Mboengqneix, diuzloh hwnqmoq Yinznanz Vwnzsanh daengz Gvangjsih Cingsih Dietloh（baihlaj heuh “Vwnz Cing Dietloh”） hanghmoeg gensez yungh dieg yawhsaemj ndaej Swyenz Swhyenzbu baefuk, baefuk yungh dieg yawhsaemj najdieg 125 gunghgingj.

Vwnz Cing Dietloh dwg guekgya “cibseiq haj” gviveh gensez hanghmoeg, liedhaeuj guekgya 《Gij Gviveh Muengx Dietloh Geiz Raez Rauh》, dwg dingz gapbaenz youqgaenj dietloh henzguek Yinznanz Gvangjsih, hix dwg diuz dietloh daihsam gaenlaeng Nanz Gunh Dietloh、Nanz Gunh Gwzconh lienz Yinznanz Gvangjsih song swngjgih, dwg diuzloh canloz youqgaenj henzguek saenamz. Guh hanghmoeg, ndaej dienzbouj dieghoengq lohmuengx dieg henzguek saenamz, cauhlaeb guhbaenz loh ok haij youqgaenj、loh Yinznanz Gvangjsih lienzciep saenamz Yinznanz, doinyoengx diegguek haifat、hwng bien fouq minz, coihaeuj gij saehnieb minzcuz doxgiet guh baenaj.

Aen hanghmoeg neix youq ndaw gyaiq Yinznanz Vwnzsanh Boux- cuengh Myauzcuz Swcicouh caeuq Gvangjsih Bwzswz Si, raez daihgaiq 284 goengleix, ndawde ndaw gyaiq Gvangjsih raez daihgaiq 81 goengleix, gungh roengzgoek daihgaiq 357 ik maenz, dajveh guh 5 bi. Diuzloh haidin dwg Camh Cingsih Denz Cing Dietloh seizneix miz haenx, gonqlaeng gvaq Gvangjsih Cingsih Si、Nazboh Yen, Yinznanz Funingz Yen、Gvangjnanz Yen、Yensanh Yen、Vwnzsanh Si, satbyai dwg Camh Vwnzsanh Vwnz Mungz Dietloh cingq guh haenx. Daengx diuz loh gungh laeb 24 aen camh, dajveh hai vaiq diemj cung 160 goengleix.

Vih cinjdeng baujcang duenh Gvangjsih hanghmoeg yungh dieg, Swcigih Swyenz Swhyenzdingh cawjdoengh lienzhaeh mizgven si、yienh nangqdaengz hanghmoeg haenx, dungjcouz doihaeuj hong hanghmoeg yungh dieg yawhsaemj. Gvangjsih Swyenz Swhyenz Swnghdai Siuhfu Cunghsinh gapbaenz aen doih guhhong, daezgonq haeuj daengz hong baihgonq hanghmoeg, doenggvaq daengz dieg yawj guhndei hanghmoeg senj dieg senj sienq, bang hanghmoeg yungh dieg yawhsaemj gvaq ndaej swnh dwkroengz giekdaej.

(daj 《Gvangjsih Yizbau》 aeu daeuj hoiz Dangz Gvangjswngh Vangz Sangningz Suh Gvanmingz)