauq(gvaq) ciuhvunz.

Mbwk:

Mwngz vunz baenzlai mbauq,

Baenzyouq lauq ciuhvunz,

Guhdoih youq lajmbwn,

Gou caeuq mwngz ityiengh.

Sai:

Nuengx gangj yienghneix vah,

Gou fouz naj doiq mwngz,

Geq cij bae ra gwn,

Lau lwgvunz mbouj nyiengh.

Mbwk:

Mwngz luenh siengj luenh ngeix,

Mwngz luenh heiq luenh cai,

Gou mbouj gangj baenzlai,

Dai lix caeuq mwngz lienh.

Sai:

Gou dwg boux lauxsaed,

Mingh maet vunz mbouj cim,

Seiqcib bi laj din,

Vunz lingh bae goeng moq.

Mbwk:

Yah mwngz sau youh sau,

Noh hau naj youh maeq,

Yah mwngz ndei baenzneix,

Baenzyouq ngeix daengz gou.

Sai:

Yahgonq vunz baenzsau，

De lau guhhong hoj，

Ngoenz gwn bae guhdoj，

Mbouj dauq goq gyaranz.

Mbwk:

Mwngz miz ngaenz miz cienz，

Aeu bouxsien guh yah，

Mbouj doxceng doxndaq，

Doj gvaq gaij couh baenz.

Sai:

Meuz nanz gaij gwn bya，

Ma nanz gaij gwn haex，

Boux guhdoj miz leix，

Nanz ndaej doiq dauq laeng.

Mbwk:

Bouxlawz gim mbouj aeu，

Bouxlawz ngaenz mbouj ngah，

Mwngz mbouj raen dwgda，

Baenzlawz ra guhdoih.

Sai:

De dwg vunz ndaw singz,

Swiq din hix doxfamh，

Seizneix gangj mbouj ngamj，

Fanj bae ra gvan coz.

Mbwk:

Vunz ndaw singz sim langh，

Baez gangj cix doxceng，

Youh mbouj dwg lwg’eng，

Mbouj deng lai doxnyiengh.

Sai:

Aeu boux gonq mbouj baenz，

Gou hozhaenz dahnuengx，

Mbouj rox yienghlawz suenq，

Sim gou luenh liux caez.

Mbwk:

Gvanbaz guh seng’eiq，

Ndwenndwen ndaej lingx ngaenz，

Guh gijmaz cungj baenz,

Gai gaen mak hix canh.

Sai:

Maez deuz cibgeij bei(bi),

Seiz gou aeu caengz ndaej,

Naemj daengz cix siengj daej,

Muengh nuengx gaej guhriu.

Mbwk:

Gofaex cib ciengh sang,

Cungqgyang hix miz lwnx,

Ngoenzcog aeu bouxwnq,

Mwngz swnhleih gvaq vunz.

Sai:

Gou cien loeng fanh yienq,

Genj bazgonq mbouj baenz,

Langh raeuz caeux doxraen,

Rox sien baenz goeng’yah.

Mbwk:

Bak naeuz mbouj miz yah，

Gou gvaq hix mbouj cim，

Boux ndiep boux ringring，

Gangj vahging(byonj) dwk raeuz.

Sai:

Ndaej boux baz bienq sim,

Cin(caen) cien loeng fanh yienq,

Ndaej boux baz sim bienq,

Ngoenzhwnz yienq yaek dai.

Mbwk:

Mwngz luenh gangj luenh naeuz，

Simdaeuz mwngz gag angq，

Vah dwg baenzneix gangj，

Yaeuh gou angq daengzndwi.

Sai:

Ndaej boux yah bienq sim，

Gou cin(caen) raen doeknaiq，

Nuengx ndaej daeuj dahraix，

Gaj mou baiq cojcoeng.

Mbwk:

Heiq lai hix mbouj ndaej，

Daej lai hix mbouj ndei，

Langh mwngz miz simgei，

Gou bae caeuq mwngz gvaq.

Sai:

Mwngz gangjvah baenz naek，

Cuengq haeuj daep haeuj sim，

Mwngz vahgangj cingqging，

Cien gim vuenh hix nyienh.

（2 sat）