Bi gou doeg cuhcungh sam nienzgaep, cejdaih okhaq. Rap raemxfuk couhdwg gou bae lo. Gizsaed cejngeih hix rap ndaej, hoeng, de guh maz saeh cungj numq gvaq vunz, ndigah daxmeh baij gou bae rap. Hwnzde doek fwn iq, gyoet、laep、roen raeuzrad. Daxmeh naeuz dawz doengjriuj(dihdungj) bae rap. Doengjriuj beij doengjraemx iq, ndarap mbaeu di. Ciuqnaeuz gou dawzrap dawz ndaej bienz, hoeng haenx dwg banngoenz dawzrap, banhwnz dawzrap gou cix mbouj gamj naeuz swhgeij rap ndaej bienz. Gou ei daxmeh gangj, rap doengjriuj okdou. Rap naek hwnj ndoi, roen boengzyag dem, caen gwnrengz, gou daenj gouh suijhaiz cejdaih, miz di gvangq miz di raez, mbouj hab din, byaij roen song din seiz mbouj seiz doxdaemj. Caiqnaeuz, roen gaeb vunz baedauq lai, aeu deihdeih ngengq ndang caeuq vunz doxfih dem, baez mbouj haeujsim, dauqdaej ngaiz laemx mbat ndeu, caekhaex dad naengh gwnz namh, geuvaq uq lo, raemx ndaw doengj hix foegfienh bae dingz ndeu, gou hujdengdeng rap byongh doengj raemx ma ranz. Daxmeh raen yienghneix, cam miz gizlawz sieng mbouj? De doq cam doq lingh ndarap okdou. Gou yiengq baihlaeng de hemq, gaej bae lo, roen raeuz lai. Daxboh caeuq daeggo hix gienq naeuz gaej bae. Daxmeh cienq gyaeuj dauq han: Raemxfuk aeu rim doengj rim rap. Deng bw, bouxgeq ciengz naeuz, fuk rim, daengx bi yinhheiq ndei.

Ndaw mbanj miz bouxdamengz vujbaujhu ndeu. Raemxgwn de dwg gyoengq caencik ndaw gyog doxlwnz bang de rap, raemxfuk doiq boux vujbaujhu daeuj gangj mbouj miz maz eiqsei, hoeng de yawjnaek aen fungsug neix, de caemh rox gyanghwnz bae rap raemx dwgrengz lai, cix aeu aen bingz iq ndeu hawj ranznden bang aeu raemxfuk dauq. Aeu raemxfuk aen fungsug neix dwg cungj dakdawz siengjmuengh ndei ndeu, de youq ndawsim vunzmbanj gaenq rag laeg goek maenh, daih riengz daih ciep roengzdaeuj, mbouj miz byawz linghgag.

20 sigij 90 nienzdaih codaeuz, mbanj dou hingq vat cingj gwn raemx, youq naj ranz roxnaeuz laeng ranz vat cingj, dingzlai dwg geij ranznden gapdoih vat aen ndeu. Ranz gou caeuq sam ranznden doxdoq vat aen cingj ndeu, cingj dwg youq gyangluengq ranz gou, vat roengzbae 12 mij laeg couh raen raemx lo, gunghcwngz haemq daih. Cingjraemx dou dwg aeu dienh caeuraemx. Mbangj cingjraemx dwg aeu fwngz baenq loek nengh raemx hwnjdaeuj. Raemxcingj hix saw, lumj raemxmboq seuqcingh, hoeng mbouj van, lij haeu naez dem, mboujgvaq damdoz de fuengbienh hix gwn lo. Cijmiz raemxfuk itdingh aeu bae mboq rap, daihgya laihnaeuz cijmiz raemxmboq cijndaej guh raemxfuk.

Bi 2003, swlaizsuij daengz ranz lo, bouxboux angqvauvau, mbouj yungh mbaq rap raemx byawz mbouj angq ni? Gaenriengz aen mboq ciemhciemh ngaiz lumz bae lo. Swlaizsuij dwg fuengbienh, hoeng daihgya mbouj gamj gwn raemxndip, gwn le couh okdungx. Vunzmbanj dou gvaq ndwenngoenz gyaepgouz gij genjdanh gvenq le, cix yiemz goenj raemx gwn mazfanz lailai, ndigah ndawsim lij gvaqniemh raemxmboq, hoeng roen mboq mbouj ndei byaij, gik bae rap, aen mboq cix vut fwz lo. Cijmiz raemxfuk aeu bae mboq rap.

Bi 2013, aen cwngcwz mbanjmbanj luengqluengq doeng roensuijniz haenx saedhengz lo, vunzmbanj vid gen daj ga, gya’gvangq roen mboq, doekdaemq gij banz(bohdu) de, diuz roensuijniz gvangq song mij he daj gyangmbanj doeng daengz henz mboq, ci song loek、seiq loek cungj ndaej hai daengz bakmboq, fuengbienh dangqmaz. Vunzmbanj foenxfoenx hai ci song loek、ci sam loek daeuj lajmboq dajsaeg、nengh raemx bae gwn. Yienghneix guh, it dwg raemxmboq gwn vanliengz, ngeih dwg ndaej hanq di ngaenz swlaizsuij.

