Vah gangj Ahhuj hwnq liux mbouj raen daxbuz, hix mbouj rox de gvaq gizlawz bae, de riuzrat gwn gvaq ngaiz romh, cengq saz bae youz lo. Saz cengq gvaq goeng dojdeih doiqnaj, Ahhuj yawjraen doiqnaj mbouj gyae miz boux mbwk ndeu naengh youq laj ngaeuz faex, yienghsiengq lumjnaeuz cingq caengzdaej. Boux mbwk neix couhdwg siuj lungznij, de dwg naengh youq gizneix deq Ahhuj ne. Ahhuj muengz cengq saz daengz henz huz hwnj haenz bae, byaij daengz bouxmbwk doiqnaj bae dongx. Bouxmbwk ngiengx gyaeuj yawj mbat ndeu, boux vunz gvaqdaeuj neix cingqdwg Ahhuj, ndawsim caeg angq, hoeng saeknaj mbouj miz saek di bienqvaq, seizbienh haibak dap coenz ndeu: “Beixmbauq haetromh ndei!”

Song boux naengh doxdoiq, boux cam boux gangj, boux mbwk gangj byangz naeuz boh de bingh, de daengz gizneix ra yw, aenvih go yw youq gwnz gamj haenx, mbouj miz fap aeu, ndawsim cingq mbouj angq.

Ahhuj dingq liux muengz gangj: “Aen gamj haenx youq gizlawz, mwngz daiq gou bae yawjyawj, roxnaeuz gou ndaej bang mwngz aeu goyw roengzdaeuj.”

Siuj lungznij ndawsim angqyangz, doq ndwn hwnjdaeuj, daiq Ahhuj byaij bae coh Gamjlungzbangh.

Song boux daengz bakgamj, mbouj raen go gijmaz yw, Ahhuj muengz cam goyw youq gizlawz, siuj lungznij naeuz haeuj gamj bae couh raen lo.

Siuj lungznij daiq Ahhuj daengz ndaw gamj naengh roengz, couh lwnh gij siengjfap ndawsim swhgeij hawj Ahhuj. Ahhuj dingq le caem mbouj gangjvah, roxnyinh swhgeij boiq mbouj hwnj siuj lungznij, lij aeu swhgeij gag siengjsiengj. Daengz deihbouh neix le, siuj lungznij mboujguenj Ahhuj gangj gijmaz de cungj mbouj ei lo, de itdingh aeu haq hawj Ahhuj, caemhcaiq couh youq ngoenzneix baenzgya, aen gamj neix couhdwg rugmoq. Ahhuj mbat nduj mbouj haengj, gvaqlaeng siengjsiengj swhgeij dwg lwggyax, mbouj reih mbouj naz, mbouj ngaenz mbouj haeux, baenzlawz hix aeu mbouj ndaej yah, siengj daengz gizneix, couh doengzeiq siuj lungznij lo.

Ngoenzhaenx banhaemh, song boux couh youq ndaw gamj, gag guh vwnhlij gag gwn laeujangq vuenyungz vaiqvued.

Daj seizhaenx hwnj, Ahhuj gyangngoenz cengq saz youq ndaw huz dwk bya, gyanghaemh daengz ndaw gamj caeuq siuj lungznij doengzcaez youq.

Vah gangj seizde, lungzvuengz dingq le siuj lungznij doqrwz gangj aen fuengfap haenx, de nyinhnaeuz baenz guh, cinj siuj lungznij bae damqdingq, swhgeij couh gwih hwnj gwnz fwj ganj dauq lungzgungh. Laux lungzvuengz youq lungzgungh caj ndwen lai, mbouj raen siuj lungznij dauq daehvah, sim siengj siuj lungznij aiq bungz maz mazfanz lo, doq hwnjndang ganj bae Yunghcouh.

Lungzvuengz sikhaek gwih fwj mbin daengz Mbanjlungzvei, ngamq raen gij haplangh myebmyeb lumj ciuqgaeuq, aen saz vang youq henz huz, mbouj raen bouxvunz cengq saz, hix mbouj raen siuj lungznij. Lungzvuengz simvueng lo, muengz ei bangx huz ra, ra le gig nanz, vanz mbouj raen ngaeuz siuj lungznij. Lungzvuengz ndawsim rox, siuj lungznij liz mbouj ndaej raemx, haengjdingh dwg youq ndaw gamj bangx raemx neix. Lungzvuengz ei gij siengjfap swhgeij, youq bangx huz ndaw bya laebdaeb gyumq.

Roxnaeuz dwg Ahhuj caeuq siuj lungznij mbouj miz yienzfaenh, roxnaeuz dwg Ahhuj mbouj miz fukheiq, roxnaeuz dwg siuj lungznij coihlienh caengz gaeuq, mbouj ndaej youq gwnzbiengz, bakgamj Byalungzbangh ngaiz laux lungzvuengz gyumq raen lo. De boemz ndang roengz, ngengq rwz saeq dingq, ndaw gamj lumjnaeuz miz vunz gangj vah.

