第十四期

原文：

1934年11月，中央红军长征途中，各个军团陆续抵达汝城县文明圩，驻扎在文明、沙洲等地，并在此休整。3位疲惫不堪的女红军借宿在沙洲村瑶族村民徐解秀家。

这是一户赤贫的家庭：破旧的茅屋里，一张用楠竹钉成的床架，几乎是家里唯一的大件家具。床上垫着稻草、铺着破席，盖的是一堆烂棉絮，连一条完整的被子都没有。

女红军们的行装里，带着一条棉被。晚上，徐解秀就和3位女红军合盖这一条被子，挤在唯一的楠竹床上，而男主人则睡在门口的草堆上守护着她们。

3位女红军与徐解秀同吃同住同劳动，还帮着徐解秀烧火煮饭，空闲时给徐解秀夫妇讲革命道理。几天后，女红军们要上路了，她们决定把被子留给这户贫苦的人家，但徐解秀夫妇说什么也不肯接受。争执间，一位女红军从背包中摸出一把剪刀，把被子剪成了两半，将半条被子留给徐解秀，并对她说，等革命成功以后，一定要送她一条完整的新棉被。接过半条被子，徐解秀一句话也说不出，眼泪哗哗地流了下来……

后来，革命胜利了，国家富强了，徐解秀家也丰衣足食了，但那半条被子的热度，一直温暖着徐解秀的内心。

徐解秀等了几十年，一直没等回3位女红军。上世纪80年代，“半条被子”的故事经媒体报道后，邓颖超、蔡畅、康克清等参加过长征的老同志，在全国开展了寻找3位女红军的活动，可惜没有找到她们的下落。后来，邓颖超等老同志托人给徐解秀送去一条新被子。

——“道中华”微信公众号《“半条被子”的故事：以初心，赢民心｜总书记讲过的民族团结进步故事》（节选）

译文：

It

1934 nienz 11 nyied, Cunghyangh Hungzginh youq buenqroen cangzcwngh, aen dem aen ginhdonz daeuj daengz Yujcwngz Yen Hawvwnzmingz, capyouq Vwnzmingz、Sahcouh daengj dieg, caemhcaiq youq doengh giz neix yietnaiq. 3 dah hungzginh naiqyaiyai de ciq ranz Yauzcuz Mbanjsahcouh Ciz Gaijsiu ninz.

Ranz neix dwg ranz hojndoq ndeu: Ndaw ranzhaz rwixrix de, ngamq raen aen congzndoek ndeu, yiengh wnq cungj mbouj raen miz. Gwnz congz aeu fiengz demh daej、mbinj rwix beiq gwnz, yiengh goemq dwg dong faiqlanz rwix ndeu, lienz naj moeg ndei ndeu cungj mbouj miz.

Gyoengq dah hungzginh raek miz naj moegdenz ndeu riengz ndang. Gyanghaemh, Ciz Gaijsiu couh caeuq 3 dah hungzginh caemh goemq naj moeg neix, caenx youq aen mbonqndoek dog neix, goeng bouxcawj cix ninz youq dong nywj bakdou dawz gyoengqde.

3 dah hungzginh caeuq Ciz Gaijsiu caemh gwn caemh ninz caemh guhhong, lij bang Ciz Gaijsiu ndaengj feiz rung haeux, seizhoengq couh gangj gwzming dauhleix hawj song bohmeh Ciz Gaijsiu nyi. Gvaq ndaej geij ngoenz, doengh dah hungzginh yaek deuz lo, gyoengqde roengzsim ce naj moeg neix hawj ranzvunz gungzhoj neix, hoeng song bohmeh Ciz Gaijsiu gangj gijmaz cungj mbouj aeu. Youq mwh ceng bae ceng dauq, dah hungzginh ndeu daj ndaw daeh- aemq lumh ok fag geuz ndeu, raed naj moeg neix baenz song naj, ce buenq naj hawj Ciz Gaijsiu le, naeuz de dwg, caj gwzming ndaej hingz le, itdingh soengq naj moegdenz youh moq youh ndei ndeu hawj de. Deq gvaq buenq naj moeg, Ciz Gaijsiu gijmaz cungj gangj mbouj ok, raemxda lae lumj fwn doek nei……

Doeklaeng, gwzming ndaej hingz le, guekgya giengzak le, ranz Ciz Gaijsiu hix miz gwn miz daenj lo, hoeng buenq naj moeg de lij raeujrubrub, hawj aen sim Ciz Gaijsiu seizseiz cungj raeujrub.