Vunzmbanj caemh hwnj aen ranz ndeu goemj mboq, fuengz mbaw reiz、nyapnyaj doek roengz mboq bae, lij youq henz ranz haenx lingh daengj aen ranz iq ndeu, ndawde an congzcaet、lozyieng、lozfeiz, fuengbienh vunzmbanj hwnjyieng coemh sacienz. Youq aen mboqdaeuz dangqnaj youh guh aen mboqngeih(cingjraemx) ndeu, raemx dwg daj mboqdaeuz yinx gvaqdaeuj, dajsaeg catswiq yungh raemx mboqngeih, raemx mboqdaeuz dawz daeuj gwn, baenzneix faenhai yungh engq veiswngh.

Goreiz seiqlengq gya’gvangq daj- bingz、 bu suijniz, guhbaenz bingzdaiz hung, mauhhung(ngazreiz) goreiz dangdwg hawj aen bingzdaiz neix gang liengj, gizneix ndaej baij 50 daiz laeuj. Bi ciet sam nyied sam、ciet sambet、ciet bouxgeq、ciet fungsou daengj cungj youq neix baij daiz. Bouxgeq maij comz youq neix gangjgoj、dwkgeiz、dwkbaiz. Gizneix gaenq baenz dieg haihoih、comz gwn、guh’angq. Laj goreiz dauqfuk gij yiengh dajsaeg catswiq mwhgonq haenx; dauqfuk gij yiengh miz gangj miz riu mwhgonq haenx; dauqfuk gij yiengh nauhyied gangj mbwn gangj deih mwhgonq haenx. Daihgya yiengjsouh gij fukleih daihswhyienz hawj haenx.

Bi 2020, aen gunghcwngz lohdaeng daiyangznwngz hengzguh le, mbanjmbanj lohdaeng rongh baenzhwnz. Seizneix mbanj dou ranzranz cungj hwnj ndaej ranzlaeuz lo, dingzlai ranzlaeuz gaenq cang baenz laeuzbezsu dem, gij laeuzbezsu neix youq laj lohdaeng unqswnh hausak, yienh ndaej engq gyaeundei, aen mbanj yienh ndaej engq miz senggei, hawj vunz laihnaeuz dwg youq ndawsingz daeng ronghsagsag dem. Henz goreiz daengj sam ganj lohdaeng, baez haeujhaemh, ronghdaeng hausak daj seiqlengq ciuq bae: Goreiz、ranz iq、cingjraemx、bingzdaiz、miengraemx、gij ngaeuz vunz youq gwnz bingzdaiz dajsaeg roxnaeuz yietnaiq haenx caeuq seiqlengq doenghnaz、ndoi iq gyoeb baenz fuk dozveh daemznaz byaraemx ndawhwnz, hawj vunz roxnyinh fwnraemx cuk, ndwenngoenz onj, neix dwg gaiq gingjsaek daegbied mbanj dou.

Miz lohdaeng le, banhaemh, gyoengq bohranz nomj、mehranz nomj gwncaeuz gvaq le, doxciuz rag yinhyangj daeuj laj goreiz ciengq go diuq foux, gyoengqde caen rox guh’angq.

Daj miz lohdaeng hwnj, vunz baihrog daeuj dieg dou nengh raemxmboq bae gwn engq lai. Miz boux lauxbanj ndeu, siengj daeuj henz mboq mbanj dou hai aen gunghswh gvangcenzsuij ndeu. Vunzmbanj mbouj hawj, vunzmbanj naeuz, byawz daeuj aeu raemxmboq bae ranz gwn cungj ndaej, hoeng, dawz bae gai, raeuz genhgez mbouj hawj. Ndaek lauxbanj haenx daeuj laeuq cunhcangj lai baez, saehcingz cungj mbouj habhoz de nauq, doeklaeng yenjyakyak dauqbae. Daj baezde hwnj, vunzmbanj engq yawjnaek aen mboq.

Raen gij neix, gou ngeix daengz: Gizneix gingjsaek daegbied, vih rap raemxfuk, mwh gij gunghcwngz guh roensuijniz、cang lohdaeng daengj leihminz cwngcwz hengzguh, vunzmbanj siengj daengz gaij guh、gya’gvangq diuz roen mboq, gvaqlaeng youh vih dajcang aen mbanj, gaijndei、guh gyaeu vanzging dieg mboq, cijndaej dauqfuk gij sing’angq singriu laj goreiz mwhgonq, cijndaej dauqfuk gij nyaengq laj goreiz mwhgonq, couh miz ngoenzneix vunz caeuq daihswhyienz doxhuz caemhyouq. Guh ndei dieg vunzyouq saeh gven gij leih’ik vunzlai, hix gvendaengz gij cingzyauq caeuq cizlieng lajmbanj saenqhwng, mboujdan dwg aen banhfap hungmbwk hwnqguh lajmbanj gyaeundei, engqdwg daemz raemxcin gik lajmbanj saenqhwng ndeu.

（2 sat）