Youq geij ngoenz gonq, ndaw ginz Lujyen 23 ban cienz daeuj haujlai siusik ndei: Bouxboux doengzhag youq 《Minzcuz Vwnzyoz》fatbiuj sawcuenh lo; bouxboux doengzhag youq 《Cozbinj》 fatbiuj sanjvwnz lo…… Gou angq raixcaix, raen gyoengqde youq ndaw ginz baenzneix nauhyied, gou couh ngeixdauq cingzgingj mwh gou youq Lujyen haenx.

Ndaejgeiq bi 2016 ndwencieng ngoenz 11, gou youq laeng baengzyoux gwn haeux seiz, ciep daengz le si vwnzlenz denva dunghcih, naeuz gou gaenq deng Gvangjsih Cozgyah Hezvei doigawj daengz Baekging Luj Sin Vwnzyozyen bae camgya vwnzyoz beizyin, yaek bae samcib caet ngoenz. Gou doeksaet lo, cenjlaeuj angq haenx youq dangqnaj vunzlai dingz roengzdaeuj, sikhaek gangj mbouj ok vah daeuj.

Gangj vahsaed, neix dwg gij saeh ciuhvunz gou fangzhwnzloq hix siengj mbouj daengz haenx, gou doiq daihgya gangj:“Gwn laeuj, haemhneix mbouj fiz mbouj dauqbae!” Haemhhaenx, gou laeuj fiz lo, sim hix fiz lo.

Ngeixdauq 20 lai bi daeuj, gij saeh yo youq ndaw sim gou mbouj miz vunz rox haenx couhdwg aen loqsiengj vwnzyoz, aen loqsiengj neix, moix haemh cungj youq ndaw fangzhwnz gou, hoeng ndiu gvaqdaeuj cix dauq dwg song fwngz hoengq. Yienghneix, gou cijndaej youq laj nditndat youh ngeixnaemj gij hoenz vwnzyoz.

Duenh seizgan haenx, gou cingq youq mbanj rog bang vunz cang ranz, vihliux conz ngaenz ciengx gya, ngoenzngoenz laep haeuj laep ok.

3 nyied 16 hauh, gou cingqsik ciep ndaej Luj Sin Vwnzyozyen luzcij dunghcihsuh. Gwn caeuz le, mehyah cam gou: “Aen ranz mwngz bae cang haenx baenzlawz yiengh? Miz mbouj miz ngaenzci bae?” Gou naeuz: “Aen ranz cang mbouj liux, baenzlawz ndei hai bak cam bouxcawj aeu cienz? ”

Mehyah gou youq gwnz haw baij dan gai byaek, banhaemh couh aeu byaek bwh ndei. De hwnjdaeuj cang byaekheu roengz ndaw loz hung bae, yienzhaeuh daj gwnz sahfaz dawz aen daeh de cang ngaenz haenx hwnjdaeuj, daj ndaw daeh dawz gij cienz de gai byaek ndaej haenx okdaeuj, baez mbaw baez mbaw geq dwk, haj maenz、 cib maenz naenx youq gwnz fwngz de, geq bae geq dauq baenzlawz cungj geq mbouj gaeuq bak maenz.

Mehyah cuengq cienz ma ndaw daeh, yaeng’yaeng rag diuz lienh, youh cam:“Dwg 4 nyied 5 hauh hwnjdin lwi?” Gou ngaekngaek gyaeuj.

Mehyah mbouj gangj vah, gou hix mwnh youq gwnz sahfaz.

Haemhhaenx gou ninz mbouj ndaek lo.

Seizgan yied daeuj yied gyawj lo, aen sim gou yied daeuj yied vueng.

4 nyied 4 hauh, gou dawz cib lai duz moulwg bae gai lo. Mehyah aeu song cien maenz ngaenz oet haeuj fwngz gou daeuj, de naeuz:“Vaiq, vaiq hwnj ci ba, seizgan mbouj gib lo.” Gou aemq aen daeh, vad fwngz caeuq mehyah doxbiek, hwnj ci bae lo……

Daengz Namzningz le, gou naengh dungceh bae Baek- ging. Dungceh youq ndaw bya ndaw rungh buetvubvub, gou youq henz conghcueng yawj funghgingj guekcoj. Gou mboujcaengz okdou gyae gvaq, raen gij gingjsaek baihrog caen dwg ndei. Gou dwg boux beksingq ndeu, roxnaeuz dwg baez daih’it okdou bae gyae, gou angqvauvau youq ndaw ci siengj daengz gij yienghceij Baekging, mbouj rox baenzlawz couh yat ok souj go 《Naengh Ci Gauhdez Bae Baekging》 daeuj:

Gou dwg boux beksingq,

Naengh ci bae Baekging;

Ok rog yawj seiqgyaiq,

Sim gou diuq mbouj dingz.

Gou dwg boux beksingq,

Angq haeujbae gingsingz;

Seiqvunz raen soujduh,

Raemxda lae mbouj dingz.

Gou dwg boux beksingq,

Bae Lujyen aeu ging;

Va vwnzyoz hai nding,

Gou mbouj lumz aencingz.

Haemhhaenx 9 diemj, dungceh hai haeuj Baekging Sihcan bae. Seizcin, baihnamz gaenq va hai roeg heuh, hoengheiq raeujrubrub, hoeng Baekging lij dwg heiq nit bik vunz, fwnmoenq foenxfoenx.

4 nyied 7 hauh, daih 23 geiz siujsoq minzcuz vwnzyoz cauhguh beizyinbanh haihag denjlij gawjhengz. Daj daengx guek 12 aen siujsoq minzcuz swngjsi caeuq digih ndawde 49 boux canghraiz doxcomz daengz Lujyen daeuj, guhdoih doh gvaq duenh seizgan gyaeundei ndeu.

