“Daeglunz, mwngz caen miz bonjsaeh lo!” Gyoengq beixnuengx cungj haenh mbouj dingz bak.

“Mbouj suenq bonjsaeh, ra ndaej gaeuq gwn.” Daeglunz fajnaj oiqet de riuhaha, sing sang goksad hemq naeuz. “Gak boux lungzau bajliuz, haeuj ranz daeuj naengh, haeuj ranz daeuj naengh.”

Seizneix, Daeglunz yawjraen Bohyaenx gag youq giz ndeu cim gwnz cim laj aen ranzlaeuz moq, de byaij gvaqbae, ndenq ci ien ndeu hawj de：“Bohlungz, cit ci ien ndeu gonq.”

Bohyaenx ciep aeu ci ien, lwgda de daj gij cienmeng hausaksak gwnz ciengz, senj daengz conghcueng gij lijhozginh ndongqliklik, baenq daengz gwnz genfwngz rengzrwd Daeglunz, riengzlaeng doekdingh youq aen ranz de bonjfaenh baihciengz haenx, faqciengz luengqcien hoinaez heddoek ndaej laegngoek. De ndaw bak han “w, w”, ndaw sim cix lumj deng oet gonj faiq nyub raemx ndeu, naekdumdum, roxnyinh diemheiq mbouj cwxcaih.

Haj

Daegyaenx doeg daihhag yienznaeuz ndaej ciq daigvanj daeuj gyau hagfeiq, hoeng lij deng gag daj ranz daiq haujlai ngaenz bae yungh, dahnuengx hix hwnj cuhcungh lo, gij saedceij Bohyaenx Mehyaenx cungj mbouj ndaej soeng saek di. Songde gvanbaz haebheuj aengq haex maknim, ndwenndwen ciuqseiz dwk ngaenz hawj lwg, de bungz hoj guh angq, langhsing eu fwen：

“Ndwenndwen deng ok ngaenz,

Vih ciuhlaeng daihgeiq,

Nyienh lek dungx lek saej,

Mbouj ndaej hoj lwgnyez.”

Bohyaenx Mehyaenx mbouj ndaem naz lo, bi daengz byai hwnq romh ninz gvaiz, haeuj cangj gienjbenj gyawj mbanj bae bauz benj、dak benj、dajbau, yienghyiengh cungj guh. Mwh gunghcangj mbouj miz hong guh couh ndonj haeuj ndoeng bae ra gosamcahuj、gosingcaengh、gorumgeuz doengh gij neix bae gai vuenh ngaenz. “Ngoenzngoenz ceij(ngaenz) haeuj ranz, hix nanz dienz gumzlaeg. Ngoenzngoenz guh baeg dai, mbouj lw saek faen ngaenz.”

Ndwenngoenz lumj fan saw, baenz mbaw baenz mbaw biengj gvaq, cin bae daengz cawzhah, bi gvaq bi youh daengz. Seiq bi raezrangrang gvaqbae, Bohyaenx ca mbouj geijlai cungj coh gij caencik beixnuengx ciq ngaenz caez lo, yiemq ngaenz vunz boux cien boux fanh, Daegyaenx cungj suenq baengh “henx ndok bouxlaux” ndaej doeg sat seiq bi daihhag, ndaej haeuj sebauj cunghsinh ndawsingz bae guhhong, miznaj dangqmaz. Ngoenz hwnjban naengh ndaw ranzbanhgoeng gvangqluemx dwk genbanz, rog cueng ci bae ci dauq, ndaw ranz liengzsumsum. De baenz le aen buengjyiengh “boux doegsaw ndaej okcot” gyoengq vunzmbanj son’gyauq lwgnyez.

“Mbouj dam faengz nyaenx lai, haenqrengz doegsaw, daengzcog couh ndaej lumj Daegyaenx baenz ndei!”

“Yaek gaenx hagsib, gaenx sij cozyez, daengzcog gauj hwnj daihhag couh ndaej baenz Daegyaenx yienghhaenx!”

……

Ndaw hagdangz lauxsae gangj, ndaw ranz bohmeh hix gangj. Gangj lai le lwgnyez bouxboux dujrwz cungj yaek hwnjdaw lo, mbouj miz laeq lawz mbouj rox Daegyaenx.

