Mboengqneix, Gvangjsih Minzcuz Dayoz Vwnzyoz Yen Minzcuz Yijyenz Gyauyenzsiz cujciz vunz daengz Ningzmingz Yen diuyenz, bae roxyiuj Ningzmingz Yen vahsaw minzcuz faenbouh caeuq sawjyungh cingzgvang, coengh henzguek siujsoq minzcuz fazcanj daez genyi ok geiqmaeuz.

Diuyenzcuj bae daengz Aiden Cin, doenggvaq caez naengh doxlwnh, ciengzsaeq roxyiuj gij cingzgvang mizgven dangdieg vahsaw minzcuz sawjyungh、 ciepswnj minzcuz vwnzva、 minzcuz gyauyuz fazcanj daengj. Diuyenzcuj daengz Ganh’ai Cunh Mbanjcienghgaeq、Mbanjbanj- ganh yawj gij yienghsiengq aen mbanj caeuq cingzgvang dangdieg, caemhcaiq bae yawj boux ndaej swcigih minzcuz doxgiet cinbu mozfan Ciuh Swnghding dem, dingq gij saehsaed senhcin de.

Youq Haijyenh Vazgyauz Nungzcangz Mbanjmoq Yauzcuz, diuyenzcuj doiq gij lizsij cauxbaenz、sawjyungh、vwnzva、fungsug sibgvenq、swnghcanj swnghhoz daengj dangdieg Yauzcuz guh ciendaez diuyenz. Youq ndaw ranz Ciuh Swnghhingh, diuyenzcuj bae diucaz yenzgiu gij yizsiz vwnzva Yauzcuz, damqra gyauhliuz gij vwnzva conzdungj caeuq fungsug.

Diuyenzcuj naeuz, Ningzmingz Yen dwg aen dieg miz Bouxgun、Bouxcuengh、Yauzcuz comzyouq, vahsaw fungfouq lai yiengh, gak minzcuz gij lizsij swhliu doxbyaij doxgyau doxyungz haenx sengdoengh laegdaeuq, dwg aen dieg Cungguek siujsoq minzcuz yijyenz vwnzyoz ciennieb sonlienh lijsiengj. Maqmuengh doenggvaq aen hozdung hagseng lienhguh haenx, lai vatcimh gij vwnzva swhyenz dangdieg, dajcauh vwnzva ginghdenj, lai coengh Gvangjsih hwnqguh aen gih guhyiengh couqmaenh gij eiqsik Cunghvaz Minzcuz ranz vunz ndeu.

（Liengz Funghgoz/梁峰阁 Liengz Yijcingz/梁宇晴）