Doengh boux hawj goeng lauxyez guh dajcab haenx, vunzlai vihmaz heuh gyoengqde mageq ne? Gangj gij goj neix couh roxnyinh miz yinxdaeuz lo.

Doenghbaez lajmbanj miz boux canghyw ndeu, vunzfouq vunzgungz daeuj yawj bingh de cungj dakdaih doxdoengz, caenhsim vih gyoengq- vunz yw bingh. Miz ngoenz ndeu, goeng lauxyez baij boux dajcab daeuj ranz boux canghyw, heuh de bae hawj goeng lauxyez yw bingh. De heuh boux dajcab gag yawj, ndaw ranz miz cib geij boux vunzbingh deq de yawj bingh, miz mbangj gaenq deq buenq ngoenz lo, de doiq boux dajcab naeuz:“Mwngz daeuj doeklaeng, couh deq gou hawj gyoengq beixnuengx neix yawj bingh sat le, cijndaej bae hawj goeng lauxyez yawj bingh.” Boux dajcab baez dingq doq ndatheiq, dacaengz boux canghyw fok: “Mwngz dafangz la, mbouj yawj gou dwg byawz ma? Goeng lauxyez heuh mwngz bae yawj bingh, mwngz gamj hawj goeng lauxyez youq ranz deq ha?” Boux canghyw naeuz: “Goeng lauxyez dwg vunzbingh, gyoengq vunzgungz neix caemh dwg vunzbingh, gou cij yawj byawz daeuj gonq byawz daeuj laeng, mboujlwnh byawz fouq byawz gungz.” Boux dajcab yinx najbyak boux canghyw maenj: “Mboenbyoedbyoed baenzlai guhmaz, gou cij cam mwngz coenz ndeu, mwngz bae mbouj bae?” Boux canghyw mbouj lau saek di, yawj boux dajcab riu naeuz: “Byawz naeuz mbouj bae, mbouj bae hawj vunzbingh yw bingh guhmaz canghyw? Haxbaenh gou gaenq gangj lo, hawj gyoengq vunzbingh neix yawj sat le, gou couh gaen mwngz bae lo.” Boux dajcab daemhdin hemqrumrum lumj mbwn yaek doemq, doq gaeb boux canghyw bae ranz goeng lauxyez.

Boux canghyw ngaiz boux dajcab gaeb bae ranz goeng lauxyez, youh hujhaemz youh siengsim. Hoeng raen goeng lauxyez le de couh nyaenx hoz nyaenx heiq lo. Seizneix goeng lauxyez dwg vunzbingh, de mbouj ndaej naj hoengz naj ndaem doiq boux vunzbingh. Goeng lauxyez faj ga ndeu baenz baez youqgaenj, baenz faj ga cungj ok nong lo, danghnaeuz ciuq baeznaengz yungh yw oep couh yw mbouj ndei lo. Goeng lauxyez baez dingq doq doeksaet, cam boux canghyw:“Baenzlawz cijndaej yw faj ga gou ndei ne?” Boux canghyw naeuz: “Raemj faj ga nong neix deuz, vuenh faj ga ndei ndeu ciep hawj mwngz, yienghneix couh ndaej yw ndei lo.” Goeng lauxyez nyienh’eiq dingq gij vah boux canghyw, hoeng yaek raemj faj ga byawz daeuj ciep ne? Boux canghyw ngvanh yaep ndeu, yinx boux dajcab doiq goeng lauxyez naeuz:“De caeuq lauxyez sang daemq doxdoengz, raemj faj ga de ciep faj ga lauxyez habdangq lo.” Boux dajcab mbat dingq boux canghyw baenzneix gangj saeknaj doq bienq bieg, lumjbaenz gaeq ngaiz dawz bae iem. Hoeng bingzseiz goeng lauxyez yinx baihdoeng de mbouj gamj byaij baih- sae, danghnaeuz de mbouj hawj raemj faj ga ciep hawj goeng lauxyez, goeng lauxyez couh raemj aen gyaeuj de lo. Boux canghyw dawz faj ga baenz baez goeng lauxyez raemj deuz, caiq raemj faj ga boux dajcab ciep hawj goeng lauxyez. Goeng lauxyez raen boux canghyw miz bonjsaeh baenzlai hung, baez yaepda doq ndaej raemj deuz faj ga nong de, caiq raemj faj ga ndei boux dajcab ciep hawj de, de riuvauvau. Boux dajcab raen faj ga ndei bonjfaenh ngaiz raemj bae ciep hawj goeng lauxyez, doeknaiq yaek dai, daejnga’nga doiq boux canghyw naeuz: “Seizneix gou lij lw faj ga ndeu lo, baezlaeng baenzlawz hawj goeng lauxyez buet hwnj buet roengz banhsaeh ne? Mwngz yaek siengj banhfap cimh faj ga ndei ndeu ciep hawj gou ha!” Boux canghyw cang guh riumbw naeuz: “Gijneix hawj gou gyaeujdot lo, byawz nyienh’eiq raemj faj ga ndei ciep hawj mwngz ne?” Goeng lauxyez raen boux dajcab daej baenzlai siengsim, caemh naeuz boux canghyw:“Baenzlawz cungj yaek caenhrengz ciep faj ga ndei hawj de.” Boux canghyw yawj duzma henzndang goeng lauxyez, baez ngvanh yaep ndeu, couh doiq goeng lauxyez naeuz:“Ga vunz cimh mbouj ndaej, yungh faj ga duz ma neix ciep hawj de, goeng lauxyez hawj mbouj ne?” Goeng lauxyez ngeix yaep ndeu, boux dajcab vih swhgeij guh saeh geijlai bi, yienznaeuz de caemh gyaez duz ma neix, hoeng de sij ndaej raemj faj ga ma ciep hawj boux dajcab. Boux canghyw doq raemj faj ga ma ciep hawj boux dajcab. Daj seizneix hwnj, gyoengqvunz raen boux dajcab faj ga ndeu dwg ga vunz, faj ga ndeu dwg ga ma, couh heuh de mageq.

Gvaqlaeng, doengh boux hawj goeng lauxyez guh dajcab haenx, vunzlai couh heuh gyoengqde mageq.