8 nyied 18 hauh daengz 21 hauh, “dwzcanj henzguek gai daengx guek” ——aen hozdung baijok Gvangjsih Dwzbauj byaij haeuj Guekgya Minzveij youq Bwzgingh guh, hozdung aeu “dinghdiemj bangfuz giet mak lai， Dwzbauj huq ndei haeuj gingsingz” guh cawjdaez. Mbat hozdung neix youz Guekgya Minzveij Gungdungz Fazcanj Swh、 Gihgvanh Fuzvu Giz cijdauj, Gvangjsih Minzcunghveij cawjbanh, Cunghgung Dwzbauj Yen Veijyenzvei、 Dwzbauj Yen Yinzminz Cwngfuj ciepbanh, doenggvaq gwnzmuengx yienhsaed lienzdoengh, daiq gij dwzcanj ndei Dwzbauj Yen Guekgya Minzveij dinghdiemj bangfuz haenx daengz Bwzgingh bae, aeu siuhfei bangfuz coenghrengz Dwzbauj ginghci hwngfat.

Dwzbauj Yen genj aeu 5 aen giyez maenhndei, daiq 20 lai cungj doxgaiq reihnaz miz daegsaek ndei caeuq 10 lai cungj doxgaiq feihyiz fwngzguh minzcuz haenx daengz gingsingz baijok. Yienhciengz laeb diegbaij dwzcanj reihnaz、 doxgaiq fwngzguh minzcuz、 doxgaiq ndawbiengz gaicawx miz minzcuz daegsaek、 doigawj vwnzva lijyouz haj aen dieg, supyinx vunzlai daeuj yawj. Bwzyanghgoj、 hojlungzgoj baenz gij canjbinj “mingzsingh”, sanhcah、 manghgoj, doengzyiengh gig miz yinxdaeuz. Yienzndokmax、 lamz- ganjmeg、 ndangdaenj Bouxcuengh、 doxgaiq vwnzva maxdaemq Dwzbauj daengj doxgaiq langhbaij yienh’ok le gij doxgaiq miz daegsaek caeuq yinxdaeuz minzcuz vwnzva Dwzbauj Yen.

Baengh aen bingzdaiz Guekgya Minzveij, Dwzbauj Yen ndaej doidoengh “dwzcanj henzguek gai daengx guek”. Yienghneix mboujdan haigvangq le diuz roen gai gij doxgaiq miz daegsaek, mizyauq doigawj le gij doxgaiq reihnaz miz daegsaek caeuq gij swhyenz vwnzva lijyouz dangdieg, engq coicaenh le gak minzcuz “sam gyau”, vih vwnzva canjnieb mwnhoengh caeuq lajmbanj saenqhwng dwk haeuj rengzdoengh haenqrem.

Daj 1989 nienz hwnj, Guekgya Minzveij doiq Dwzbauj Yen caenh cingz bangfuz gaenq byaij gvaq 36 bi. Itcig gaemguenj aen yenzcwz “gij aeuyungh Dwzbauj, gij naengzlig minzveij”, Guekgya Minzveij youq ngaenz caeuq hanghmoeg fuengmienh lienzdaemh cihciz, doidoengh Dwzbauj ginghci sevei riengjvaiq hwngfat, yienghsiengq hawsingz lajmbanj moq caez, gak cuz ginzcung ndwenngoenz hwngfwdfwd. Daegbied dwg “Cibseiq Haj” doxdaeuj, Guekgya Minzveij gungh lozsiz ngaenz bangfuz 7894 fanh maenz, saedhengz 48 aen hanghmoeg, youq cwngcwz hezdiuz、 daegsaek canjnieb、 seiqhenz vunz youq、 gihcuj sezsih、 minzcuz vwnzva cienzciep、 vunzcaiz beizyin、 meizdij senhconz daengj fuengmienh daezhawj haenqrengz cihciz, coicaenh Dwzbauj ginghci sevei bonghhamj baenaj. Neix mboujdan mizyauq gyamaenh haigvangq le gij cwngzgoj duetgungz, coicaenh le lajmbanj saenqhwng, engq youq gwnz dieg Dwzbauj sij le bien sengdoengh couqmaenh gij eiqsik Cunghvaz Minzcuz ranz vunz ndeu.

(Cwnz Siubeih/岑秀杯)