Gig nanz gig nanz gaxgonq, Mbanjlungzvei doiqnaj miz aen huz iq ndeu. Raemx huz heusaux, daujingj ngaeuz faex. Gij ndit banhaet ciuq roengz huz mienh daeuj, gij raemx haplangh ndongqmyebmyeb, saek bya ngaeuz faex, cibfaen ndeiyawj. Ndaw huz miz byayouzyiz. Gij byayouzyiz neix mbouj miz ndok, aen ndang unqnemnem, raez daih’iek miz 4.8 lizmij, duz ceiq hung mboujgvaq 0.09 goenggaen. Gaeb ndaej byayouzyiz cuengq roengz gyoengz bae cimq raemx song sam ngoenz, gij doxgaiq ndaw dungx byayouzyiz couh gag siu bae, baez cawj couh mbouj yungh hai dungx lo. Yaek roengz cauq seiz cat di gyu he, ndingq roengz cauq ndat bae, mbouj yungh dwk feiz haenq, hix mbouj yungh fonj lai, cug le couh ndaej gwn. Byayouzyiz cawj cug le youh rang youh raeuz, feih ndei hab bak. Gij vunz gwn gvaq byayouzyiz Mbanjlungzvei haenx, mbouj miz bouxlawz mbouj haenh, ngeix gij feihndei de mbouj caenh. Byayouzyiz dwg gij byaek cangdaengj ndeu, dwg gij doxgaiq ceiq ndei ndaw gijgwn ndei. Vihliux bungjbauh goengdaeuz, hakmbanj ndaej le soengq hakcou, hakcou ndaej le soengq hakfouj, hakfouj ndaej le soengq vuengzdaeq. Bihaenx gij byayouzyiz Lungzvei youq Gingsingz okmingz dangqmaz, rang riuz lajmbwn. Gij byayouzyiz ndei gwn, it riuz cib, cib riuz bak, gig vaiq riuz daengz ndaw rwz Lungzvuengz Doenghaij bae.

Ngoenz ndeu banhaet, Lungzvuengz gag youq nyapsaebsaeb, sing ndeu mbouj yaeng. Siuj Lungznij raen bohvuengz ngaem gyaeuj, hwnjbae couh cam: “Bohvuengz vihmaz mbouj angq?” Byawz rox Siuj Lungznij vah caengz gangj liux, Laux Lungzvuengz couh fatheiq lo: “Gaenh duenh seizgan neix gwnzbiengz lwnhswdswd, nanzdauh mwngz couh mbouj dingqnyi?”

“Gangj gijmaz ne? Dahlwg mwngz din mbouj yamq okdou, saedcaih mbouj rox gijmaz.” Siuj Lungznij gij yienghsiengq vei rim naj.

“Cungguek baihnamz Yunghcouh, miz aen mbanj he ok byayouzyiz. Dingqgangj gij byayouzyiz neix feihdauh gig ndei, rang feih hab bak. Gig lai vunz cungj gangj beij nohlungz vanzlij ndei gwn, dingq daengz gij lwnh neix, gou naengz mbouj ndatheiq ma?” Lungzvuengz cibfaen ndatheiq, haemz mbouj ndaej fak geij baez gyoengqvunz haenh byayouzyiz haenx.

Siuj Lungznij dingq le, geiq haeuj sim bae. “Bohvuengz gaej fatheiq, raeuz vihmaz mbouj cangndang, bae damqcam mbat ndeu.”

“Gangj ndaej deng. Ngoenzcog gou couh bae baez ndeu.”

Siuj Lungznij euqmaenz caeuq bohvuengz bae, Laux Lungzvuengz cungh Siuj Lungznij, euq mboujgvaq de, cijndei doengzeiq daiq de bae riengz.

Ngoengzlaeng ranz caengz rongh, Lungzvuengz caeuq Siuj Lungznij hwnq vaiqvaiq dwk, yaemyet okdou, yat hwnj gwnz raemx, cang yienghsiengq bohlwg gwnzbiengz, coh Yunghcouh byaij daeuj.

Bohlwg song boux daeuj daengz Yunghcouh, daengz liux gaiqdieg Lungzvei, cij raen gauz bya ndaw he, huz raemx ndeu ingj mbwn lamz fwj hau. Aen huz neix yienznaeuz mbouj hung, gij faex gij ranz ngaeuz daujingj ndawde. Youq dinghrik gwnz huz haenx, miz bouxmbauq he cengq aen saz ndeu, baedauq youzlangh. Bohlwg yawj dwk ngoengq lo, gwnzbiengz gingqyienz miz gingjsaek baenzneix gyaeundei, bak haenh mbouj dingz.

Banhaemh daengngoenz roengz baihsae, bouxmbauq youh cengq aen saz okdaeuj lo. Laxlawz de sou aengiengh aeu bya. Daegmbauq dawz bya gai hawj caizcawj, ngamq ce mbouj daengz buenq gaen naek byayouzyiz guh caeuz.

Siuj Lungznij doq haeuj rwz bohvuengz bae caegcaeg gangj baenzlawz baenzlawz, Laux Lungzvuengz ngaek gyaeuj doengzeiq. Siuj Lungznij ngauz ndang baez bienq, baenz yah vunzgeq naj nyaeuq liux ndeu, fwngz gaem faexdwngx, baez yamq baez yamq coh ranzhaz daegmbauq byaij bae.

