Lungzingh lij naengh youq gwnz daengq liuh mbouj daengz Lij Danenz fatbag boek congz, haeux、byaek、raemxdang raix youq gwnz buh、vaq、haiz. Miz gijmaz vah gangj dem, samcib bi lauxdoengz yaepyet dekdoemq! Lauxbanj bouqhaeux naeuz: “Boek couh boek lo, sou gietsoq liux deuz suenq lo.”

Lungzingh ndwn hwnjdaeuj siengj deuz, lauxbanj naeuz:“Ngaenz byaek song bak maenz, bingz laeuj sam bak, vanj hajcib maenz, gungh haj bak hajcib maenz.” Lungzingh fwngz vix Lij Danenz naeuz:“Dwg de boek congz, mwngz cam de aeu.” Lij Danenz euqmengx naeuz:“Mbouj gven gou saeh, dwg lauxdoengz Vangz Gencingh rag gou daeuj, heuh de hai.” Daeglwg lauxbanj naeuz:“De ciep denva baenzlai nanz mbouj dauq……” Henz congz boux vunzmbwk coz ndeu naeuz:“Dauq gvaq, de daj gyae yawjraen song lauxdoengz neix doxceng boek congz le naengh ci deuz lo.”

Lij Danenz dingq le simvueng gaenjgip, vunz daeuj gwn haeux gig lai, de rag mauhbakbit hoemq daengz bwnda, de maegraen haujlai doiq lwgda nitsisi yawj de. Lungzingh ndwn hwnjdaeuj baet bae gij haeux、byaek nem gwnz buhvaq haenx, de cijnaengz nyaenxhoz nyaenxheiq, de roxnyinh daj doekseng daengz seizneix baez daih- it coujnaj, boux vunz guh seng’eiq ndeu bungzdaengz cungj saehcingz ngawz neix daih saetnaj lo, gij viyiemz vunzsai vit caez! Youq dangqnaj vunzlai, de beij souhcoih engq hojsouh, de sikhaek aeu soujgih okdaeuj, yungh veizsin sauj- maj song bak hajcib maenz ngaenz hawj bouqhaeux, gyau faenh de le lumj ndoj fangzraq nei byaij deuz, lw Lij Danenz gyaxgedged ndwn youq henz congz. Song boux vunzmbwk oiq beuj vanj haenx baet sauq gwnz namh, uet seuq congzhaeux, youh miz geij boux hek naengh roengz daengq bae, lauxbanj doiq Lij Danenz naeuz:“Mwngz ndwn giz doengjmok haenx bae, seizlawz gyau cienz daeuj seizlawz deuz.”

Boux vunzmbwk fugsaeh oiq ndeu sauq gij haeux byaek deng Lij Danenz boek gwnz namh haenx gyonj haeuj aen daehsuzliu ndeu bae, cam lauxbanj cuengq gizlawz bae? Lauxbanj naeuz:“Vut cuengq ndaw doengjmok bae, gai hawj vunz dawz bae gueng gaeq.” Vunzmbwk fugsaeh oiq gyae’gyae couh ndek daehsuzliu haenx haeuj doengjmok bae, lumj dwk giuz nei gig cinj ndek haeuj aen lamz haenx bae, raemxmok sinz deng vaq Lij Danenz, dumzdwddwd, de fwt roxnyinh daengx ndang saenzsoegsoeg, song din ndwn nanz le mazmwdmwd yaek ndwn mbouj maenh.

（37 sat）