Lajbyonghngoenz, Lanz Siuhsiuh bae youwzyenz ciep daeglwg Siujyou le, couh soengq de bae ranzmeh lo.

Lanz Siuhsiuh doiq daxmeh naeuz:“Song ngoenz neix gyoengq baengzyoux yaek iu gou bae youz, mwngz bang gou yawj Siujyou geij ngoenz. ”

Haetneix, yaek soengq Siujyou bae youwzyenz seiz, Lanz Siuhsiuh naeuz Denz Yij:“Aen yozgiz laeng Siujyou couh doeg it nienzgaep lo, gij bohmeh bouxwnq cungj bauqmingz hawj lwgnyez bae hwnj banyinxdaeuz, gou hix siengj hawj Siujyou bauq banvehveh caeuq bandanzgimz.”

“Mwngz hawj Siujyou bauq aen ban ndeu couh ndaej lo, lwgnyez lij iq, hag baenzlai sieng uk, lij sai cienz dem.”

“Mwngz dwg sij mbouj ndaej ok cienz ba? Lwgnyez daj iq couh mbouj ndaej lotdoih, bouxwnq guh maz, raeuz couh guh maz, yaek siengj lwgnyez daengzcog baenzcaiz, aeu sien daj iq lienh gonq.”

“Gou mbouj dwg sij mbouj ndaej ok cienz hawj Siujyou, daj geij bi gonq binghraq lah, haujlai vunz mbouj miz hong guh, ra cienz haemq nanz, raeuz aeu mbaet gwn mbaet yungh. Caiqnaeuz, vunz yaek baenzcaiz, gaiq gim youq gyawz cungj lwenqda.”

Lanz Siuhsiuh caeuq Denz Yij mwngz coenz gou coenz ceng hwnjdaeuj.

Lanz Siuhsiuh lijmiz gienh saeh he naemj mbouj doeng, gaxgonq Denz Yij roengzban couh dauq ranz. Geij bi daeuj, Denz Yij moix ngoenz gig hwnz cij dauq ranz, cam de, de cungj naeuz ndaw gunghswh gyaban.

Denz Yij baez dauq ranz, rubrab gwn di doxgaiq, cagaenj swiqndang, hwnjcongz couh ninz gyaenfwfw. Lanz Siuhsiuh ninz mbouj ndaek, muengh coh ndaw laep naemj: Ngoenzngoenz yienghneix, bouxgvan youq rog haengjdingh miz saeh lo, roxnaj gij lwgsau wnq lo.

Lanz Siuhsiuh yied naemj yied ninz mbouj ndaek, yied naemj yied simfanz, de nyoengx ndiu Denz Yij, youh vaek de dauqdaej dwg maz saeh? Denz Yij song da mezsez han naeuz:“Mwngz naemj lai lo.” Lanz Siuhsiuh siengj naeuz, ndaw gunghswh hong nyaengq dwg gyaj ba, youq baihrog miz saeh dwg caen ne. Naemj gvi naemj, Lanz Siuhsiuh cix mbouj rox baenzlawz haibak.

Seizneix, swhgeij hawj Siujyou lai hag di doxgaiq, hawj de bauq song aen banyinxdaeuz, Denz Yij cij hawj bauq aen ban ndeu. Bouxsai guhhong ra cienz mbouj dwg hawj lwg yah gvaq ndaej engq ndei luma? Meuz lawz mbouj gwn bya, ma lawz mbouj gwn haex, bouxgvan youq rog cibcukcib miz saeh muenz swhgeij. Nyaenx baenz nanz, haemhneix mbouj caeuq de ceng mbwn dek cix gvaiq ne. Song boux gvaq mbouj roengz, seizlawz doxliz cungj ndaej, saedcaih hawj vunz souh mbouj ndaej lo, Lanz Siuhsiuh naemj.

Cibngeih diemj cung lo, Denz Yij lij caengz dauq ranz. Lanz Siuhsiuh roxnyinh aen dungx yiengjhuhu, de cij geiqndaej haemhneix caengz gwn maz doxgaiq roengz dungx gvaq.

Vih ndaek vunz neix heiq rim dungx, mbouj gwn caeuz sieng ndangdaej, dij lwi? Danghnaeuz swhgeij aeuqheiq sieng ndang, baenz bingh ninz congz, de youq baihrog couh engq gvaqbouh lo, gangj mbouj dingh lij muengh gou caeux di dai bae dem. Mboujlwnh baenzlawz, couhsuenq mbwn doemq roengzdaeuj, sien gwn imq ciengx mingh gonq. Lanz Siuhsiuh naemj dwk, swiq rek cawj di mienhdiuz gwn.