Ciz Gaijsiu caj le geij cib bi, hix caj mbouj daengz 3 dah hungzginh dauqma. Aen sigij gonq 80 nienzdaih, aen gojgaeq “buenq naj moeg” ndaej meizdij baudauj le, doengh boux dungzci geq Dwng Yingjcauh、Cai Cang、Gangh Gwzcingh daengj byaij gvaq cangzcwngh de, youq daengx guek guh le yienghsaeh ra 3 dah hungzginh, hoeng mbouj miz vunz rox gyoengqde youq gizlawz. Doeklaeng, Dwng Yingjcauh daengj gyoengq dungzci geq dak vunz soengq hawj Ciz Gaijsiu naj moeg moq ndeu.

（北京市海淀区：王秋娜/Vangz Ciuhnaz）

Ngeih

1934 nienz 11 nyied, Cunghyangh Hungzginh cangz- cwngh gyangloh, gak aen ginhdonz laebdaeb bae daengz Yujcwngz Yen Hawvwnzmingz, capyouq Vwnzmingz、Sahcouh daengj dieg, caemhcaiq youq neix yietnaiq cingjceih. Sam boux hungzginh mehmbwk naiqnueknuek dozyouq Mbanjsahcouh vunzmbanj Yauz- cuz ranz Ciz Gaijsiu.

Neix dwg ranz gig gungzhoj he: Ndaw ranzhaz rwixrengq, aen gahmbonq aeu faexndoek dok baenz haenx, couh dwg ndaw ranz yiengh gyahgi ceiq hung ndeu lo. Gwnz mbonq demh fiengz, biq sat rwix, gij goemq dwg doi faiq rwix he, lienz fan denz ndei ndeu hix mbouj miz.

Youq ndaw daehhingzlij gyoengq hungzginh mehmbwk, miz fan denzfaiq ndeu. Gyanghaemh, Ciz Gaijsiu couh caeuq sam boux hungzginh mehmbwk caemh goemq fan denzfaiq neix, caenx youq gwnz aen mbonq faexndoek neix, bouxcawj goengsai cix ninz youq gwnz doi nywj bakdou soujhoh gyoengqde.

Sam boux hungzginh mehmbwk caeuq Ciz Gaijsiu caemh gwn caemh youq caemh guhhong, lij bang Ciz Gaijsiu cawj haeux byaek dem, ndaejhoengq seiz couh gangj gij dauhleix gwzming hawj gvanbaz Ciz Gaijsiu dingq. Geij ngoenz le, gyoengq hungzginh mehmbwk yaek hwnjroen lo, gyoengqde gietdingh dawz fan denzfaiq neix louz hawj ranz gungzhoj neix. Hoeng gvanbaz Ciz Gaijsiu baenzlawz naeuz hix mbouj haengj ciepsouh. Ceng bae ceng dauq seiz, boux hungzginh mehmbwk ndeu daj ndaw daeh’aemq mo fag geuz he okdaeuj, dawz fandenz raed baenz song buenq, dawz buenq denzfaiq he louz hawj Ciz Gaijsiu, caemhcaiq doiq de naeuz, caj daengz gwzming cwngzgungh le, itdingh soengq fan denz ndei he hawj de. Ciep gvaq mbiengj fan denz, Ciz Gaijsiu coenz vah he hix gangj mbouj ok, raemxda laefafa roengzdaeuj……

Doeklaeng, gwzming swngli lo, guekgya fouqgiengz lo. Ranz Ciz Gaijsiu hix gwn imq daenj raeuj lo, hoeng gij ndatdoh buenq fan denz, itcig raeujrub ndaw sim Ciz Gaijsiu.

