Sai:

Gou gag gwn gag youq,

Byoemgyaeuj hau liux caez,

Baenz geq caengz miz maex（yah）,

Vunz mbouj gyaez guhdoih.

Sai:

Gou gag gwn gag youq,

Roux(ninz) lumj mou lumj ma,

Langh caiq mbouj miz baz,

Fouz vunz ra guhdoih.

Sai:

Gou gag gwn gag youq,

Haemh boux ndeu haeujninz,

Hwnj congz mbouj swiq din,

Ninz lumjnaeuz duzdoengh.

Sai:

Gou gag gwn gag youq,

Gouj ngoenz bet ngoenz youz,

Lumj ma youh lumj mou,

Bouxboux naeuz gou baih.

Sai:

Gou gag youq gag gwn,

Fwn doek mbouj okrog,

Gou boux ndeu boux dog,

Lumj mouhog gyangranz.

Sai:

Gou gag gwn gag youq,

Mbouj hwnj bya hwnj geng,

Yaek gvaq ciuh hauxseng,

Doegrengz mbouj lumj gaeuq.

Sai:

Gou gag gwn gag youq,

Mbouj miz bouxlawz nai,

Siengj daeuj caen ndaenq dai,

Gyak myaiz hix ok lwed.

Sai:

Gou gag gwn gag youq,

Bouxboux raen hix cam,

Baenz geq mbouj aeu nangz,

Lau mwngz ndang miz bingh.

Sai:

Boux miz ngaenz miz cienz,

Youq mbouj genz mbouj heiq,

Mbouj meiz（miz） ngaenz ndaw daeh,

Gwn heiq gvaq ciuhvunz.

Sai:

Boux miz ngaenz miz cienz,

Sien aeu ndaej baz oiq，

Gou ngaenzcienz daiq noix,

Boux oiq yawj mbouj daengz.

Sai:

Ngaenz lai ndaej baz gyaeu,

Ngaenz noix aeu baz geq,

Vunz baenz boh baenz meh,

Gou baz geq caengz miz.

Sai:

Ngaenz lai aeu baz gyaeu,

Ngaenz noix aeu baz yoq,

Gou gag naemj gag rox,

Ndaej baz yoq hix baenz.

Sai:

Miz ngaenz rox aeu nangz,

Miz hang rox fong cauq,

Gou mbouj miz ngaenz laux,

Dauqcawq ra mbouj dawz.

Sai:

Vunz baenz sueng baenz doiq,

Boiq hawj gou boux ndeu,

Meh naeuz gou mingh biu(mbang),

Boux ndeu vunz mbouj nyiengh.

Sai:

Vunz baenz sueng baenz doiq,

Boiq hawj gou langh vaiz,

Raeuz geq mbouj rox dai,

Deng langh vaiz gvaqciuh.

Sai:

Vunz baenz sueng baenz doiq,

Mbouj boiq baz hawj gou,

Vunz gvanbaz bae youz,

Gou langh vaiz ndaw doengh.

Sai:

Ngoenzngoenz bae langh vaiz，

Ok gai vunz mbouj yiuq，

Vunz gvanbaz bae liuh，

Diuq angq lumj mbaj mbin.

Sai:

Laeh duzvaiz haeuj ndoeng,

Ok gyangroen daeuj liuh，

Yawj mbouj raen lauxbiuj,

Gag liuh gag najmong.

Sai:

Laeh duzvaiz haeuj ndoeng,

Muengh yahdoengz gvaqdaeuj,

Yahdoengz ndiep gvan gaeuq,

Gou youq gag simfanz.

Sai:

Laeh duzvaiz hwnj bya,

Ok haw ra yahdoengz,

Rox mwngz ngamq bae goeng(gvan),

Ce ga roen raeuz duenh.

Mbwk:

Gou lij caengz miz gvan,

Gag youq ranz ciengx gaeq,

Ngaenz mbouj miz ndaw daeh,

Baenzlawz ndaej okdou.

Sai:

Bakbak naeuz ciengx gaeq,

Mbouj ndaej yamq okdou,

Vut naj mbouj leix gou,

Sim you lumj feiz coemh.

Mbwk:

Ciengx mou caiq ciengx gaeq,

Ra ngaenz dwk daehbaeuz (daehvaq),

Geq mbouj miz boux aeu,

Raeuz gag ciengx ndang dog.

Sai:

Mehmbwk rox ndiep gvan,

Youq ranz mbouj ok rog,

Gyaeng lumj mou gyaeng hog,

Daengzcog yienghyiengh lumz.

Mbwk:

Ciengx gaeq caiq ciengx mou，

Gou naeuz mwngz mbouj saenq,

Baengh dajciengx gwndaenj,

Ndaenq mbouj miz boux bang.

