Genj baenz buenq lai diemj cung, gyoengqde genj ok song duz moulwg, duz ndeu samcib gouj gaen, duz ndeu seiqcib sam gaen. Ciuq gwnz haw gaen cibhaj maenz daeuj suenq, Nuengxcaet sikhaek sou ndaej cien lai maenz ngaenz. Gou raen de gwn haeuxringz angqfwngfwng, lij lai gwn vanj haeux ndeu. Nuengxcaet naeuz, ranz Loz Huzlungz ciengx mou gvaq, rox genj mou, genj le song duz ceiq ndei haenx. Cingqcaen, gou raen boux doengzhag gou cang song duz moulwg hwnj gwnz ci sam loek bae, song gvanbaz gangjgangj riuriu simhai raixcaix. Ngamq gek song ngoenz youh daengz ngoenzhaw Linzdung, Nuengxcaet caeuq nuengxbawx baez ndeu couh dawz cib geij duz moulwg bae gai, baij dan mbouj daengz diemj cung ndeu couh gai liux lo. Lij miz ranz ndeu cawx mbouj ndaej, gyanghaemh hixnaengz hai ci sam loek daeuj ndaw ranz cawx aeu haj duz. Yawj yienghceij, Nuengxcaet buek moulwg neix gig vaiq couh gai liux lo.

Ngamq gwn ngaiz liux, gou sibgvenq ninzringz lij caengz gaij gvaqdaeuj, hoeng Nuengxcaet cix mbouj ndaej yietnaiq, de ciepdwk hai aennienjhaeux, bwh ndei haeux mou ngoenz daihngeih gwn. Nuengxcaet gyoengqde caen nyaengq lai lo.

Seiq

Baezbaez daengz gaiqreih bingzbwd neix, gou couh ngeix daengz gij saeh mwh lij iq dwkgyangq. Gaiq diegbingz neix miz song sam faen gvangq, suenq dwg gyawj ranz gaiq reih ceiq gvangq ndeu lo. Ndaw mbanj benq diegbingz hung gizyawz caemh miz, hoeng mbouj rox vih gijmaz, mwh lij iq bibi ndwencieng geij ngoenz de, daengx mbanj bouxlaux lwgnyez, mboujguenj bouxsai mehmbwk, cungj maij doxcomz daeuj gizneix doxdax dwkgyangq. Seizneix ngeix hwnjdaeuj, neix wnggai couh dwg Mbanjlinzyi doenghbaez aen “yindungvei” ceiq angqyangz lo.

Mbanjlinzyi cungj dwg vunz Bouxcuengh youq, cungj dieglueg neix, youq baihsae caeuq baihsaebaek Guengjsae dauqcawq cungj miz. Daj giz hung daeuj yawj, neix dwg gizdieg henzbien Diegsang Yinzgvei, gwnz deihdoz yienh okdaeuj dwg dieg rinbya riengz baenz benq, gwnz saw sij dwg ranghdieg Saenamz dieg gajswhdwz. Youq ranghdieg rin bya neix, miz haujlai aen dieglueg hunghung iqiq, Mbanjlinzyi cij dwg dieglueg ndawde aen mbouj suenq hung ndeu, ceiq lai seiz gizneix miz cib geij ranz, seizneix aen ranz lij dwg miz cib geij aen, hoeng ciengz bi youq ndaw mbanj youq haenx gaenq gig noix lo, miz geij ranz ok rog bae dajgoeng, mbouj miz vunz youq ranz. Mbanjlinzyi bienq ndaej ceiq hung couh dwg miz diuz goengloh suijniz heux mbanj caeuq samcib haj aen lohdaeng daiyangznwngz hopheux mbanj. Diuz loh neix soh riengz doeng rog mbanj Fungsanh Yen lajmbanj diuz roen hung ndeu——Sienq Giujlah, lij lienzciep diuz goengloh gauhsuz Denh Bah, daj Denhngoz Yen daengz Bahmaj Yen ngamq doeng ci mbouj geijlai nanz. Hoeng Denh Bah Gauhsuz couh dwg guek raeuz Saenamz diuz doengloh cujyau ndeu——Diuz goengloh gauhsuz Gvei(yangz) Bwz(haij) ndawde duenh loh ndeu, neix couh hawj Mbanjlinzyi youq ndaw bya lueg laeg haenx, yungh mbouj daengz cibhaj faen cung couh ndaej lienz hwnj gauhsuz, sikhaek caeuq aen seiqgyaiq baihrog doxlienz hwnjdaeuj. Gangj daengz aendaeng, de ciepswnj gij rongh daengngoenz, haemhhaemh hawj Mbanjlinzyi cien bak bi daeuj laepnyamq caemrik de, bienq ndaej lumj gyangngoenz angqyangz caeuq nauhyied. Mbanjlinzyi diuz goengloh heux mbanj haenx dwg sam mij haj gvangq, cungj coih daengz bak dou gak ranz lo, ranz gou caemh dwg baenzneix, baihnaj douhung gaenq bu gaiq dieg bingz ndeu guh diegdingzci.