Yaep he, Denz Yij hai dou haeuj ranz lo, yawj gij yiengh de gig baeg, hix gig caemdingh, lumjbaenz gaenq lumz haetneix song boux doxceng gvaq nei.

Denz Yij raen mehyah saeknaj fonxfwdfwd, roxnyinh mehyah lij hozndat, de hix mbouj gangj vah, cigsoh bae coh aen ranzdajcawj.

Denz Yij baez biengj rek, ndaw rek mbouj miz saek naed haeux, gwnz daiz hix mbouj miz saek di byaek, de nyeux gyaeuj coh Lanz Siuhsiuh naeuz:“Siuh, mwngz caeuq Siujyou gwn caengz? Caengz gwn gou cawj hawj sou gwn.”

Denz Yij baez haibak, Lanz Siuhsiuh raq heiq he daj ndaw aek biu hwnjdaeuj, naeuz:“Gou soengq Siujyou bae ranzmeh lo, mwngz gyanghwnz cij dauq ranz, caeuq lwgsau guhcaemz gangjgoj ba!”

“Mwngz gaej luenh gangj luenh ngeiz, gou dwg maz vunz mwngz mbouj rox? Gou ndang cingq mbouj lau ngaeuz nyeng.” Denz Yij naeuz.

“Geij bi neix mbouj raen rom ndaej cienz cixbah, hix sij mbouj ndaej hawj vunzranz yungh, mbouj rox dawz gvaq gizlawz bae!” Lanz Siuhsiuh hozndat dwk naeuz.

“Raeuz doxaeu caet hopbi ngoenzhaenx, gou naeuz cawx diuz lienhhoz gim he guh geiqniemh, gaen mwngz geij bi, cawx diuz lienhhoz gim he, mbouj suenq gvaqbouh ba! Mwngz naeuz seizneix mbouj miz geijlai cienz, rom lai di caiq cawx. Doiq vunzranz baenzlai ged, roxnaeuz gij cienz cungj hawj meh iucing lawz yungh lo!” Lanz Siuhsiuh caengz caj Denz Yij dap vah, youh gangj baenzroix.

“Daj geij bi gonq binghraq daeuj, ndaw gunghswh hong noix lij gemj vunz, gou ndaej louz roengzdaeuj, raeuz daengx ranz vunz miz gwn miz daenj caemh mbouj loek lo.” Denz Yij naeuz.

“Mwngz gaxgonq naeuz ndaw gunghswh hong lai haemhhaemh gyaban, seizneix youh naeuz ndaw gunghswh hong noix gemj vunz, mwngz gangjvah gyaeuj mbouj dam rieng!” Lanz Siuhsiuh yied gangj sing yied hung.

“Lwnh mwngz liux bae ba, ngoenznaengz roengzban le, gou lij bae bouqngaiz soengq ngaiz, ndaej gij cienz haenx cungj dawz bae gien hawj dahniq he lo.” Denz Yij naeuz.

“Gaej yaeuh lo, gou caz gvaq lo.” Lanz Siuhsiuh riunyaen, dawz roix dan he gveng daengz dangqnaj Denz Yij bae.

Denz Yij baez yawj, mbaw dan raezrangrang neix, cingq dwg de yungh veizsin cienj cienz hawj dahniq haenx.

Dahniq dwg lwggyax, Denz Yij hix dwg lwggyax, de rox dang lwggyax sinhoj, de ndwenndwen aeu cienj cienz hawj dahniq. Vih ra lai di cienz, roengzban le, Denz Yij couh bae bouqngaiz soengq ngaiz, de naemj: Cijaeu swhgeij gaenx guh, dahniq mbouj lau gvaq mbouj ndei.

Gaxgonq Denz Yij mbouj siengj lwnh Lanz Siuhsiuh nyi, lau de naemj lai, lau de mbouj nyienh swhgeij baenzneix guh. Seizneix, Denz Yij mbouj ndaej mbouj gangj okdaeuj.

“Gou mbouj saenq, mwngz yaeuh gou, ngoenzcog couh bae doxliz!” Lanz Siuhsiuh youh hongz naeuz.

Haetlaeng, Lanz Siuhsiuh senqsi hwnqcongz, “Bae ba, gou bae rog dapci.” Lanz Siuhsiuh singdaemq doiq Denz Yij naeuz.