Laux lungzvuengz mo gij rin bangx gamj byaij haeuj ndaw bae mbouj gyae, couh yawjraen siuj lungznij caeuq Ahhuj naengh doxdoiq, youh gangj youh riu.

“Dahlwg ha, mwngz youq gizneix gangj riu, hawj gou ra ndaej baenzlai sinhoj ne.”

Dingqnyi sing’yaem bohvuengz, siuj lungznij “a” sing ndeu ndwn hwnjdaeuj. Laux lungzvuengz gig ndatheiq, byaij gvaqbae rag fwngz siuj lungznij, hawj de riengz swhgeij baema ranz vaiqdi.

Siuj lungznij cengj luet song fwngz, doq gvih roengzdaeuj, haibak ngaeuq: “Bohvuengz, dahlwg gaenq haq hawj Ahhuj lo, mbouj nyienh baema lungzgungh, gietdingh youq gwnzbiengz buenx Ahhuj gvaq ciuh ndeu, cingjgouz bohvuengz doengzeiq dahlwg.” Gangj liux, raemxda lumj fwn doek nei loenq roengzdaeuj.

Laux lungzvuengz baez dingq, ndatheiq dwk sing hung hemq: “Mbouj ndaej, mbouj ndaej. Gou ngamq miz mwngz dahlwg dog, baenzlawz hawj mwngz gag louz youq gwnzbiengz ne? Vaiqdi hwnq, riengz daxboh ma lungzgungh.”

Siuj lungznij vanzlij gvih youq gwnz namh, raemxda lae rim naj, gouz bohvuengz dapwngq swhgeij.

Ahhuj mwnh naengh youq henz ndeu, mbouj gamj cap vah, mbouj rox baenzlawz ndei.

Laux lungzvuengz ndawsim roxnyinh, roxnaeuz mbouj guh haenq di, siuj lungznij dwg mbouj haengj dauqbae lo. Lungzvuengz youq gwnz gyaeuj loek diuz cimgang ndeu, mbongq roengz gyang rin bae. Yaep ndeu, cij dingqnyi sing raemx laecaca, yied daeuj yied hung, yied lae yied gyae……

Lae le haujlai nanz, riengzlaeng ciemhciemh dingq mbouj ndaejnyi sing raemx lae lo.

Lungzvuengz haibak naeuz: “Ahhuj, mwngz maengx aen huz neix dwk bya, seizneix raemx gaenq lae bae Doenghaij lo, mbouj miz raemx lo, daej huz gvaq geij ngoenz couh mboek caez, baezlaeng mwngz goj ndaej youq daej huz ndaem vamiuz daeuj ciengx mingh. Mbouj miz raemx, dahlwg gou youq mwngz gizneix hix youq mbouj roengzbae lo, gij imyuenz goengyah sou couh daengz gizneix sat ba. Baezlaeng, gou hix mbouj veiznanz gij beksingq gizneix, gou aenqseiz baet fwj daeuj doek fwn, hawj vamiuz sou ndaej demsou.”

Laux lungzvuengz gangj sat, fwngz rag siuj lungznij byaij ok bakgamj, gwih hwnj gwnz fwj mbin bae, yaepda couh mbouj raen lo.

Ahhuj lienz coenz vah ndeu hix mbouj ndaej doiq yah de gangj, daiq daengx dungx ndiepndoq siuj lungznij, menhmenh byaij ok bakgamj. Gvex gvaq din bya baez yawj, raemx huz mbouj raen lo, gij bya gaenq youz roengz congh bae, gij bya youz mbouj gib roengz congh bae haenx hix ngaiz gyoengq vunzmbanj gaemh dawz bae guh caeuz lo.

Seizneix, danghnaeuz mwngz youq bak Gamjlungzbangh byaij haeujbae mbouj gyae, laj din couh miz aen congh ndeu, laeg mbouj raen daej. Gawq Ahhuj bihaenx gangj, aen congh neix couhdwg lungzvuengz yungh fag cimgang gwnz gyaeuj mbongq baenz, raemx huz couhdwg ei aen congh neix lae bae, gij saenzlig lungzvuengz miz geijlai hung, saedcaih siengj mbouj daengz.

Raemx huz lae coh haij, gij byayouzyiz ndoj youq ndaw congh mbouj riengz raemx bae haenx couh louz youq gizneix lo, moix baez fwn doek fat raemxrongz, gij byayouzyiz couh youz daengz daej huz doenghbaez daeuj byoq gij lwglan gyoengqde. Couhdwg yienghneix, gij byayouzyiz Lungzvei cienzciep roengzdaeuj lo.

Byayouzyiz caen dwg daiq ndei gwn lo, lauheiq mwngz mbouj caengz gwn gvaq, gou naeuz mwngz ba, cingj gaej doeksaet, seizneix byayouzyiz gaen gai daengz hajcib maenz lo. Danghnaeuz bi lawz fwn doek fat raemxrongz, mwngz daengz Lungzvei daeuj, hawj gyoengqvunz dwk bya gai hawj mwngz dawz bae cimzcimz ba, youh rang youh feih bw.

(2 sat)