Benq diegbingz gaxgonq dangbaenz “ciengzdieg yindung” Mbanjlinzyi, gou gig siengjniemh, dwg aenvih haujlai bi ndwencieng cungj mbouj miz vunz youq gizneix dwkgyangq lo, ngoenzneix banringzgvaq gou caeuq Nuengxcaet guh hong, couh dwg cae gaiq reih neix. Cinco Mbanjlinzyi gig noix doekfwn, ngoenzneix ciuqyiengh dwg mbwn’gvengq. Banhaet, mok hau nanwt caeuq ndit ronghsag, daj gemhbya baihdoeng swng hwnjdaeuj, sien dwg hopheux goengq bya hung doiqnaj ranz gou, liuxcix youh menhmenh youq ndaw mbanj mbinmieg、sanq bae, yaepyet daengx aen Mbanjlinzyi mokhau gyuemluemz ndit ciuq lwenqmyanz. Gaenq laebdaeb rengx baenz geij ndwen, ngoenzgonq cij moenq di fwn iq, gwnz namh loq mbaeq di. Nuengxcaet naeuz, mbouj ndaej caj dem lo, ngoenzneix aeu gaenjgip cae liux, gig vaiq couh yaek doek cehhaeuxyangz. Seizneix, gou cij raen, Mbanjlinzyi gaenq mbouj miz vunz ciengx cwz lo, gaxgonq ranzranz cungj ciengx miz geij duz cwz, ndawde haengjdingh miz duz cwzdaeg hung ndeu deng iem gvaq, dwg cienmonz gyauq daeuj cae reih. Nuengxcaet naeuz, seizneix cungj mbouj aeu cwz daeuj cae reih lo, cungj dwg yungh “cwzdiet” iq mbaeumbeng. Ciepdwk, de daj ndaw ranz huqcab cuengq hongdawz reihnaz de, gaex aen “cwzdiet” iqet ndeu, baenzneix, gou youh rox, daih’iek cib bi gonq cungj “cwzdiet” iq neix couh raen miz lo, menhmenh dingjlawh gij lizsij ciuhgonq seiqseiq daihdaih aeu cwz daeuj dajcae haenx. Duzcwz iem hung caeuq “cwzdiet” iq doxbeij, cawx duzcwz ndeu daeuj ciengx yaek aeu sam daengz haj cien maenz roxnaeuz engq lai, hoeng cawx aen “cwzdiet” iq baenzneix cij aeu cien lai maenz. (5)

折腾了大半个小时，他们选中了两只猪崽，一只三十九斤，一只四十三斤。按市场价每斤十五元算钱，七弟衣兜里马上装进了新收入的一千多块钱。我看他吃午饭时特别开心地多吃了一大碗。七弟说，罗湖龙他们家养过猪，眼光很准，选了最好的两只。确实，我看见我那同学开着装上两只猪崽的三轮车离开时，两公婆一直在开心地说说笑笑。才隔两天又到林峒圩日，七弟和弟媳一次就拿十只猪崽去卖，摆摊不到一个小时就全部卖完了。还有一户没买到，晚上干脆开个三轮车直接来家里买了五只。看这架势，七弟他们这批猪崽很快就会卖光。

刚吃完饭，我午休的老习惯还没改过来，而七弟却不能休息，他接着开动碾米机，给猪们准备第二天的食料。七弟他们真的很忙。

四

每当来到这块平平的地块，我就想起小时候打陀螺的事。这块平地有两到三分的面积，算是屋子附近最宽大的地块了。屯里其他大的平地也有，但不知道什么原因，小时候每年春节那几天，全屯大人小孩，不论男女，都喜欢集中到这里来打陀螺比赛。现在回想，这应该就是林玉屯曾经最快乐的“运动会”了。

林玉屯住的都是壮族人家，这样的公式场在桂西、桂西北地区到处都是。放大来看，这是云贵高原的边陲部位，地图上展现在大家面前的是连片的大面积石山地区，书上被称为典型的西南地区喀斯特地貌。在这片大石山区里，坐落着无数大大小小的公式场，林玉屯只是其中一个不算大的公式场，最多时候这里有十几户，现在房子还是有十几栋，但常年在屯里生活的人数已经很少了，有几户外出打工，没人在家。林玉屯最大的变化之一就是拥有了一条环屯水泥公路和三十五盏环屯太阳能路灯。这条路直接连通屯外的凤山县乡村主要公路之一—久（隆）拉（隆）线，还连接上刚刚通车不久的天峨县到巴马县的天巴高速公路。而天巴高速就是我国西南主要交通动脉之一贵（阳）北（海）高速公路的其中一个路段，这就让大山深处的林玉屯用不到十五分钟就能连上高速，迅速地跟外面的世界连成一体。而灯的意义，在于它接续太阳的光亮，每天晚上让林玉屯千百年来的黑夜，盛开成白昼的欢声和笑语。林玉屯的环屯公路是三米五宽，都修到了每家每户大门前，我家自然也不例外，大门前已经铺了一块水泥平地作为停车场。

那块曾经作为林玉屯“运动会场”的平地对我形成的某种怀念，是因为已经很多年的春节都没有人在这里打陀螺了，而这天下午我和七弟的工作，就是犁这块地。初春的林玉屯很少下雨，今天依然是大晴天。清晨，浓密的白雾随着灿烂的阳光从东边的山坳进来，先是缓缓缠上我家对面那座大山，然后在屯里慢慢飘动、散开，不一会就把整个林玉屯笼罩在金光耀眼的雾霭里。已经连续干旱了几个月，前天才下一点小雨，地表略微有点湿润。七弟说，不能再等了，今天得赶紧犁完，很快就得播种玉米。这时，我才发现，林玉屯已经没人养牛了，以前每家每户都养有几头牛，其中肯定要有一头阉过的大公牛，是专门驯好拿来犁地的。七弟说，现在都不用牛犁地了，用的都是轻型小“铁牛”。接着，他从装农具的杂物房里推出一部小巧的小“铁牛”，于是，我又知道，大约十年前这种小“铁牛”就进到了林玉屯，逐步取代了祖祖辈辈不知延续多少年的牛耕历史。大阉牛与小“铁牛”的对比情况是，买一头牛来养需要三到五千块钱甚至更多，而买这样一部小巧的“铁牛”才一千多块钱。