“Mwngz caeuq gou naengh ci bae ba, raeuz caez gwn can ngaiz he, caiq buenx mwngz youz baez gai he.” Denz Yij naeuz.

Lanz Siuhsiuh mbouj dap vah, ndaw uk cix yienh’ok gij cingzgingj: Gvaq ngoenzneix le, fouqgyaq aen ci roxnaeuz couh naengh lingh boux mehmbwk lo, boux mehmbwk haenx couh daeuj aen ranz neix youq lo, Siujyou couh deng moeb daejnga’nga……

Lanz Siuhsiuh doq naemj gijneix, mbouj rox mbouj nyinh couh gaen Denz Yij hwnj ci bae lo.

Aen ci hai bae daengz dangqnaj aen bouqngaiz ndeu dingz roengzdaeuj. Aen bouqngaiz neix, dwg dieg gwn ngaiz Denz Yij caeuq Lanz Siuhsiuh baeznduj doxraen.

Song boux doiqnaj naengh, seiq aen da doxdoiq, naengbak gwq doengh, yaek gangj mbouj gangj, cix maz cungj mbouj gangj.

Lanz Siuhsiuh naemj hwnj caet bi gonq caeuq Denz Yij youq neix gwnngaiz, Denz Yij riunyumnyum nep byaek hawj swhgeij, naeuz lai gwn di, lwgsau loq biz engq ndeiyawj……

Lanz Siuhsiuh lij naemj gijneix, Denz Yij naeuz:“Gwn imq caengz? Gou buenx mwngz bae youz yaep ndeu ba.”

Lanz Siuhsiuh mbouj guhsing, de siengj euq, hoeng ndang cix gag gaenlaeng Denz Yij bae.

Denz Yij caeuq Lanz Siuhsiuh byaij daengz aen bouq gai cawbauj haenx, Denz Yij doiq dahsau gaicawx naeuz:“Mwngz dawz diuz lienhhoz gim neix bau hawj gou ba.”

Lanz Siuhsiuh baez yawj, cingq dwg aen bouq mboengqgonq songde siengj cawx diuz lienhhoz gim haenx.

Denz Yij riunyumnyum doiq Lanz Siuhsiuh naeuz:“Mwngz sou ndei ba.”

Dingq gij vah Denz Yij, ndawsim Lanz Siuhsiuh fanfoek mbouj dingz, maz feih cungj miz.

Denz Yij caeuq Lanz Siuhsiuh byaij ok aen bouqgim, song boux byaij bae coh minzcwnggiz. Sawqmwh, dingqnyi dangqnaj miz aen sing ndeu heuh naeuz:“Daxau, daxau!”

Denz Yij ndwn dingh baez yawj, dwg dahniq de geij bi neix bangcoh haenx.

Dahniq angqfwngfwng buet daeuj coh Denz Yij, de ngiengx gyaeuj muenghmuengh Lanz Siuhsiuh, riu naeuz:“Daxau, neix dwg daxheiz ba, raen sou byaijloh baenz gip, sou yaek bae gizlawz？”

Lanz Siuhsiuh dingq le, naj hoengzfwgfwg, mbouj eiqseiq riu lo.

Dahniq song faj fwngz gak gaemdawz fwngz Denz Yij caeuq fwngz Lanz Siuhsiuh, dahniq naeuz:“Daxau, miz mwngz bangcoh, gou mbouj yousim, hagsib cingzcik youq ndaw ban itcig baiz daih’it, daengzcog gou aeu gaujhwnj daihhag, ra ndaej cienz le, caiq bauqdap mwngz, hix lumj mwngz ityiengh bae bangcoh vunzwnq, guh boux vunz simndei simsienh ndeu.”

Seizneix, Lanz Siuhsiuh maz cungj rox lo, de ndwn youq gwnz roen, mbouj rox gangj maz vah.

“Daxau daxheiz, gou caiq ngut gvaq diuz gai ndeu couh daengz ranz lo, caiqraen!” Dahniq naeuz.

Muengh dahniq byaij bae gyae, Lanz Siuhsiuh fwt baenq ndang coh Denz Yij, naj hoengzgyoenggyoeng naeuz:“Seizneix minzcwnggiz gaenq roengzban lo, raeuz bae ranz ba.”

“Mwngz mbouj ienqhoij?” Denz Yij riu naeuz.

“Dwg gou gvaiqloeng mwngz, doiq mbouj gvaq lo, raeuz seizneix couh bae ranzmeh ciep daeglwg dauq ranz ba.” Lanz Siuhsiuh naeuz.