Ciz Gaijsiu caj liux geij cib bi, cungj caj mbouj daengz sam boux hungzginh mehmbwk dauq. Sigij gonq 80 nienzdaih, aen goj “buenq fan denz” ginggvaq meizdij baudauj le, Dwng Yingjcauh、Cai Cang、Gangh Gwzcingh daengj doengh boux lauj dungzci camgya cangzcwngh haenx, youq daengx guek mbehai hozdung ra sam boux hungzginh mehmbwk, hojsik mbouj ra raen gyoengqde. Doeklaeng, Dwng Yingjcauh daengj lauj dungzci dak vunz soengq fan denz moq ndeu bae hawj Ciz Gaijsiu.

（南宁市青秀区：欧阳惠月/Ouhyangz Veiyez）

Sam

1934 nienz 11 nyied, gwnz roen Cunghyangh Hungzginh cangzcwngh, gak aen ginhdonz laebdaeb daeuj daengz Haw- vwnzmingz Yujcwngz Yen, capyouq ranghdieg Vwnzmingz、Sahcouh daengj, caemhcaiq youq gizneix yietbaeg cingjhab. Sam boux hungzginh mbwk doixnangnang ciq dozyouq ranz Ciz Gaijsiu boux vunzmbanj Yauzcuz Mbanjsahcouh neix.

Neix dwg ranz gungzhoj raixcaix ndeu: Ndaw aen ranzhaz vaihvad, gyaq congz aeu faexcuk doq baenz ndeu, ca mbouj geijlai dwg ndaw ranz aen gyahgi hung dandog ndeu. Gwnz congz yungh fiengz demh dwk, bu mbaw demx vaih ndeu, aeu bo faiqyungz vaih ndeu daeuj guh denz, mbouj miz saek fan denz caezcup ndeu.

Ndaw baufug gyoengq hungzginh mbwk, daiq daeuj fan denz ndeu. Doengxhaemh, Ciz Gaijsiu couh caeuq sam boux hungzginh mbwk doxcaez yungh fan denz neix, caenx youq gwnz congzfaexcuk dandog, bouxcawj sai cix ninz gwnz bo nywj bakdou henhoh gyoengqde.

Sam boux hungzginh mbwk caeuq Ciz Gaijsiu caez gwn caez youq caez guhhong, lij bang Ciz Gaijsiu ndaengj feiz cawj ngaiz dem, seiz ndaejhoengq couh naeuz gij dauhleix gwzming hawj song gvanbaz Ciz Gaijsiu rox. Geij ngoenz gvaqlaeng, gyoengq hungzginh mbwk yaek hwnjroen lo, gyoengqde gietdingh aeu fan denz hawj ranz gungzhoj neix, hoeng song gvanbaz Ciz Gaijsiu guhlawz goj mbouj ei aeu. Mwh doxceng, boux hungzginh mbwk ndeu daj ndaw daehraek mbon ok fag geuz ndeu, daet fan denz guh song mbiengj, aeu mbiengj ndeu hawj Ciz Gaijsiu, caemhcaiq naeuz de, caj gwzming baenz yaq, itdingh soengq hawj de fan denz moq caezcup ndeu. Raeb aeu byongh mbiengj fandenz, Ciz Gaijsiu gangj mbouj ok saek coenz, raemxda doekbyoegbyoeg……

Doeklaeng, gwzming baenz yaq, guekgya fouqak lo, ranz Ciz Gaijsiu goj gwndaenj mbouj you lo, hoeng byongh mbiengj fandenz raeujrub haenx, daengz seizneix lij hawj Ciz Gaijsiu ndawsim raen raeujrubrub.

Ciz Gaijsiu caj le geij cib bi, guhlawz cungj caj mbouj raen sam boux hungzginh mbwk haenx dauq. Sigij gonq 80 nienzdaih, aen goj “byongh mbiengj fandenz” ginggvaq meizdij baudauj gvaqlaeng, Dwng Yingjcauh、Cai Cang、Gangh Gwzcingh geij boux dungzci geq camgya gvaq cangzcwngh neix, youq daengx guek haiguh gij hozdung ra sam boux hungzginh mbwk, doeknaiq lij dwg ra mbouj raen riz gyoengqde. Doeklaeng Dwng Yingjcauh geij boux dungzci geq dak vunz soengq fan denz moq ndeu bae hawj Ciz Gaijsiu.

（靖西市：翟芳婷/Cwz Fanghdingz）

（2）