Geij bi neix daeuj, Cingsih Si aeu couqmaenh gij eiqsik Cunghvaz Minzcuz ranz vunz ndeu guh sienqmeh, doenggvaq canjyez hwng bien、vwnzlij yungzhab、guhyiengh dazyinx, doinyoengx gak minzcuz doxbyaij doxgyau doxyungz hwngfat laegdaeuq, guhbaenz aenbiengz bien’gyaiq gyaeu、bouxminz bien’gyaiq miz、bien’gyaiq onj.

Aen si neix baengh gijndei diegbya ndaem haeuxnaz ciengx bya, cauhlaeb “dajndaem—gyagoeng—gai” daengx diuzlienh canjyez, Cingsih youzcaz、haeuxniudaih daengj 9 gaiq huq ndaej sengjgaep doxhwnj nyinhcingq baenz huqndei, hawj bouxguhnaz bi bingzyaenz lai ndaej baenz fanh maenz. Hamj guek canjyez caez okrengz, Lungzbangh Goujan huq haeujok guek bi cunggvaq 10 fanh dunh, doiq rogguek gaicawx daengz 237 ik maenz, bouxminz bien’gyaiq baedauq gaicawx nangqdaengz 38 aen mbanj henzguek.

Hopheux “fungcingz bien’gyaiq+”, doihaeuj cauhlaeb Byagujlungzsanh lueg hung 5A gingjgih, cauhmoq aen vunqsik guenjguh Mboqhanq—Giucouh. Giujsiu Gujcin senjhaeuj gaep guekgya dieg comz banhaemh sawj ngoenz. Gyauhaeux Cingsih daengj 3 loh doxgaiq miz daegsaek hawj vunz haengj gyaez, Mancuengh、aendom caeuq lijyouz doxyungz hwnjdaeuj.

Saedhengz hwnqguh rangh guhyiengh “seiq yiengh gap baenz aen”：Yanghcin henzguek cauh rangh guhyiengh “souj bien fouq minz”, yanghcin baihnamz hwnqguh rangh guhyiengh “canjyez hwng bien”, yanghcin gvendaengz lij gungganq rangh guhyiengh “gunghyez hoengh bien”, yanghcin baihbaek cauhlaeb rangh guhyiengh “swnghdai hen bien”. Cungdenj cauh Vadung Bazdwz Cunh daengj 6 aen mbanj miz daegsaek minzcuz, doenggvaq “ranzyouq miz daegsaek+vwnzlij+feihyiz” vunqsik, langhbaij yiengh ndaejndei minzcuz doxgiet baenaj.

（Hij Fungfeih Banh Dauh）