Roek

Ciet ndwensam daengz lo, danhvei cuengqgyaj geij ngoenz, Daegyaenx dauqma ranz lajmbanj caeuq bohmeh caez gvaq ciet, de dwg boux dog dap banci dauqma. De caengz cawx ci, yaek rom ngaenz boiz daigvanj.

Daeglunz hix dauqma, de dwg daiq lwg daiq yah gag hai aen ci moq ndeu dauqma. Gyanghongh aen ranz moq de go’gviq cingq haiva homfwdfwd, laeq lwg’iq hag byaij dedded gwnz diegsuijniz, sing riugekgek sanq doh ndaw daizhongh.

Gij singriu neix, bin hwnj gwnz ciengz, cienz gvaq baih Bohyaenx daeuj, lumj miz gok miz oen nei, haeuj gyaeuj haeuj rwz. Gwnz daizgwnhaeux, deb byaekheu、banz nohmou caeuq aen dang lij hoenzngeungeu.

“Daegyaenx……” Mehyaenx cuengq dawh roengzdaeuj, numqnumq naeuz. “Mwngz dingq yawj aen hongh baihciengz haenx, laeqlwg Daeglunz riu ndaej geijlai dwggyaez ha, laeq de gvai lailai, boux raen boux maij……” De dingz le yaep he, song da dinghdingh cim coh Daegyaenx. “Mwngz……seizlawz caemh ndaej daiq dah youx ndeu dauqma hawj bohmeh yawjyawj?”

Daegyaenx ngaem gyaeuj gwn haeux vatvat, nyi daxmeh gangj le de baez daengx, yaeng’yaeng gingz gyaeuj hwnjdaeuj, fajnaj de deng dendwngh ciuq ndaej haumig, lumj go byaekheu mbouj gaeuq bwnh nei. Cij raen de coih le coih fouq nganxgingq gwnz giuzndaeng, song da ronghyab de yawj coh fajnaj nyaeuqnyat bohmeh, doenghdoengh gokbak geij baez le cij conh ok coenz vah youh hep youh saep ndeu.

“Meh, gou seizneix……ci mbouj miz……lij dwg co ranz youq. Sou naeuz……miz dahsau lawz nyienh cim gou?”

Hoengheiq giet ndaek lo, gwnz daizgwnhaeux caemrwgrwg. Bohyaenx cik fwngz gaem duix de miz di saenz, nip byaek cungj yaek nip mbouj hwnjdaeuj.

Caet

Ngoenzneix banringzgvaq, ndaw daizhongh seuqsat Bohlunz gaenq deng ngaeuzranz cw raemhrwd. Bohlunz youq ndaw ranzlaeuz moq seuqsatsat daeglan byaijdwddwd, singriu caeuq sing hag gangjvah lan iq sanq doh luengq doh hongh, dwggyaez dangqmaz. Lan iq ngamq gekcij, Daeglunz song gvanbaz youh lumj doiq roegenq nei mbin bae ndawsingz lamx hong lo.

Mehlunz naengh aen daengqgeg iq youq baihhenz san sauqbaetem, gij riznyaeuq goknaj de lumj dwg seizseiz cungj daiq miz sairiu, rumz yumzyumz ci daeuj, gij va’em loenqdoek haenx sanq mbin daengx hongh. Geij duz gaeq youq gyanghongh cwxcaih byaijcet, heuhgukguk dot gwn gij va- em sanqyag gwnz dieg.

Faq ciengzhongh lingh baih, Bohyaenx naengh youq doendou cit ien babbab, gij singriu lwgnyez daj laeng Bohlunz cienz gvaqdaeuj, lumj diuzraez haeuxgok camz baihlaeng bangx ndokleq nei, gaeu mbouj ndaej nyauj mbouj daengz. Mehyaenx youq henzrik fanfan fukfuk noek geij geu buhvaq ndaw bat, song ceh da muenghmoegmoeg yawj coh gizgyae, mbouj rox de ngeix gijmaz.