Daegmbauq dwk bya neix gij coh de heuh Ahhuj, bohmeh de senq dai lo, ngamq de boux vunz ndeu gag youq aen ranzhaz neix, mbouj miz saek di reihnaz, ngamq rox gauq dwk bya dohgvaq ndwenngoenz. Ngoenzneix banhaemh, Ahhuj cien liux byayouzyiz, ngamqnaeuz cinjbi gwncaeuz, faemhfwd dingqnyi miz vunz roq dou, lienzmuengz hwnqndang okbae, cij raen yah vunzgeq ndeu ndwn youq rog dou, ndaw fwngz gaem diuz faexdwngx ndeu.

“Daxbuz, mwngz ra byawz ne?” Ahhuj singsaeq cam.

“Gou dwg boux vunz gvaq roen ndeu, ndaej youq ranz mwngz youq haemh ndeu la?”

“Ndaej, ndaej.” Ahhuj muengz bak dapwngq, hawj daxbuz haeuj ranz bae, ra daengq hawj de naengh.

“Daxbuz, mwngz haengjdingh dungxiek liux, gwncaeuz ba.” Ahhuj dawz duix haeux daengz doiqnaj daxbuz, cingj de caeuq swhgeij gwn haeuxcaeuz.

Daxbuz yawj le yawj gij byayouzyiz ndaw duix, gyajcang cam: “Gijneix dwg gijmaz?”

“Gijneix dwg byayouzyiz, dwg youq ndaw huz neix dwk, mwngz couh cimzcimz ba.” Ahhuj yiedcingz heuh, unqswnh lwnhnaeuz.

Daxbuz hix mbouj guhhek, dawz dawh nep duz byayouzyiz ndeu soengq haeuj bak bae. “Caen rang, caen rang. Ndei gwn ndei gwn.” Daxbuz haenh mbouj dingz bak, Ahhuj dingq liux hix gig angq.

Gwn gvaq haeuxcaeuz, Ahhuj yiengq daxbuz damz liux gij saeh swhgeij. Cingq yienghneix gangj roengzbae, gaenq gvaq byonghhwnz lo, Ahhuj hix gyaih lo, gipmuengz sousib aen mbonq swhgeij, nyiengh hawj daxbuz ninz gwnz mbonq, swhgeij rag buenq ciengq sat beiq youq gwnz namh, mumjmumj gyumqgyumq ninz ndaek lo.

Siuj Lungznij ninz youq gwnz mbonq Ahhuj, baenzlawz hix ninz mbouj ndaek. Ahhuj daj lij iq couh mbouj miz bohmeh, seizneix baenzlai geq hix ra mbouj ndaej yah, gaeuq hojlienz lo. Siuj Lungznij roxnyinh Ahhuj lauxsaed ndaej baengh, simndei vunzsoh, swhgeij hozbiet caiq baema ranz lungzgungh, caeuq de doengzcaez gvaq saedceij mbouj engq ndei ma? Siengj daengz gizneix, Siuj Lungznij yaem mbouj ndaej ndawsim angqyangz.

“Deng lo, gou cix youq bangx huz ra aen gamj ndeu cap roengzdaeuj caeuq de giet goeng’yah, caj miz lwgnyez liux cij hawj vunz rox raeuz dwg goeng’yah.” Siuj Lungznij gag youq gag gangj, siengj daengz lwgnyez, Siuj Lungznij ndawsim cibfaen angq.

Mbwn caengz rongh, Siuj Lungznij couh hwnq lo, de ei bangx huz bae gyumq gamj. Siuj Lungznij ndawsim siengj: Youq ndaw gamj bangx huz cap roengzdaeuj, yungzheih ngaiz vunz yawjraen, ceiq ndei ndaej ra aen dieg youh nep raemx youh ndei ndoj cap roengzdaeuj, mbouj hawj vunz rox couh engq ndei lo.

Siuj Lungznij heux gvaq bangx huz laj dinbya bae, ei roen bya doxhwnj, byaij mbouj geijlai gyae, couh youq ndaw nya yaemyet yawjraen aen congh iq ndeu. Siuj Lungznij bued gij nya, ngengq gyaeuj baez yawj, ndaw congh gig laeg gig laep, cingq dwg aen dieg ndei youq ndeu. Siuj Lungznij seizde couh gietdingh youq aen gamj neix caeuq Ahhuj giet goeng’yah, yaem ndoj roengzdaeuj.

Aen gamj neix, couh dwg bya laeng goeng dojdeih Mbanjlungzvei. Goeng dojdeih mbiengj baihgvaz mienh dat haenx miz geij aen congh, couh dwg rug moq Siuj Lungznij caeuq Ahhuj hai gij conghcueng haenx, doeng rumz langh liengz. Seizneix, raeuz ei Denhbingz Goengloh coh Bingzgoj fuengyiengq byaij, gvex gvaq goengqbya goeng dojdeih caiq gvaq mbiengjgvaz bae mbouj geijlai gyae, caiq benz doxhwnj bae mbouj geijlai yamq, couh raen aen congh ndeu. Aen bakcongh couhdwg bihaenx Siuj Lungznij fatyienh bw. Aen gamj neix seizneix heuh Gamjlungzbangh. Youq aen bakgamj neix haeuj ndaw bae mbouj gyae, gvex gvaq mbiengjsaenamz, couh yawjraen song fuk man, lumj gyoengqvunz banhaet ninz hwnq venj riep nei. Riuzgangj gizneix couhdwg aen rug moq bihaenx Siuj Lungznij caeuq Ahhuj doxgiet haenx.(1)