8 nyied 1 hauh, Gvangjsih Minzcuz Bozvuzgvanj guh “guekgya ancienz” cawjdaez hozdung angqhoh“betit”cietlaebbing, supyinx haujlai ginzcung camgya, doenggvaq bae daejniemh gamjsouh lizsij guek raeuz, engq ndei beizyangj gij cingz gyaezguek.

Banhaet, aen lwnhgangj gyaezguek cujyi “geiqmaenh feizhoenz lizsij, cienzciep cingsaenz saek- hoengz” vunz gig lai. Boux lwnhgangj Lij Cunhnanz dwg daeglwg Lij Yenznenz, Lij Yenznenz ndaej gvaq binggagnyienh it gaep yinghyungz、 daegdaengj goengcinz、 “gunghozgoz yinhcangh” daengj mingzdaeuz. Lij Cunhnanz yungh lizsij yingjsieng swhliu dijbauj, giethab goj bonjfaenh, lwnh gij saehsaed mbeilaux baujhoh guekgya seiz doxhoenx Lij Yenznenz. Boux hagseng Nanzningz Si Daihseiq Cunghyoz Lij Yuisenh gig gamjdoengh naeuz:“Gij saehsaed caeuq cingsaenz Lij Yenznenz gig gik gou, gou yaek yungz gij rengz ‘mbouj fug saw’ neix haeuj ndaw hagsib gou bae, daengzcog vih hwnqguh guekcoj ok rengz.”

Youq aen hozdung vanzcez bozvuzgvanj ginhyin, gyoengq hagseng cizgiz camgya gij hanghmoeg miz minzcuz daegsaek youh miz ciuqei ginhsw singciz, lumjbaenz faexhanz rap naek、 haizgieg doxdax、 dwkdom、 caeuq dwkcungq daengj. Daihgya youq ndaw hozdung caenndang daejniemh daengz gij yinxdaeuz daegbied conzdungj minzsug, hix gamjsouh daengz gij cingz hungmbwk baujhoh guekgya.

Doengzseiz, aen yingzyenzhag 30 boux hagseng haeujlaeg hag gij cihsiz Gvangjsihgen caeuq gencaigih, caenfwngz guh caemhcaiq sawq mbin gencaigih ceij, guhbaenz le “dingz ruz” caeuq gazgiengh diuhcan daengj saedsaeh hozdung. Doenghgij hozdung neix gig daih gikfat gij yinxdaeuz naekna gozfangz gohgi gyoengq lwgnyez.

Linghvaih, gwnz muengx roemx- gvan “gwnz muengx diemj bing” caeuq hozdung dinghseiz gangjgej mbouj aeu ngaenz hix doengzbouh guh. Doenggvaq gij fuengsik gwnz muengx yienhsaed dox giethab, mizyauq senhconz ginhsw cihsiz caeuq minzcuz vwnzva.

(Se Liengzyij/谢梁雨 Veiz Siuyez/韦秀月)