Sawqmwh, singlingz soujgih diuz go moq《Ndaw Saw Miz Gimhenj》yiengj hwnjdaeuj, hwk dwk song bouxlaux cungj miz di doeksaet. Bohyaenx guhmuengz mbon soujgih okdaeuj yawj, dwg Daegyaenx dwk dauqma. Aen lwgfwngz coyad de sikhaek naenx ciepdingq：“Vei, Daegyaenx.”

“Daxboh, seizneix nyaengq lwi?”

“Mbouj nyaengq mbouj nyaengq, youq ranz hane.” De caenhliengh ietsoh diuzhwet loq gaeuz de, “miz maz saeh lwi?”

“W……” Denva gyaeuj haenx dingz le geij miux cung, “w……gou siengj cawx ranz, gou bae yawj gvaq lo, hoeng……ngaenz hai baez nduj mbouj gaeuq, lij ceng saek ngeih cib fan dem.” Sing’yaem Daegyaenx yied gangj yied saeq, lumj dwg gag nammwnmwn faenh de, “daxboh, mwngz yawj……ndaw ranz lij ndaej mbouj ndaej……bang siengj banhfap?”

Seizneix daengz Bohyaenx bakcaem lo. De yaek gangj coenz nai Daegyaenx, cix mbouj rox gangj maz ndei. De roxnyinh aen mbwn bienq laep roengzdaeuj, ndawsim deng gijmaz doenghyiengh dimz dwk yaek diemheiq mbouj ndaej. Aen saenqniemh “doegsaw cij baenz ndei” de hainduj bibuengq lo, gag nam gag naeuz：“Cawqdingh gungz caek gungz, dangq dinfwngz lamhcag, soengq lwg doeg daihhag, hix mbouj ak lumj vunz.”

Gvaqlaeng mbouj geij nanz, Daegyaenx youh dwk denva dauqma hawj Bohyaenx, naeuz： “Daxboh, caengz gaenj bae ra ciq ngaenz lo, gou siengj camhseiz caengz cawx ranz nyaenx vaiq. Ciuq gwnz vangj naeuz, seizneix guekgya cimdoiq aen vwndiz ranz hwnj gyaq daiq vaiq, cingq yungh haujlai fuengfap daeuj gujli vunz cawx ranz, cawx ranz gyaqcienz aiq miz doek dauq, caj saek mboengq caiq gangj ba!” Dingq daeglwg nyaenx gangj, Bohyaenx geij sok riznyaeuq gwnz naj lumj fwtfwh mbe bingz le haujlai.

Bet

Yaek daengz byaibi fwnraemx noix, ngoenzngoenz mbwn gvengqvauvau. Sebauj cunghsinh youq vwnzvacan aen haw raeuz hai ban son dinfwngz coengh couhnieb, baij Daegyaenx bae guh boux lauxsae hwnjdangz. Haiban ngoenzhaenx, mbwn daegbied sang, fwj daegbied hau, rumz hix daegbied sangj, seiqhenz gak mbanj haujlai hauxseng bae camgya hagsib, miz haujlai vunz nyuenz youq baihrog dajhong lij ganj dauqma camgya.

Hwnjdangz gaxgonq, Daegyaenx bae caeuq gyoengq yozyenz gangjgoj, raen Daeglunz song gvanbaz gingqyienz caemh youq, doeksaet yat. De byaij gvaqbae cam：“Daeglunz, sou okbae cungj ra ndaej gwn lo, guhlawz lij dauqma camgya gijneix?”

Daeglunz han naeuz：“Faex aeu coih cij soh, vunz aeu son cij rox. Gangj daeuj cix coujnaj lai, gaxgonq doegsaw daiq noix, ok rog bae guhhong lienz dozceij cungj mbouj rox naeq. Seizneix baez miz gihvei hagsib, dou cungj mbouj siengj lauqgvaq!”

Hwnjdangz lo, yawjraen Daeglunz gvanbaz caeuq daengx gyoengq yozyenz caez naengh baihlaj dinghdaep dingqgangj, Daegyaenx ndwn gwnz gangjdaiz roxnyinh gig miz danaj.

Baihrog, aen mbwn lamzswgswg.（2 sat）