Sai:

Mwngz ciengx mou ciengx gaeq,

Bibi ndaej conz ngaenz,

Gou uk naemj mbouj daengz,

Guh mbouj baenz saek yiengh.

Mbwk:

Ciengx mou caiq ciengx gaeq,

Yaek ndaej gijmaz cienz,

Doxgaiq yienghyiengh bengz,

Canh maenz cienz mbouj heih.

Sai:

Doxgaiq bengz mbouj heiq,

Hwnjheiq ciengx lailai,

Danhfanz ciengx mbouj dai,

Gai bae cungj ndaej canh.

Mbwk:

Mou mbouj ndaej fat ae,

Gaeq mbouj ndaej fat bingh,

Cukseng hix dwg mingh,

Dingq gohyoz cij baenz.

Sai:

Mou bingh nuengx gaej daej,

Gaeq dai nuengx gaej you，

Ngoenzneix mwngz bungz gou,

Gven dou bae bangcoh.

Mbwk:

Naeuz mbouj heiq mbouj heiq,

Duzmou geij bak maenz,

Dai liux cix mbouj baenz,

Ngaenz youq lawz aeu heih.

Sai:

Mou gaeq mbouj ndaej dai,

Cwzvaiz mbouj ndaej bingh,

Miz gou daeuj guh cingq,

Dingq vah mbouj lau goem(sied).

Mbwk:

Duz gaeq iq cix iq,

Dai le cix mbouj baenz,

Dajciengx naemj canh ngaenz,

Da raen mbouj yungzheih.

Sai:

Ciengx mou gaeq lau dai,

Raeuz caiq heij guhbuenq,

Raeuz guhdoih dajsuenq,

Guhbuenq hix ndaej ngaenz.

Mbwk:

Ndaw daeh mbouj miz ngaenz,

Baenzlawz ngeix guhbuenq,

Mwngz caiq rox dajsuenq,

Buenq gijmaz cungj nanz.

Sai:

Ngaenz noix cix buenq maenz,

Ngaenz lai cix buenq mak,

Ngoenz canh bak song bak,

Gag miz ngoenz fatcaiz.

Mbwk:

Gou hix naemj buenq mak,

Fajbak mbouj lumj vunz,

Aen lawz ndei cix gwn,

Lau vunz naeuz gou coengh(ngah).

Sai:

Mwngz mbouj dwg vunz yoq(ca),

Rox gwn youh rox gai,

Mwngz gwn ndaej geijlai,

Gangjvah gvai lumj enq.

Mbwk:

Gou yaek siengj gai mak,

Fajbak mbouj lumj vunz,

Boux gvaq laj gvaq gwnz,

Ndwn riu gou daengz haemh.

Sai:

Guhbuenq cix naeuz heiq,

Raeq reih lau dwgrengz,

Guh yienghneix mbouj deng,

Roengzrengz ra monzloh.

Mbwk:

Ndaej beix daeuj vix loh,

Buenq noh hix ndaej gwn,

Ganq baenz ngoenz baenz hwnz,

Lauheiq mwngz mbouj nyienh.

Sai:

Cijaeu mwngz gietdingh,

Gou buekmingh gaen laeng,

Buenq noh rox buenq baengz,

Naemj daengz mwngz cix guh.

Mbwk:

Siengj gaj mou buenq noh,

Yawj mbouj rox mou dai,

Bouxhuk gwn bouxgvai,

Lau sai ngaenz daengz hoengq.

Sai:

Mou ndei caeuq mou dai,

Da gvai yawj cix rox,

Mou dai mbouj baenz noh,

Lox vunz mbouj ndaej gwn.

Mbwk:

Siengj yaek bae buenq noh,

Rox vunz aeu mbouj aeu,

Gai mbouj liux cix haeu,

Aeu gijmaz ngaenz canh.

Sai:

Gou daengq mwngz dahnuengx,

Gaej luenh siengj baenzlai,

Gawq neix vunz fatcaiz,

Caeuzngaiz cungj gwn noh.

Mbwk:

Gou miz mwngz guh goek,

Byaij loek roen mbouj you,

Miz mwngz daeuj guh daeuz,

Ciuh neix gou miz baengh.

Sai:

Mwngz aeu gou guh baengh,

Gou caen haengj lailai,

Ngoenzcog raeuz fatcaiz,

Caeuzngaiz mbouj youheiq.

Mbwk:

Bouxlawz cix yaek rox,

Buenq noh hix fatcaiz,

Baengh mwngz ukgyaeuj gvai,

Siengj lai mbouj miz yungh.

（1）