Gij saedceij riengzlaeng couhdwg hainduj son’gyauq cauhguh minzcuz vwnzyoz.

Geij ngoenz daeuj, miz haujlai bozsw caeuq cawjbien、benhciz daeuj hwnjdangz, hawj gou youq ndaw seiqgyaiq vwnzyoz raen lai raen gvangq.

Daeuj Lujyen hagsib, seizgan ngoenz gvaq ngoenz, caencingq rox gij vunz Gvangjsih youq Baekging guhhong haenx gig noix. Vihliux ra “vunz Gvangjsih Baekging”, 4 nyied 23 hauh singhgiz roek banhaet, ginggvaq boux canghraiz Gvangjsih Sanglinz Yen Cinz Ginanz lauxsae lienzhaeh, lienzhaeh daengz Cungguek boux “Byavuengz” “Cwzvangz” canghveh Lanz Gengangh. Youq caengz hwnjdin bae Lujyen gaxgonq, gou rox Lanz lauxsae hix dwg vunz Sanglinz Yen. Bi 1995, Lanz lauxsae dwg boux cizgungh Sanglinz Yen nungzhangz ndeu. Youq mwh dangsaeh, de maij vehveh, gaenq bae baiq canghveh Loz Dingjvaz guh saefouh. Doeklaeng, Lanz Gengangh daj nungzhangz swzhong okdaeuj, bouxdog hwnj Baekging bae cienmonz vehveh.

Lajbyonghngoenz 4 diemj, dou daj ranz Lanz lauxsae okdaeuj lo, Lanz lauxsae soengq dou duenh loh ndeu, youq gwnz roen, de caencingz gangjnaeuz:“Canghraiz hix caeuq canghveh ityiengh, ra ok gij daezcaiz caeuq vunzlai mbouj doengz haenx bae sij bae veh, dwg gij yinhsu ndaej baenzgoeng. ”

4 nyied 26 hauh, dwg dou bae giz dieg saekhoengz guh hozdung sevei saedhengz.

Lajbyonghngoenz, dou daj Baekging hwnjroen naengh feihgih daengz Anhveih Vangzsanh, ngoenz daihngeih, dou naengh lijyouz dabah daeuj daengz aen lajmbanj Cungguek ceiq gyaeundei Gyanghsih Muyenz haenx.

Ngoenzhaenx, dou youh daeuj daengz “mbanj dieg vunz hungmbwk”——Gyanghvanh.

Gyanghvanh dwg diegcoj Gyangh Cwzminz, gizneix raemx bya doxheux, rumz cifefe, doxgaiq fouqmiz、dauqcawq hoenghhwdhwd, vunz dieg doxhuz, dauqcawq dwg bingzan gyaeundei.

4 nyied 29 hauh, lijyouz dabah menhmenh hai coh gizdieg gwzming——Cingjganghsanh.

Ciep roengzdaeuj couh bae yawj Vangzyangzgai Baksauq lo. 1928 nienz 8 nyied 30 hauh, Vangzyangzgai Baujveican couh fatseng youq gizneix. Doenghbaez gij bing vunzdig seiq aen donz hoenx gizhaenx, gij bing raeuz ngamq miz aen yingz ndeu, gig yungyiemj, donz、 dangj cujciz gietdingh souj maenh gij saenqsim Cingjganghsanh, aeu aen fuengfap mizmingz noix hingz lai haenx bae hoenxbaih vunzdig song baez, doeklaeng ndaej hingz lo. Gou ndwn youq gizdieg bihaenx yungh daihbauq bae dwk vunzdig haenx, lumh aen bakbauq, roxnyinh gij ndat haenx lij lix, gij siuoenq haenx lij youq.

5 nyied 10 hauh, yozyen hai hoihlaeuj. Haemhhaenx, youq ndawsim moix boux hagseng cungj gig cingcuj: Raeuz couh aeu doxbyag lo! Youq gwn laeuj haemhde, Cau Feih lauxsae ciengq le hot go 《Soengq Canyouj》, de naeuz: “Gwnz biengz mbouj miz gij daizlaeuj mbouj sanq haenx, raeuz daj mbouj doengz deihfueng aen minzcuz mbouj doengz de doxcomz youq neix, ngoenzcog daihgya couh aeu caeuq Lujyen gangj caiqraen lo, gou yungh souj go neix daibyauj gij simcingz gou, soengq sou duenh roen ndeu……” 49 aen cenj laeuj, 49 faenh caencingz yaengx sang, gij cingz lumj laeuj get ityiengh.

Gij foux Sinhgyangh diuq hwnjdaeuj lo, gij fwen Yinznanz ciengq hwnjdaeuj lo, gij foux Bouxcuengh biu hwnjdaeuj lo…… Baenzhaemh, sing go rwenz deih, gij sing diuqdoengh haenx coi ndaej gyoengqvunz bouxboux naiqnueknuek, youq ndaw laeuj camca, cuengq ok cungj gikcingz minzcuz doxgiet ndeu. Gou fiz lo, raemxda lae daeuj moengzmoengz loengzloengz.

5 nyied 11 hauh, gyoengq doengzhag riengz singsing “caiqraen”, lumj duz roegenq nei byaij ok bakdou ranz Lujyen bae, gou caen miz di cuengq mbouj roengz gofaex gova Lujyen. Hoeng neix dauqdaej mbouj dwg gizdieg gwndaenj gou, gou cijndaej caiq bae muengh Lujyen baez ndeu, doeklaeng mbouj byag le yaek byag dwk byaij hwnj diuz roen dauqma!