Ngamq haeuj seizcou, youq dieg ndaem makbwzyanghgoj Nazboh Yen Bwzswngj Yangh Bwzswngj Cunh, gyoengqvunz cingq nyaengq mbaet mak, bouxcawj dieg ndaem mak Nungz Binghgaih daengx ranz vunz genjleh makbwzyanghgoj, bouxboux naj riunyumnyum.

“Bineix dou ndaem mak 110 moux, doenggvaq ‘diegnamh riuzcienj+guhhong canh ngaenz+dinfwngz caezyungh’, hawj bouxvutgungz henzgyawj miz hong guh ndaej canh ngaenz. Mwh gyaeujbi hong nyaengq, yangh dangjveij、cwngfuj lij heuh 40 lai boux dangjyenz ganbu daeuj bang dou dajndaem.”Nungz Binghgaih naeuz.

Bineix doxdaeuj, Nazboh Yen hengzguh gij cwngcwz “hwnq gonq bouj laeng” hawj ndaem makbwzyanghgoj ndaej lai ndei, gaijgez gij youheiq baihlaeng vunzmbanj guh canjnieb, miz yied daeuj yied lai bouxcoz dauq ranz guh reihnaz cauhnieb.

Geij bi neix daeuj, Nazboh Yen Bwzswngj Yangh doenggvaq “gomiuz+gomak”, gujli dangjyenz daiqdaeuz ndaem makbwzyanghgoj, mboujduenh guh’ak yiengh lienz nungz daiq nungz. Ciuq cam rox, aen yangh neix bineix gujsuenq makbwz- yanghgoj baenz mak 20 fanh gaen, bi gai baenz cienz 100 fanh maenz, makbwzyanghgoj hawj vunzlai lai ndaej ngaenz baenzmiz.

(Nungz Yungj)