7 nyied 17 hauh, 《Sawbeizhau Gvangjsih Yinzgungh Cinwngz Canjyez Hwngfat（Bi 2025）》 cingqsik fatbouh, cek saw neix youz Swcigih Sinsiz Cunghsinh bienraiz.《Sawbeizhau》 yienh’ok, Gvangjsih yungh gij swhyenz ndei bonjfaenh, doinyoengx yinzgungh cinwngz canjyez hwngfat aeundaej cingzcik yienhda.

Guhndei hwngfat vanzging fuengmienh, bi 2024 doxdaeuj, Gvangjsih gungh yaenqfat hengzguh coihaeuj yinzgungh cinwngz hwngfat cwngcwz vwnzgen 17 faenh, laebbaenz Gvangjsih yinzgungh cinwngz hwngfat gunghcoz cienban, cauhnduj daengx aen boiqhab “dieg sueng mbin”, laeb 100 ik maenz cienzgoek yinzgungh cinwngz canjyez haeujcoengh yinzgungh cinwngz canjyez hwngfat.

Giekdaej sezsih cengjdingx fuengmienh, swcigih gunghgung soqgawq haicuengq bingzdaiz gaenq comz gunghgung soqgawq 93.79 ik diuz, daengx gih gyoebsuenq hwnqbaenz 5G gihcan mauhgvaq 14 fanh aen, muengxdoxlienz cuzgouj gvanhdai daengz 6175 fanh cau, hwnqbaenz 12 diuz gvanghlanj dieghawq gozci doeng Dunghmungz.

Aen gvaengx gvanhgen cauhmoq fuengmienh, haeujlaeg saedhengz aen hengzdoengh “byaisoem”, cujciz guh aen cienhangh hungnaek canjyez cauhmoq gohgi “yinzgungh cinwngz+”. Daengz bineix 5 nyied, Gvangjsih yinzgungh cinwngz mizgven soq bauq cienleih gyoebsuenq miz 2248 gienh.

Hangzyez yungh fuengmienh, cienzmienh guhlaeg “yinzgungh cinwngz+” yungzhab yungh, gaenq guhbaenz nangqdaengz nungzyez、cauhguh、yihliuz、gyaudoeng、vwnzlij doenghgij dieg neix. Canjyez hwngfat fuengmienh, daengx gih yinzgungh cinwngz gveihmoz doxhwnj giyez 267 aen, bi 2024 Gvangjsih laebdaeb guh yinzgungh cinwngz mizgven giyez 2708 aen, caeuq bi 2023 beij lai hwnj 32.55%.

Coh Dunghmungz haicuengq doxgap fuengmienh, gyavaiq caezhwnq Cungguek—Dunghmungz Yinzgungh Cinwngz Cauhmoq Doxgap Cunghsinh, gaenq ciemdingh 40 aen hanghmoeg youqgaenj, nangqdaengz mozhingz hung caeuq “yinzgungh cinwngz+” aen gvaengx youqgaenj, roengzgoek ca mbouj geijlai 80 ik maenz. Buek nduj 16 aen giyez 6 aen Dunghmungz guekgya haenx guhsat ciemdingh capyouq.

《Sawbeizhau》 doiq yamqlaeng guhndei hwngfat daezok haj aen genyi. It dwg cimyawj banhfap, cauhmoq diuzroen yinzgungh cinwngz hwngfat ndei saed. Ngeih dwg ak goek daez naengz, cuknet yinzgungh cinwngz hwngfat giekdaej. Sam dwg cauhmoq yungh, cauh aen swnghdai canjyez yinzgungh cinwngz yungzhab ceiq ndei. Seiq dwg mbe’gvangq Dunghmungz, guhlaeg haicuengq doxgap caeuq guhyiengh yungh gisuz. Haj dwg ancienz baengh ndaej, dungjcouz yinzgungh cinwngz canjyez hwngfat caeuq ancienz.

（daj 《Gvangjsih Yizbau》 aeu daeuj genj hoiz Goz Yenginz Cai Lienglieng）