Denzdungh Yen aeu couqmaenh gij eiqsik Cunghvaz Minzcuz ranz vunz ndeu guh sienqmeh, yungzhab ndei cauhlaeb minzcuz doxgiet baenaj caeuq hwnqguh mbanj siujsoq minzcuz miz daegsaek, doenggvaq vwnzva lijyouz hanghmoeg daiqdoengh、 cingcinj douzcuengq ngaenz、 giekdaej canjnieb swnggaep、 minzcuz rengzhab gietcomz daengj fuengfap, doidoengh 12 aen mbanj miz rengzhoengh moq, vih lajmbanj saenqhwng dwk haeuj minzcuz rengzdoengh haenqrem.

Vwnzva lijyouz yungzhab giklix rengz hwngfat. Aen yienh neix hopheux baujhoh caeuq hwngfat mbanj minzcuz miz daegsaek, cingcinj doiqciep gij swhyenz baihgwnz, Siengzcouh Cin aen mbanj guhyiengh Lungzdanz Lingzhuz Dieg Baeyouz ndaej senj guh 2024 nienz Gvangjsih hwnqguh mbanj minzcuz caeuq lajmbanj lijyouz yungzhab hwngfat sawqdiemj, ndaej 300 fanh maenz cienhangh bangfuz, yaek cauh 6 aen cwngzbinj minzsuz、 4655 bingzfanghmij diegdajcaemx caeuq aen fai lanz raemx ndeu; Mbanjdano yungh 80 fanh maenz ngaenz hwngfat siujsoq minzcuz cunghyangh, saedhengz cingjceih gij vanzging vunz youq, gaijcauh haenzdah caeuq cang gvanj baizuq. Gij hanghmoeg neix cienzbouh guh caez le, yawhgeiq moix bi hekyouz lai 40%, daiqdoengh aen mbanj bi lai canh mauhgvaq 25 fanh maenz, laebhwnj aen gwzgiz hwngfat moq “minzcuz funghcingz + swnghdai lijyouz”.

Ngaenzcienz geuhdoengh yauqik lai baenzboix. Gaenh sam bi neix, Denzdungh Yen cingjhab gak gaep gij ngaenz hwngfat siujsoq minzcuz 2254 fanh maenz, douz haeuj 22 aen mbanj 22 aen hanghmoeg bae. Ndawde 600 fanh maenz guh roen、 gung raemx daengj minzswngh gunghcwngz, 964 fanh maenz bangfuz geiq soengq doxgaiq、 minzsuz、dajciengx daengj canjnieb miz daegsaek. Doenggvaq cingsaeq guenjleix, moix maenz ngaenz cienhangh daiqdoengh gij ngaenz sevei douzhaeuj 3 maenz doxhwnj, doidoengh 6 aen mbanj ginghci bi ruqyaeng demgya mauhgvaq 15%, hawj “ngaenz iq” miz “yauqik hung”.

Baenz youq baenz hong veh baenz fukveh minzswngh. Daengx yienh guhbaenz dajndongj roen ndaw mbanj 18 goengleix、 3 giz gunghcwngz gyoebcomz gung raemx, hawj 1200 lai hoh beksingq ndaej ik; 7 aen hanghmoeg ceihleix raemxuq cwgoemq daengz vunzmbanj ciengzseiz youq haenx 85% doxhwnj. Gungganq minzsuz lajmbanj 15 ranz、 ranz doxgaiq fwngzguh minzcuz 2 aen, daiqdoengh 320 lai boux siujsoq minzcuz ginzcung youq bakdou ranz guhhong, moix vunz bingzyaenz bi lai souhaeuj daihgaiq 1.8 fanh maenz, aen mbanj ndeu bienqbaenz mbanj guhyiengh Gvangjsih.

Minzcuz doxgiet gietcomz rengzhab saenqhwng. Aeu hanghmoeg guh cag doxciep, guh hozdung “minzcuz caemhguh” 36 ciengzbaez, cwgoemq daengz gak cuz ginzcung 2800 lai vunzbaez. Gaijcauh mbanj supnab Bouxgun、 Bouxcuengh、 Yauzcuz daengj vunz guhhong lai minzcuz, siujsoq minzcuz ciemq baenz 65%, dan hanghmoeg mbanj guhyiengh couh daiqdoengh gij mbanj seiqhenz 87 vunz bakdou ranz guhhong, moix vunz bingzyaenz lai souhaeuj 6000 maenz doxhwnj. Doenggvaq vwnzva baujhoh caeuq canjnieb hwngfat, coihaeuj gak minzcuz cingzgamj lienzgiet, hawj mbanj minzcuz miz daegsaek bienqbaenz aen bingzdaiz saedhengz sengdoengh couqmaenh gij eiqsik Cunghvaz Minzcuz ranz vunz ndeu.

(Yauz Dunhboh/姚敦波）